Katakin Ro Ejabwe Air Jela Riit
1. Ta abañ eo jemaroñ iione ilo ar kwalok nan?
1 Jet ien ilo ar kwalok nan, jej lo bwe ebin ar katak iben ro im ejabwe air jela riit. Ta eo jemaroñ kõmõne?
2. Ewi wãwen im etke jej koutiej ro im ejabwe air jela riit?
2 Koutiej Ir: Men eo eaurõk iben Jeova ej buruen juõn armij, ejjab kin joñõn an kar jikuul. (1 Sam. 16:7; Ken. 21:2) Kin men in, jejamin kejekron ro im ejabwe air jela riit. Rein renaj mõnõnõ in bõk jibõñ ñe jej kwalok ar koutiej ir im meanwõr. (1 Pit. 3:15) Men in emaroñ melelen bwe jen jab akwelap bwe ren riiti juõn eon ak pãrokõrããp. Ilo an wõnmanlok wõt im katak mol eo eaurõk jen Baibel, emaroñ kalaplok an kõnan jela riit bwe en lo mõnõnõ eo ej itok ñe juõn ej riiti Nan in Anij im “katak kake ran im boñ.”—Sam. 1:2, 3.
3. Ta kilen katak ko jemaroñ kajerbali ñõn katakin ro im ejabwe air jela riit?
3 Kilen Katakin Ro Rej Katak Baibel: Kajerbal pija ko ej juõn wãwen emõn ñõn ar katakin armij im ñõn kakememej ir kin men ko rar katak. Kin buk eo kwoj kajerbale, kwomaroñ kajitõk iben dri katak eo ta eo ej loe ilo pija eo. Kajerbal eon ko ñõn kalikar tokjen pija eo. Ilo ien elij jemaroñ bar kajerbal pija ko. Katak ko ren jab le jen joñõn air maroñ. Kalikar unin tel in katak eo im melele ko relap ilo katak eo, im jab kobaiktok melele ko jet. Riiti eon ko jen Baibel eo im kajerbal kajitõk ko ilo buk eo bwe en alikar elañe dri katak eo ej melele. Men in emaroñ kalaplok an kõnan jela riit im ñõn an mõke maroñ kabukot melele ko jet kin mol eo.
4. Ewi wãwen ar maroñ jibõñ dri katak ro ar bwe ren kõmõnmõnlok air maroñ jela riit?
4 Kein Jibõñ ñõn Kõmõnmõnlok Maroñ in Riit: Meñe jet armij ejjab emõn air riit ak rar jab jikuul remaroñ katak im drebij wõt melele ko. An juõn lukkun roñjake eo ej riiti Imõniaroñroñ eo kab an kalimjeke magazine eo an, im anõk nan ko ej ba, enaj jibõñ e bwe en emõnlok an riit. Ilo jet jikin ko, elder ro remaroñ kõmõn jikuul in riit ilo congregation eo. Nan in kakabilek kein remaroñ jibõñ kij ilo ar jibõñ ro im ejabwe air jela riit bwe ren melele “jeje ko rokwojarjar,” ko remaroñ kameletlet ir ñõn bõk lomor.—2 Tim. 3:15.