Jikejuul̦ ko ñan Rekũl̦ar Bainier

Kõm̦m̦an ad jikejuul̦ ej juon men eaorõk ñe jej rekũl̦ar bainier. Ñe kwõj kwal̦o̦k naan 18 awa ilo kajjojo wiik, innem kwõmaroñ bainier im bareinwõt enaaj wõr iien am̦ maroñ kakkije! Jikejuul̦ in am̦ enaaj jipañ eok ñan kajejjet awa ko am̦ ilo iien ko me kwõjjab maroñ kwal̦o̦k naan kõnke kwõnañinmej ak enana lañ. Jaat in itulal̦ emaroñ jipañ rukwal̦o̦k naan ro me rej jerbal baat taim̦ ak buul̦ taim̦ ak ro me ewõr aer nañinmej im ewõr joñan maroñ ko ippãer. Bõlen el̦aññe baam̦le n̦e am̦ emaroñ kõm̦m̦an jet oktak ko, juon iaami emaroñ jino bainier ilo allõñin Jeptõm̦ba. Etke kom̦ij jab bwebwenato kake men in ñe kom̦ naaj kõm̦m̦ane iien kabuñ an baam̦le eo ami?