Kilen bwe En Em̦m̦anl̦o̦k Wõt Ad Kwal̦o̦k Naan—Jepl̦aak Ippãer im Lel̦o̦k Kein Aer Riit

Unin an Aorõk: Elõñ remaroñ m̦õn̦õn̦õ in riiti bok ko ad ak rejjab kõn̦aan katak Baibõl̦ ippãd. Bõlen em̦m̦an wõt kabuñ eo aer ippãer ak remaroñ l̦õmn̦ak bwe ejjel̦o̦k iien ñan aer katak. Bõtab, ilo aer riiti bok ko ad aolep iien, emaroñ jino wõr aer kõn̦aan ñan jel̦ã kõn Naanin Anij. (1 Pi. 2:2) Bõlen enaaj wõr juon katak me enaaj jelõt bũrueer. Ñe eaab emaroñ wal̦o̦k juon men ñan ukot aer l̦õmn̦ak. Ñe jej keini ad etal im bwebwenato jidik ippãer, enaaj kõm̦m̦an bwe ren jino kwal̦o̦k bũrueer. Im enaaj jipañ kõj ñan jel̦ã kõn men ko rej itoklimo kab inepata kaki. Innem, bõlen juon iien jemaroñ jino katak Baibõl̦ ippãer.

Kilen Kõm̦m̦ane:

Kajjojo allõñ, bar bõkl̦o̦k an Naan in Keeañ ko rekããl ãinwõt am̦ kar karõke. Ñe eaab kwõmaroñ lol̦o̦k e ilo iien ko jet ilowaan wõt allõñ eo ñan kãitoklimoen kõn juon iaan katak ko jãn bok eo kwaar lel̦o̦k. Ak lel̦o̦k bok eo an allõñ eo. Jab mel̦o̦kl̦o̦k in jeki men ko komiro ar bwebwenato kaki.—Lale Ad Jerbal ñan Anij eo an Jãnwõde 2014, p. 3.
Kõppojakl̦o̦k im̦aan kajjojo iien kwõj lol̦o̦k e. Ijello̦kun am̦ baj likũti wõt juon an bokin riit, em̦m̦an bwe kwõn bwebwenato jidik ippãn ñan kal̦apl̦o̦k an itoklimo.
Pojak ñan juon iien kwõmaroñ jino katak ippãn. El̦aññe juon iaaer ej kajjitõk kõn ta eo Baibõl̦ ej ba kõn juon men, bõktok juon an bok me ej kwal̦o̦k uwaakin kajjitõk in an im etale ippãn doon. M̦okta jãn am̦ ro̦o̦l, kwal̦o̦k juon kajjitõk me ej epaakel̦o̦k ta eo ej kab m̦õj amiro kõnnaan kake. Innem, etale ippãn ñe kwõbar ro̦o̦l. Ñe kwõj keini am̦ bwebwenato jidik ippãn ilo am̦ kõjerbal Baibõl̦ eo im juon iaan bok ko ad, mel̦el̦ein bwe kwõj katak ippãn. Em̦õj ke am̦ lel̦o̦k an bok eo Ennaan Em̦m̦an im bwebwenato jidik kõn kilen katak kake? Em̦õj ke am̦ kwal̦o̦k kõn pija in alwõj ko me taitõl̦ier ej Etke Kwõj Aikuj Katak Baibõl̦? im Ta ko Rej Wal̦o̦k Ñe Kõmij Katak Baibõl̦ Ippãn Armej? Meñe armej eo emaroñ kar jab kõn̦aan katak ilo jinoin ak emaroñ wõr juon men enaaj ukot an l̦õmn̦ak. Enaaj ke em̦m̦an ñe kwõbar kajjioñe men in?

Kõm̦m̦ane Men in Ilo Allõñ In:

Kõm̦m̦an juon laajrakin etan ro kwõmaroñ bõkl̦o̦k aer bokin riit kajjojo allõñ. Bõkl̦o̦k aer Naan in Keeañ an allõñ eo im ba ñan er ke kwõnaaj bar ebbõkl̦o̦k aer ñe ewõr Naan in Keeañ kããl.