Men ko Jen Jab Kõm̦m̦ani Ñe Jej Katak Baibõl̦ Ippãn Armej Ro

L̦ap Ad Kõnnaan: Jab l̦õmn̦ak bwe kwõj aikuj in kõmel̦el̦eik aolepen katak eo. Jijej ear kõjerbal kajjitõk ko ñan jipañ armej ro bwe ren l̦õmn̦ak im make lo uwaak eo ejim̦we. (Mt 17:24-27, UBS) Ekkã an kajjitõk ko kõm̦m̦an bwe en kãitoktoklimo juon katak, im remaroñ jipañ eok ñan jel̦ã kõn l̦õmn̦ak ko an rũkkatak eo am̦ im men ko ej tõmak kaki. (be-E 253 pãr. 3-4) Ñe kwõj kwal̦o̦k juon kajjitõk, eaorõk bwe kwõn kijenmej wõt im kõttar an rũkkatak eo uwaak. El̦aññe ebõd an uwaak, jab m̦õkaj im kwal̦o̦k uwaak eo ejim̦we ñane, ak kwõn bõkm̦aantak bar kajjitõk ko jet me renaaj jipañe ñan make lo uwaak eo. (be-E 238 pãr. 1-2) Kõnono ilo juon wãween me enaaj mel̦ak ñan an rũkkatak eo bõk mel̦el̦e ko rekããl.​—be-E 230 pãr. 4.

Kapokpok Ad Kõmel̦el̦e: Jab kwal̦o̦k kõn aolep men ko kwõjel̦ã kaki kõn men eo kom̦ij katak kake. (Jon 16:12, UBS) L̦õmn̦ak kõn boin ko raorõk ilo pãrokõrããp eo. (be-E 226 pãr. 4-5) Kwõjjab aikuj in jol̦o̦k iien ñan tipdiki aolep mel̦el̦e ko ilo juon katak, ekoba men ko me remaroñ kãitoktoklimo. Etke? Kõnke men in enaaj kõm̦m̦an bwe rũkkatak eo en pel̦o̦k jãn boin ko raorõk ilo katak eo. (be-E 235 pãr. 3) El̦aññe rũkkatak eo emel̦el̦e kõn boin eo eaorõk, wõnm̦aanl̦o̦k wõt ñan pãrokõrããp eo tok juon.

Baj Etale Wõt Katak Eo: Mejãnkajjik eo ad ej ñan tõpar bũruon armej ro, ejjab ñan etale wõt katak eo im kõjem̦l̦o̦ke. (Luk 24:32, UBS) Naanin Anij el̦ap an kajoor. Innem jen kõtl̦o̦k bwe kajoor eo ie en jipañ kõj ikijjeen ad lukkuun etale eoon ko raorõk me rej rejetake katak eo. (2Ko 10:4, UBS; Hi 4:12; be-E 144 pãr. 1-3) Kõjerbal waanjoñak ko repidodo. (be-E 245 pãr. 2-4) L̦õmn̦ak kõn apañ ko rũkkatak eo ej iiooni im men ko ej tõmak kaki, innem kajjioñ jitõñl̦o̦k katak eo ñane. Kajjitõk ippãn kõn kajjitõk ko rej ãinl̦o̦kwõt kajjitõk kein: “Ta l̦õmn̦ak n̦e am̦ kõn men in me ej kab m̦õj am̦ katak kake?” “Ta eo men in ej katakin kõj kõn Jeova?” “Kwõl̦ak lale, ewi wãween an nãj naanin kakapilõk in jipañ kõj ñe jenaaj l̦oore?”​—be-E 238 pãr. 3-5; 259 pãr. 1.