Jemaroñ Jino Katak Baibõl̦ Ippãn Armej Ro Jej Jepl̦aak Ippãer ñan Lel̦o̦k Kein Aer Riit
1. Etke doulul in an Jeova ej rõjañ aolep ñan bar jepl̦aak im lel̦o̦k an armej ro bok in riit?
1 Elõñ armej rejjab kõn̦aan katak Baibõl̦ ippãd. Ak em̦m̦an ippãer riiti bok ko ad. Kõn men in, etto an doulul in an Jeova rõjañ aolep ri kwal̦o̦k ro bwe ren bar jepl̦aak ippãn armej ro ñan lel̦o̦k kein aer riit. El̦ak emmakijkij an armej ro riiti bok ko ad, elõñ iaaer rej kiiõ kõn̦aan katak Baibõl̦. (1 Pi. 2:2) Bõlen juon iien renaaj riiti juon katak me enaaj tõpar bũrueer im kiiõ renaaj kõn̦aan bwe jen katak ippãer.
2. Ta ko jemaroñ kõm̦m̦ani ñan kal̦apl̦o̦k an armej ro itoklimo ñe jej bar jepl̦aak ippãer?
2 ‘Utdikdiki’ Ine in M̦ool Eo: Jen jab baj lel̦o̦k wõt an armej ro bok. Em̦m̦an bwe jen bwebwenato ippãer im kajjioñ in jel̦ã kajjier. Men in enaaj jipañ kõj ñan jel̦ã ta ko rej iiooni, men ko rej itoklimo kaki, im tõmak ko aer. Kiiõ jemaroñ jel̦ã ta eo jen ba ñan jino katak ippãer. (JK. 16:23, UBS) Kõpooj ennaan eo am̦ m̦okta jãn am̦ lol̦o̦ke. Kwõmaroñ kããlõt juon point ilo katak eo im eoon eo ej ekkejell̦o̦k ñane ilo bok eo. Ilo wãween in, kwõj ilo kõkkar utdikdiki ine in m̦ool eo ilo bũruon armej eo. (1 Ko. 3:6) Kwõmaroñ je raan ko me kwaar lol̦o̦ke, bok eo kwaar likũt ippãn, im eoon ko im men ko komiro ar bwebwenato kaki.
3. Ewi ikkutkut in ad aikuj jepl̦aak ippãn ro jaar lel̦o̦k aer bok in riit?
3 Ewi Ikkutkut In? Jej aikuj jepl̦aak ippãer juon alen ilo juon allõñ ñan bõkl̦o̦k aer bok kããl. Bõtab, el̦aññe jemaroñe ak ñe armej eo ej itoklimo, jemaroñ bar kakkutkut ad lol̦o̦k e. Ñan waanjoñak, jemaroñ lol̦o̦k e juon ak ruo wiik ãlikin ad kar lel̦o̦k an bok. Jemaroñ ba, “Iar bõjraktok ñan kwal̦o̦k kõn juon men ilo bok eo iar likũt ippam̦.” Wãween in enaaj kõm̦m̦an bwe armej eo en kõn̦aan riiti katak eo kõn men eo kwaar bõkm̦aantak. El̦aññe em̦õj an kar riiti, jemaroñ kajjitõk ejet an l̦õmn̦ak kõn katak eo im kõmel̦el̦e ko ie. Ak el̦aññe eitoklimoen armej eo ñan riiti bok ko ad, jemaroñ kwal̦o̦k ñane juon tract, brochure ak bok in katak ko an allõñ eo ñe jej jepl̦aak ippãn.
4. Jen iien ñan iien, ta eo jemaroñ kõm̦m̦ane ñan lale el̦aññe ro jej lel̦o̦k aer kein riit rekõn̦aan katak Baibõl̦?
4 Jab kõttar an armej eo kajjitõk an katak Baibõl̦. Kwõn kajjitõk ñe ekõn̦aan katak. Meñe ekõn jab kõn̦aan katak Baibõl̦ m̦okta, jãn iien ñan iien jemaroñ kwal̦o̦k ñan e katak eo, “Kajjitõk ko Baibõl̦ Ej Uwaaki” ilo Naan in Keeañ im lale ñe ekõn̦aan etale ippãn doon. Bõlen jemaroñ jino katak Baibõl̦ ippãn. Bõtab, el̦aññe jejjab maroñ jino katak ippãn, jemaroñ wõnm̦aanl̦o̦k wõt im bõktok an bok in riit ñan kal̦apl̦o̦k an itoklimo.