Ien Kwojkwoj in Kememej eo—Juõn Ien ñan Kalaplok Jerbal ko
1. Ilo wãwen et eo “kwojkwoj ko” rar jelet Ri Israel ro rej mijak Anij?
1 Ilo ien ko kar karõki ilo juõn yiõ, Ri Israel ro etto rar kememe “Kwojkwoj ko an Jeova.” (Liv. 23:2) Ilo air bõk ien ñan kalmenlokjen kin lejokmen eo an Anij eo air ear walok ilo lañliñ elap im kar kamakit ir ñan air kijejeto kin kabuñ eo erreo.—2 Kron. 30:21–31:2.
2, 3. Etke ekkar bwe jen kalaplok makitkit ko ad lor jitõb ilo ien Kwojkwoj in Kememej eo, im ñããt eo jenaj kememe Kwojkwoj eo?
2 Ilo ran kein, makitkit ko ad rekwojarjar im rekalañliñ rej laplok kajjojo yiõ ilo ien Kwojkwoj in Kememej eo. Ej juõn ien ñan ad lukkun kalmenlokjen kake men in letok eo eaorõk me Jehovah ear letok kin kij—Nejin eo ej make wõt ear keotak. (Jon 3:16; 1 Pit. 1:18, 19) Ñe jej kalmenlokjen kin yokwe eo Anij im Nejin rar kwaloke, ej kamakit kij ñan ad nebar Jehovah im kate kij ñan kõmanman ankil an.—2 Kor. 5:14, 15.
3 Ilo yiõ in jenaj kememe Kejota eo an Iroij ilo Thursday, March 24, elikin an tulok al. Ewi wãwen jemaroñ kalaplok kunad ilo jerbal in kwalok nan ilo alliñ in March, April, im May?
4, 5. (a) Ta eo ear jibañ jet ñan jibadõk elõñlok armij kin news eo emõn? (b) Ta eo kwar lo bwe ekeie ilo bukwon eo am?
4 Jibadõk Elõñlok Armij: Bukõt wãwen ko ñan jibadõk elõñ armij joñan wõt am maroñ ñe kwoj bõk kunam ilo jerbal in kwalok nan. Kwomaroñ ke bõk kunam ilo jerbal jen em-ñan-em ñe elõñlok armij rej bed ilo mõko imwiir, einwõt ilo elikin raelep ak ilo jota? Elañe jet ilo kumi in book study eo am rekõnan kwalok nan mokta jen ien book study eo, book study overseer eo emaroñ karõk bwe en wõr juõn kwelok ekadu kin kwalok nan bwe ren maroñ jerbal ilo juõn territory ebak.
5 Bar juõn wãwen ñan jibadõk elõñ armij ej ikijen ad kwalok nan ilobwilij. Juõn sister ilo Japan ear kõnan auxiliary pioneer meñe ear jerbal full-time. Juõn elder ear rejañ bwe kajjojo ran mokta jen an etal ñan jikin jerbal eo an, emaroñ kwalok nan iturin ial ilo juõn jikin ebak ñan train station eo. Elikin an anjo ion an jook im kin kajirere eo an jet ro rej uwe ion train eo, ear kajutak juõn magazine route (karõk ñan jeblak im lelok magazine ko rekãl) ibben 40 armij ro, ekoba ro rej uwe ion train eo, ri jerbal ro ilo jikin train eo, im ro elõñ air business ebak. Ear lelok enañin 235 magazine ko ilo juõn alliñ. Ilo an kwalok jet eon ko jen Jeje ko ibben armij ro iumin jejjo minute ko kajjojo ran, ear maroñ jino jiljino Bible study ko.
6. Ewi wãwen jodikdik ro remaroñ kalaplok makitkit ko air lor jitõb?
6 Ien ko Rebellok ñan Kwalok Nan: Elõñ ri kwalok ro rej school ewõr ien air kakije ilo juõn yiõ. Ien kein remaroñ ien ko remõn ñan auxiliary pioneer. Bareinwõt, Christian jodikdik ro remaroñ kalaplok jerbal ko air ilo air kwalok nan ilo school. Kwomaroñ bwilõñ kin ewi joñan an ri school ro mõttam itoklimo kin tõmak eo am. Etke kwojjab kortokjen ien bwebwenato ko ilo classroom eo ak jeje essay ko ñan kwalok nan? Ro jet rar kõmmane men in ilo air kajerbal video ko ad. Jet rar jino Bible study ko ibben ri school ro mõttair im jibañ ir wõnmanlok ñan joñan eo rej wujleplok air mour im baptais. Men kein rej wãwen ko remõn ñan “nebar etan Jeova.”—Sam 148:12, 13.
7. (a) Ewi wãwen juõn brother ear kortokjen ien ko remõn rar bellok ñan an kwalok nan ñan ro jet? (b) Kwar iion ke juõn wãwen einwõt in?
7 Ilo makitkit ko am ilo kajjojo ran, bukõt wãwen ko ñan konono ibben armij kin Anij eo ad eaibujuij im kin kallimur ko an rekabwilõñlõñ. Juõn brother eo ej ito-itak ilo train ko kajjojo ran ej kwalok nan ibben ro jet rej uwe ibben ñe ekkar. Ñan wanjoñok, ke ear kõttar train eo ilo juõn station, ear kwalok nan ñan juõn likao kajjojo ran iumin lalem wõt minute ko. Tokjen men in, likao in im ri school eo mõttan rar errã ñan katak Bible. Rar kõmmane katak Bible eo ke rar uwe ilo train eo. Tokelik, juõn lellab eo ear roñjake air bwebwenato ear kebak brother eo im kwalok an kõnan katak Bible. Kõrã in bareinwõt ej mõnõnõ kin ien katak eo an ilo ran ko ej uwe ilo train eo. Ilo wãwen in, brother eo ear katak ibben joñoul armij ro kajjojo ke ej uwe ilo train eo.
8. Ta wãwen eo ñan kwalok nan emaroñ kamaroñ ro remõjno kin air ritto ak ewõr abañ ko kin ejmour bwe ren maroñ kalaplok ijo kunair ilo jerbal in kwalok nan?
8 Ta elañe ewõr joñan am maroñ jerbal kinke kwo ritto ak ewõr abañ ko ikijen ejmour? Emaroñ wõr wõt wãwen ko kwomaroñ kalaplok am nebar Jehovah. Kwonañin ke kajeoñ in kwalok nan ikijen am kajerbal telephone? Elañe kwojjab jelã ewi wãwen kõmmane men in, kajitõk ibben book study overseer eo am. Emaroñ karõk bwe ri kwalok ro me rej iminene in kõmmane men in ren jerbal ibbam. Ilo ami jerbal ibben don, kom maroñ katak jen don im jibañ don bwe en keie ami kwalok nan. Nan in rejañ ko remõn ñan kwalok nan ikijen kajerbal telephone ej walok ilo February 2001 Ad Jerbal Ñan Ailiñ eo, peij 5-6.
9. Ewi wãwen jemaroñ jibañ ri katak Bible ro bwe ren maroñ tellokiir ñan bõk kunair ibben congregation eo ilo jerbal in kwalok nan?
9 Ilo air bed ilo Kwojkwoj in Kememej eo emaroñ kamakit ro rekãl ñan air kõnan kalaplok air nebar Jehovah. Kwomaroñ jibañ ir anjo ion jabdewõt mijak ñan kwalok nan ilo am kwalok experience ko rekõketak kin jerbal in kwalok nan im ilo am kamineneik ir ñan kamelele kin katak ko ilo Bible im ñan jojomare tõmak eo air. (1 Pit. 3:15) Elañe juõn ri katak Bible ej kwalok an kõnan jino kwalok kin news eo emõn, konono ibben presiding overseer eo. Enaj karõk bwe ren kwelok ibben ri katak eo ñan lale elañe ej tellokin ñan an bõk kunan ibben congregation eo ilo jerbal in kwalok nan. Emol elap an kamõnõnõik buruen Jehovah ñe ej lo an ro rekãl rejetak iroij bõtata eo an!—Ken. 27:11.
10. (a) Ewi wãwen juõn schedule emõn emaroñ jibañ kij ñan auxiliary pioneer? (b) Kwar maroñ ke auxiliary pioneer yiõ eo lok ilo ien Kwojkwoj in Kememej eo? Ewi wãwen?
10 Kwomaroñ ke Auxiliary Pioneer? Eaorõk bwe jen lukkun lemnak kin men in aikwij eo kin 50 awa ko me ro rej auxiliary pioneer rej aikwij tõbari. (Mat. 5:37) Melelen men in bwe kwoj aikwij jerbal enañin 12 awa ko kajjojo week ilo jerbal in kwalok nan. Juõn ian wanjoñok in schedule ko ñan auxiliary pioneer ilo peij 5 ejejjet ke ñan wãwen ko ibbam? Elañe jab, kwomaroñ ke kõmman juõn schedule me enaj kamaroñ yuk ñan am auxiliary pioneer ilo March, April, ak May? Kajitõk ibben Jehovah ñan kajerammõn jibadbad ko am ñan kalaplok jerbal in kwalok nan eo am.—Ken. 16:3.
11. Ewi wãwen elder ro im ministerial servant ro remaroñ rejetak ro renaj jerbal einwõt auxiliary pioneer?
11 Elder ro im ministerial servant ro renaj jurake jibadbad ko am ñan kõmman bwe ien Kwojkwoj in Kememej in en juõn eo elap an nebar Jehovah. Bõlen, elõñ iair renaj auxiliary pioneer. Elder ro renaj karõk bwe en lõñlok kwelok ko ñan kwalok nan, einwõt ilo elikin raelep, ilo jota, im ilo weekend ko, ñe ewõr aikwij. Ñan bebe kin ia eo im ñããt enaj walok kwelok kein im wõn eo emaroñ tel, elder ro remaroñ aikwij konono ibben ro me renaj pioneer ak rej lemnak in kõmmane. Elder ro renaj kate ir ñan karõk bwe en wõr ri kwalok ro jet kwomaroñ jerbal ibbeir ilo ran ko im ien ko kwar karõk ñan kwalok nan. Ilo wãwen in, kwomaroñ kabin karõk ko am im enaj lap tõbrak ko remõn.—Ken. 20:18.
12. Ta eo ej kamakit kij ñan nebar Jehovah ien otemjej?
12 Kõmman Joñan Am Maroñ: Elañe wãwen ko ibbam rejjab kõmman bwe kwon maroñ auxiliary pioneer, kememej bwe Jehovah ej buñburuen kin jibadbad ko im men in katok ko ad ‘ekar ñan men ko ewõr ibbed, jab ekar ñan men ko ejelok ibbed.’ (2 Kor. 8:12) Elõñ men ko jej aikwij kamolol Jehovah kaki. Kin un in emõn David ear je: “I naj wijtak Jeova ien otemjej; An nebar e naj ber i loñiõ ien otemjelok.” (Sam 34:1) En eindein bebe eo ad ilo ien Kwojkwoj in Kememej in.
[Kajjitõk ko]
[Caption on peij 3]
Ewi Wãwen Kwonaj Kalaplok Jerbal in Kwalok Nan eo Am?
◼ Kwalok nan ñe armij ro rej bed ilo moko imweiir
◼ Kwalok nan ilo jikin ko ilobwilij
◼ Kwalok nan ilo jikin jerbal eo ak ilo school
◼ Kwalok nan ikijen kajerbal telephone
◼ Jerbal einwõt juõn auxiliary pioneer