M̦õkaj im Em̦m̦akũt

Kõnke em̦õj kõm̦m̦an jet oktak ko ilo Weep jait eo ad, elõñl̦o̦k rej jeje ilo Weep jait eo im kajjitõk aer katak. Ro jet rej bar kajjitõk aer katak ilo Weep jait eo kõn wõt kõl eo ekããl ñan kwal̦o̦k naan ilo̦bwilej. Em̦õkaj an ra eo loloorjaki men kein. Ñan waanjoñak, ñe ewõr rej kajjitõk aer katak ilo Weep jait eo, ra ko rej kõjjel̦ãiki em̦m̦aan ro rej lale eklejia me rej pãd epaake ijo me eo ekõn̦aan katak ej pãd ie. Rej kõjjel̦ãiki em̦m̦aan rein ruo raan ãlikin wõt an kar armej eo kajjitõk. Rukwal̦o̦k naan ro rej ba bwe ewõr jet rar kajjitõk aer katak ak ejjañin wõr en̦ enañin lol̦o̦k er ium̦win jejjo wiik. Ewi wãween ad maroñ jipañ rein bwe en jab jakol̦o̦k aer itoklimo?​—Mark 4:14, 15.

El̦aññe ewõr juon armej ej itoklimo im ejjab jokwe ijo kwõj pãd ie, m̦õkaj in kanne peba eo etan Please Follow Up (S-43). Innem, lel̦o̦k ñan secretary eo an eklejia eo ilo iien eo em̦õkaj tata. Im secretary eo enaaj kõnnaanekl̦o̦k ra eo juon ak ruo raan jãn iien eo ilo an kanne peba eo ilo jw.org. Ej aikuj ikkutkut an em̦m̦aan rein jããke Weep jait eo. Ñe em̦m̦aan rein rej lo kõjjel̦ã eo ilo Weep jait eo bwe ewõr juon eo ej itoklimo, ren m̦õkaj in kããlõt juon rukwal̦o̦k bwe en lol̦o̦k e. Im rukwal̦o̦k eo ej aikuj kaorõke eddo in im m̦õkaj im lol̦o̦k e. El̦aññe ejako ilo m̦weo, kwõmaroñ je ilo juon peba im ba kwaar pukote im je nõmba eo am̦. Innem, pãinil̦o̦k ñan ium̦win kõjãm eo an.