Kortokjãn Bok ko an Iiõ ko L̦o̦k

Ñe jej kakon̦i ak julo̦ki Imõniaroñroñ im Naan in Keeañ ko an iiõ ko l̦o̦k, eokwe reban maroñ jipañ armej ro. Kõn men in, em̦m̦anl̦o̦k jen lito litak ñan armej ro. Bõlen juon iaan bok kein remaroñ kãitoklimoiki juon armej im kõm̦akũt bũruon ñan kũr etan Irooj, Jeova. (Rom 10:13, 14) Jen lale jet iaan men ko jemaroñ kõm̦m̦ani ñan kortokjãn Imõniaroñroñ ak Naan in Keeañ ko an iiõ ko l̦o̦k.

• Ñe jej kwal̦o̦k naan ilo jikin ko me ejeja ad kwal̦o̦k naan ie im ejako armej ro ilo m̦weo, eokwe kwõmaroñ likũti juon iaan bok kein ilo jikin eo me ri m̦weo wõt remaroñ loe.

• Ñe jej kwal̦o̦k naan ilo jikin ko me elõñ armej ie ãinwõt jikin kõttar baj ko ak ilo airport im ob ko, eokwe jemaroñ kajjitõk ippãer ñe rem̦õn̦õn̦õ in bõk juon aer bok in riit. Innem, jen kwal̦o̦k ñan er jet iaan bok ko an iiõ ko l̦o̦k im ba bwe remaroñ ekkããlel aer bõk.

• Ñe jej jibadekl̦o̦k aujpitõl̦, ak m̦õn kwal̦kol̦ ko, ak jikin ko jet me rej pãd ilo bukwõn eo me eklejia eo am̦ ej kwal̦o̦k naan ie, kwõmaroñ likũti bok kein ijoko me armej rej jijet im kõttar ie. Ñe epãd ri jerbal ro, em̦m̦an bwe jen kajjitõk mãlim ippãer m̦okta ñe jemaroñ likũt bok ko ilo jikin kein. El̦aññe kwõj loe bwe elõñ kadede Imõniaroñroñ ak Naan in Keeañ ijo, jouj im jab bar illik bok.

• Ñe kwõj kõppojak ñan am̦ jepl̦aak ippãn armej ro kwaar kwal̦o̦k naan ippãer, kwõn l̦õmn̦ak kõn men ko kajjojo iaaer rej kaorõki ak itoklimo kaki. Ewõr ke pãleen im nejin ajri? Ej ke itoklimo in riiti katak ko me rej kõnono kõn men ko ekkã aer wal̦o̦k ñan armej ro ilo aelõñ eo an? Innem, kwõn kappok katak ilo bok ko an iiõ ko l̦o̦k me enaaj itoklimo in riiti. Im ñe kwõj jepl̦aakl̦o̦k ippãn, kwõmaroñ lel̦o̦k bok eo ñane.

• Ñe jej loe armej eo me ear m̦õn̦õn̦õ in katak bõtab aolep iien ej jako jãn m̦weo im̦õn ñe jej pukotl̦o̦k, eokwe kwõmaroñ lel̦o̦k jet iaan Imõniaroñroñ ak Naan in Keeañ ko jãn allõñ ko l̦o̦k me ejjel̦o̦k an.