Ilo Burukuk Jen Kate Wõt Kij ñan Kejelãik Armij kin Kwelok eo etan,“Lor Ri Christ!” District Convention
Ri Kwalok Ro Renaj Bar Leto-letak juõn Peba in Kir Ejej Uan
1 Jerbal in kareelel eo kin “Lomor Eo Ej Ebak!” District Convention eo me ear walok ibelakin lal ilo yiõ eo lok ear lap an jelet ro rej itoklimo. Ro rar mõnõnõ in bõk kir eo ejej uan im rar itok, ej kab kar juõn alen air iion juõn kwojkwoj elap kin men ko lor jitõb ibwiljin Ri Kennan ro an Jehovah. (Ais. 65:13) Rar lañliñ kin air kamao ibben dolul in Christian jimjãn jimjatin eo ad emãnãn im burukuk. (Sam. 133:1) Ñan jibañ elõñ armij joñan wõt ad maroñ ñan bed ilo “Lor Ri Christ!” District Convention eo, jenaj bar bõk kunad im leto-letak juõn peba in kir ejej uan ibelakin lal.
2 Tokjen ko ilo Yiõ eo Lok: Ekkar ñan report ko kar bõki jen aolep mõttan ko ilo lal, ealikar bwe tokjen ko remõn kar kõtõbraki ikijen jerbal in kareelel eo kin “Lomor Eo Ej Ebak!” District Convention eo. Ilo elõñ jikin ko ear emõn air kwalok kake ilo news. Ñan wanjoñok, ilo juõn jikin kwelok, juõn newspaper ear je juõn katak jiljino line aetokin jen lõñ ñan lal kin jerbal in leto-letak eo, ear ba: “Ñan jibadõk aolep armij ro mokta jen ien convention eo Ri Kennan ro rar kõmman juõn jibadbad ejej uan ilo bukwon eo—rar kaetoklok ien air jerbal, ear aetoklok ial in air etetal, im emõkajlok air konono.” Jerbal eo kar karõke ñan leto-letak peba in kir eo ear kaitoklimoen ri kõmman news ro ilo bar juõn jikin kwelok, im ear lap air kwalok kake ilo news. Jilu newspaper ko ak bõlen elõñlok rar report ilo emõn kin makitkit ko ad mokta jen convention eo. Juõn ri jeje news ear je elõñ katak ko me ear bõk elõñlok jen ruo peij ko ilo juõn newspaper ilo ran in Sunday. Ear kwalok ilo tibdikin kin tõmak ko ad, dolul in jimjãn jimjatin eo ad, jerbal in leto-letak peba in kir eo, im kin convention eo. Ke juõn ri kwalok ear lelok peba in kir eo ilo juõn em, ri mweo ear kabõjrak e im ba: “Aet. Ej kab mwij aõ read kake ilo newspaper eo!” Bar juõn ri mweo ear ba: “Ej kab mwij aõ read kake kom, im kwoj bed ijin! Eñin ke peba in kir eo aõ?” Inem lio ear kobaik nan kein, “Ej juõn men emõn kom Ri Kennan ro an Jehovah komij kõmmane.”
3 Elõñ ro rej itoklimo rar itok ñan jikin convention ko im rej jibwe peba in kir eo ilo peiir. Jet ro rej itoklimo rar itok jen jikin kwelok ko retolok ñan air bed ilo program ko an convention eo. Jibadbad ko ad retiljek ñan kirtok ro jet ear tellok ñan juõn laplok in ro rar bed ilo convention eo. Juõn ailiñ ear wõr juõn laplok in 27 percent in ri kwelok ro jen yiõ eo lok.
4 Jerbale Territory Eo: Kwomaroñ jino leto-letak peba in kir eo jilu week ko mokta jen an jino convention eo am. Aolep rej aikwij kate ñan air kadedelok aolepen territory eo an congregation eo. Ilo congregation ko me elõñ territory ko ibbeir, ilo week eo eliktata mokta jen ien convention eo, ri kwalok ro remaroñ likit juõn peba in kir ilo moko ejelok armij ie ak en ilo juõn jikin ro rej etetal bajjek rejjab loe. Congregation ko ren kate ñan leto-letak aolep peba in kir ko rar bõki im ñan jerbal ilo elõñ territory ko joñan wõt air maroñ. Elañe ewõr jabdewõt bwen peba in kir ko, pioneer ro remaroñ kajerbali.
5 Ta eo Jemaroñ Ba: Kwomaroñ ba juõn men einwõt in: “Kimij bõk kunam ilo juõn jerbal ej walok ibelakin lal ñan leto-letak peba in kir in ñan juõn ien eaorõk enaj walok. Eñin copy eo am. Kwonaj lo tibdik in kamelele ko jet ilo peba in kir in.” Elañe ekadu ennan eo am enaj kamaroñ yuk ñan am leto-letak elõñ peba ko. Ak, elañe ewõr an ri mweo kajitõk, bõk ien ñan am uaki. Ñe juõn armij ej kwalok an itoklimo, kwon je etan im address eo an im bar jeblak ilo ien eo emõkajtata.
6 Elap an aorõk bwe jen kate kij ñan lor Ri Christ! (Jon 3:36) District convention eo ad ej bedotok enaj jibañ aolep ro rej kwelok bwe ren kõmman eindein. Emol jej kõtmene bwe juõn kennan elap enaj bar walok, im tokjen in ej itok ikijen jibadbad eo ñan kareelel kin “Lor Ri Christ!” District Convention eo. Kin men in, kwon kijejeto in kirtok elõñ armij joñan wõt am maroñ ñan air bed ilo kwelok in. Kimij kejatdikdik bwe Jehovah enaj kajerammõn jibadbad ko am ñe kwoj bõk kunam ilo jerbal in ej walok ibelakin lal.