Ta eo Ej Kõm̦akũt Kõj bwe Jen Kwal̦o̦k Naan?
1. Yokwe eo ad ñan wõn ej kõm̦akũt kõj ñan kwal̦o̦k naan?
1 Kwal̦o̦k naan kõn nuuj eo em̦m̦an kõn Aelõñ eo an Anij ej jerbal eo eaorõktata rainin. Ilo ad kõm̦m̦ane jerbal in, jej kwal̦o̦k ad pokake kien ko ruo rel̦l̦aptata. Kien eo el̦aptata ej ñan yokwe Jeova im eo kein karuo ej ñan yokwe ro ri turid. (Mark 12:29-31) Yokwe ej kõm̦akũt kõj ñan kijejeto ilo jerbal in kwal̦o̦k naan.—1 Jon 5:3.
2. Ñe jej kwal̦o̦k naan, ewi wãween men in ej kwal̦o̦k ad yokwe Jeova?
2 Yokwe Eo Ad ñan Jeova: Yokwe eo ad ñan Jeova ej kõm̦akũt kõj ñan jojomare. Enañin 6,000 de iiõ in an Setan kananaiki Jeova. (2 Ko. 4:3, 4) Eñin unin elõñ armej rej tõmak bwe Anij ej kaeñtaan ri nana ro ilo juon jikin ebwil, im bwe ejjab kea kõn armej ro. Rej bar tõmak bwe Anij ej jilu ilo juon. Bareinwõt, elõñ rejjab tõmak bwe ewõr Anij. Jelukkuun kõn̦aan bwe armej rein ren jel̦ã m̦ool eo kõn Jeova! El̦aññe jej kate kõj ilo jerbal in kwal̦o̦k naan, men in enaaj kam̦õn̦õn̦õik Jeova im kalluuk Setan.—JK. 27:11; Hi. 13:15, 16.
3. Ñe jej kwal̦o̦k naan ñan armej ro, ewi wãween men in ej kwal̦o̦k ad yokwe er?
3 Yokwe Eo Ad ñan Ro Ri Turid: Jej kwal̦o̦k ad yokwe armej ro ñe jej kwal̦o̦k naan ñan er. Armej ro relukkuun aikuj in roñ kõn nuuj eo em̦m̦an ilo tõre in me elukkuun pen mour. Elõñ iaaer rej ãinwõt Ri Nineva ro ilo raan ko an Jona me rar jaje ta oktak eo ikõtaan em̦m̦an im nana. (Jona 4:11) Jerbal in kwal̦o̦k naan ej jipañ armej ro bwe ren m̦õn̦õn̦õ ilo mour ko aer. (Ais. 48:17-19) Ej bar lel̦o̦k ñan er kõjatdikdik. (Rom 15:4) El̦aññe rej roñjake im mour ekkar ñan men ko rej katak kaki, renaaj “bõk lo̦mo̦o̦r.”—Rom 10:13, 14, UBS.
4. Ta eo Jeova eban mel̦o̦kl̦o̦ke?
4 Ajri ro rem̦m̦an rejjab kwal̦o̦k aer yokwe jineer im jemãer ilo jet wõt iien. Ajri rein rej kate er bwe ren yokwe jineer im jemãer aolep iien. Ejja ãindein wõt ñe el̦ap ad yokwe Anij im ro ri turid. Yokwe eo ad enaaj kõm̦akũt kõj ñan kwal̦o̦k naan aolep iien im ejjab iien ko wõt me ewõr karõk in jerbal in kwal̦o̦k naan. Jenaaj kwal̦o̦k naan wõt im jab bõjrak. (Jrb. 5:42) Jeova eban mel̦o̦kl̦o̦k ad kwal̦o̦k yokwe rot in.—Hi. 6:10.