Pija eo Etan “These Words . . . Must Be on Your Heart”

Rũtto ro ewõr nejier rej ãinwõt jabõt ro. Rej aikuj lale im kõjparok ajri ro nejier kõnke rej ãinwõt jiip ko epidodo aer jebwãbwe im pãd ilo kauwõtata. (JK. 27:23, UBS) Ewi wãween rũtto ro remaroñ lale im kõjparok ro nejier? Rej aikuj kõm̦m̦an iien ippãer kajjojo raan im bwebwenato ippãer. Ilo wãween in, renaaj jel̦ã bũrueer im ta ko rej inepata kaki. (JK. 20:5) Innem, rũtto ro rej aikuj katakin im kakajoor tõmak eo an ajri ro nejier. Ilo kõkkar, rej kalõk tõmak eo an ajri ro nejier kõn men ko repen me kijeek eban maroñ ko̦kkuri. (1 Ko. 3:10-15, UBS) Wãween eo emaroñ jipañ er ñan kõm̦m̦ane men in ej ilo aer jab jol̦o̦k iien aer katak ãinwõt juon baam̦le. Innem, eaorõk bwe baam̦le eo am̦ en alwõje pija eo, “These Words . . . Must Be on Your Heart.” Ãlikin ami alwõje, bwebwenato ippãn doon kake im etali kajjitõk kein itulal̦.

(1) Ta eo ear kõm̦m̦an bwe baam̦le eo an Thomas en jino dikl̦o̦k aer kaorõk iien aer katak? (2) Etke Thomas ear jab lo tõprak ilo boñõn eo jinointata ke ear kajjioñ kõm̦m̦an bwe baam̦le eo an en katak ippãn doon? (3) Ta eo Baibõl̦ ej kwal̦o̦k bwe ej kõl eo em̦m̦antata im emaroñ jipañ ro ewõr nejier bwe ren lo tõprak ilo aer katakin ajri ro nejier? (Dt. 6:6, 7) (4) Ta eo enaaj jipañ ro uwaan juon baam̦le ñan kwal̦o̦k bũrueer ñan doon? (5) Ta ko rũtto ro rej aikuj kaarmejjeti bwe ren maroñ pãd ippãn ro nejier? (6) Ewi wãween an kar Martin im Isabel Barrow kakajoor baam̦le eo an Thomas? (JK. 27:17, UBS) (7) Ta ko l̦eo ej aikuj kõpooji m̦oktal̦o̦k bwe en em̦m̦an im l̦ap tõprak ilo iien kabuñ an baam̦le eo an? (8) Ta ko Thomas ear aikuj kõm̦m̦ani bwe en bar kajoor baam̦le eo an? (9) Etke eaorõk bwe jen jab jol̦o̦k iien ad katak Baibõl̦ ãinwõt juon baam̦le? (Ep. 6:4) (10) Ta jet iaan wãween ko rem̦m̦an juon baam̦le emaroñ kõm̦m̦ani ilo iien kabuñ an baam̦le eo? (11) Ewi wãween an kar Thomas kwal̦o̦k an meanwõd im jouj ke ear kajju ilo an kauweik Marcus ñan kile aorõkin an kõm̦m̦ani men ko rejim̦we? (Jer. 17:9) (12) Ewi wãween an kar Thomas im Monica kajjioñ jipañ Rebecca ñan kõm̦m̦ane pepe eo ejim̦we im jol̦o̦k an jerãiki Justin? (Mark 12:30; 2 Ti. 2:22) (13) Ewi wãween an kar Thomas im Monica kwal̦o̦k aer tõmak ilo Jeova ke rar pepe in kõm̦m̦an oktak ilo mour eo aer? (Matu 6:33) (14) Ewi wãween an pija in kwal̦o̦k kõn aorõkin an l̦eo aikuj tõl im katakin baam̦le eo an? (1 Ti. 5:8, UBS) (15) Em̦m̦aan ro, ta eo kwõj peek in kõm̦m̦ane ãinwõt juon bõran baam̦le?

NAANIN KAKEEMEMEJ ÑAN EO EJ BÕRAN JUON BAAM̦LE: Tieta in ear wal̦o̦k ilo kar juon iaan kweilo̦k ko rel̦l̦ap ilo 2011. Ilo kar iien in, kwaar ke kile am̦ kar aikuj kakõm̦anm̦anl̦o̦k wãween am̦ katak Baibõl̦ ippãn baam̦le eo am̦? Ta kõn kiiõ? El̦aññe kwõj lo bwe kwõj aikuj bar kõm̦m̦an oktak, jouj im jar kõn oktak ko kwõj aikuj kõm̦m̦ani bwe men in en maroñ jipañ baam̦le eo am̦ kiiõ im ñan indeeo.—Ep. 5:15-17, UBS.