Ta ko Jemaroñ Kõm̦m̦ani ñan Jipañ Ro Rejjab Lukkuun Jel̦ã Riit?

1. Ta eo emaroñ kõm̦m̦an bwe en pen ad katak Baibõl̦ ippãn ro me rejjab lukkuun jel̦ã riit?

¹ Emaroñ wõr armej ro me rem̦õn̦õn̦õ in roñjake ñe jej kwal̦o̦k naan ñan er ak rejjab lukkuun jel̦ã riit. Kõn men in, remaroñ mijak in kõnnaan kõn Baibõl̦ im bok ko jet. Eñin unin, jemaroñ jab lukkuun lo tõprak ñe jej jino kwal̦o̦k naan ñan armej kõn bok eo Katak ko Rem̦ool. Ak ewi wãween jemaroñ jipañ er ñan katak kõn Anij? Ewõr jet rukwal̦o̦k ro jãn elõñl̦o̦k jãn 20 aelõñ ko rar kwal̦o̦k l̦õmn̦ak ko aer kõn men in. Kiiõ jen etali ilo pãrokõrããp kein itulal̦.

2. Bok ta ko jemaroñ kõjerbali ñan jipañ ro me rejjab lukkuun jel̦ã riit?

² Ñe armej eo kwõj kwal̦o̦k naan ñane ejjab lukkuun jel̦ã riit, kwõmaroñ ijjino ippãn kõn bok ko ãinwõt, Roñjake Anij ak Roñjake Anij im Kwõnaaj Mour Indeeo. Juon likao ej bainier ilo Amedka ekkã an kwal̦o̦k bok kein ruo im kajjitõk ippãn armej ro ewi wõt iaaer rekõn̦aan katak kake. Ra eo ilo Kenya ear kwal̦o̦k bwe el̦ap tõprak ko rar loi ke rar kõjerbal bok kein ilo Africa kõnke ekkã wõt an armej ro ijin katak ilo aer roñjaki bwebwenato ko. Im rejjab imminene kõn kilen katak eo me rej kajjitõk im uwaak. Armej ro me rar jikuul̦ remaroñ m̦õn̦õn̦õ in katak kõn bok ko me kwõj riit im kõm̦m̦an kajjitõk. Ak ro me rar jab kam̦õj aer jikuul̦, remaroñ ãliklik ak jook. Ñe rũkkatak eo ebwe an jel̦ã riit, jet rukwal̦o̦k rej pepe ñan kõjerbal bok ko ãinwõt, Juon Ennaan Em̦m̦an Jãn Anij! ak Kwõmaroñ Jeran Anij! ak Aõ Buk in Bwebwenato Ko Jen Baibel.

3. Ta ko jej aikuj l̦õmn̦ak kaki ilo ad jipañ ak katak ippãn juon eo ejjab lukkuun jel̦ã riit?

³ Nõbar er: Ro me rejjañin kar ekkatak riit remaroñ ãliklik ak l̦õmn̦ak bwe ejjel̦o̦k tokjãer. Im ekkã aer pere er make. Bwe jen maroñ jipañ er ñan katak kõn m̦ool eo, em̦m̦anl̦o̦k bwe jen kal̦apl̦o̦k ad epaake er m̦okta bwe ren jab jook in katak. Enañin aolep ro me rejjab jel̦ã riit remãlõtlõt im remaroñ katak. Jej aikuj kwal̦o̦k kautiej ñan rein im kõm̦m̦an ñan er ilo wãween eo me renaaj kile bwe ewõr tokjãer. (1 Pi. 3:15, 16, UBS) Ñe renaaj kile bwe ewõr tokjãn aer kate er ñan katak, renaaj m̦õn̦õn̦õ in wõnm̦aanl̦o̦k wõt. Kõn men in, wõnm̦aanl̦o̦k wõt im kwal̦o̦k jouj ñan er ilo am̦ nõbar er.

4. Ewi wãween ad maroñ jipañ rũkkatak ro ad me rejjab lukkuun jel̦ã riit ñan kõppojakl̦o̦k im̦aan?

⁴ Meñe rũkkatak eo am̦ ejjab lukkuun jel̦ã riit ak kwõmaroñ rõjañe ñan kõpooji katak ko an. Jet rukwal̦o̦k ilo South Africa rar rõjañ rũkkatak ro aer ñan kajjitõk ippãn juon ilo baam̦le eo aer, ak juon m̦õttan me el̦ap an jel̦ã riit ñan jipañ er. Juon rukwal̦o̦k ilo Britain ear kõtl̦o̦k bwe rũkkatak ro an ren kõjerbal bok eo an ñe rej jino katak im etale jejjo pãrokõrããp. Men in ear jipañ er ñan kile bwe epidodol̦o̦k aer lo uwaak ko ñe rej kakõl̦l̦eiki. Juon jeid im jatid em̦m̦aan ilo India ej rõjañ rũkkatak ro an ñan lale l̦o̦k im̦aan im kõl̦mãnl̦o̦kjen̦ kõn pija ko ilo katak eo me renaaj etale tokãlik.

5. Ewi wãween jemaroñ kijenmej wõt ippãn rũkkatak ro ad?

⁵ Kijenmej wõt: Jabdewõt bok eo kwõnaaj katak ippãn rũkkatak eo am kake, kwõn jipañ e ñan loi mel̦el̦e ko raorõk ie im ren mel̦el̦e kaki. Ilo jinoin, em̦m̦an ñe ej 10 l̦o̦k ñan 15 minit in am̦ katak ippãn. Im kajjojo iien komiro ej katak, bõlen em̦m̦anl̦o̦k ñan bõk jejjo wõt pãrokõrããp im jab kajjioñ in kam̦õj elõñ pãrokõrããp ilo iien eo wõt. Ñe erum̦wij an rũkkatak eo riit, eokwe kwõn kijenmej ippãn. Ñe el̦apl̦o̦k an yokwe Jeova, enaaj l̦apl̦o̦k an kate bwe en jel̦ãl̦o̦k riit. Juon wãween kwõmaroñ jipañ rũkkatak eo am̦ ñan kõm̦m̦ane men in ej ilo am̦ kũrtok ñan kweilo̦k jãn jinoin amiro katak.

6. Ta ko jemaroñ kõm̦m̦ani ñan jipañ ro rejjab jel̦ã riit?

⁶ Ñe juon rũkkatak ej katak riit, enaaj m̦õkajl̦o̦k an kõm̦m̦an wõnm̦aanl̦o̦k ko. (Sam 1:1-3) Elõñ rar jipañ rũkkatak ro aer ilo aer etale bok eo (Apply Yourself to Reading and Writing) ãlikin aer katak. Ñe rũkkatak eo ej l̦õmn̦ak bwe ejjel̦o̦k tokjãn, kwõmaroñ rõjañe ilo am̦ kakeememeje kõn men ko em̦õj an katak kaki im jel̦ã. Im kakeememeje bwe Jeova enaaj kajeraam̦m̦ane ñe ej kate. Bareinwõt rõjañe ñan jar. (JK. 16:3, UBS; 1 Jon 5:14, 15) Jet rukwal̦o̦k ilo Britain rar rõjañ rũkkatak ro aer ñan kõm̦m̦an aer mejãnkajjik. M̦okta, ñan katak kõn al̦bapeet ko. Tokãlik, pukot im riiti eoon ko kar kããlõti. Im ãliktata, riit jãn bok ko ad me epidodo mel̦el̦e kaki. Kwõmaroñ bar jipañ juon eo ejjab jel̦ã riit ilo am̦ jipañe ñan an kõn̦aan katak riit, im jab baj katakini wõt.

7. Etke jej aikuj kate kõj ñan jipañ ro rejjab lukkuun jel̦ã riit?

⁷ Jeova ejjab kajettokjãn ro me ejabwe jel̦ãl̦o̦kjen̦ ippãer. (Job 34:19) Jeova ej lale bũruon armej ro. (1 Kron. 28:9) Kõn men in, kwõn kate eok ñan jipañ ro rejjab lukkuun jel̦ã riit bwe ren jel̦ã kõn katak ko rem̦ool. Elukkuun lõñ men ko kwõmaroñ kõjerbali ñan jipañ er. Tokãlik, kwõmaroñ kõjerbal Katak ko Rem̦ool ñan kal̦apl̦o̦k aer mel̦el̦e katak ko ilo Baibõl̦.