Roñjake Anij​—Kilen Kõjerbale Bok in

Ilo bok eo Roñjake Anij, kar kõm̦m̦ane bwe en lõñ wõt pija ko ie ñan ad maroñ katak kõn m̦ool ko jãn Baibõl̦ ippãn ro rejjab lukkuun jel̦ã riit. Ilo kajjojo katak, em̦õj kõpooj pija ko im ewõr l̦ain ko rej jitõñl̦o̦k juon pija ñan pija eo tok juon. Wãween in enaaj jipañ rũkkatak eo ñan mel̦el̦e kõn ta ko rar wal̦o̦k m̦okta im ta ko rar wal̦o̦k tokãlik ilo juon katak.

Pija ko ilo bok kein, Roñjake Anij kab Roñjake Anij im Kwõnaaj Mour Indeeo rej ãinl̦o̦k wõt juon, bõtab elõñl̦o̦k naan ko ilo Roñjake Anij im Kwõnaaj Mour Indeeo im jemaroñ kõjerbale ippãn rũkkatak ro rejel̦ã riit. Ekkã an rukwal̦o̦k ro kõjerbale Roñjake Anij im Kwõnaaj Mour Indeeo ñe rej katak ippãn rũkkatak eo aer me ej kõjerbale Roñjake Anij. Ewõr bar kõmel̦el̦e ko jet ilo juon bo̦o̦k me ej pãd ilo elõñ iaan peij ko ilo Roñjake Anij im Kwõnaaj Mour Indeeo im jemaroñ bar etali ippãn rũkkatak eo ad, jemaroñ kããlõt ñan etali ekkar ñan maroñ eo an rũkkatak eo.

Kwõmaroñ lel̦o̦k juon iaan bok kein jabdewõt iien mekarta ñe ejjab juon iaan kein lel̦o̦k ko an allõñ eo. Ilo iien am̦ katak ippãn rũkkatak ro, kõjerbal pija ko ñan kõmel̦el̦eiki katak ko jãn Baibõl̦. Kwal̦o̦k kajjitõk ko renaaj kõm̦m̦an an rũkkatak eo kwal̦o̦k l̦õmn̦ak ko an, im lukkuun lale ñe emel̦el̦e. Riit im etale eoon ko itulal̦in kajjojo peij. Ñe ejem̦l̦o̦k bok eo, wõnm̦aanl̦o̦k im katak kõn bok eo, Ta eo Baibõl̦ ej Lukkuun Katakin Kõj? ñan am̦ maroñ jipañe kõm̦m̦an buñtõn ne ñan peptaij.