Kõjerbal Pijain Alwõj ko ñan Katakin Ri-Katak ro Am̦

Pija ko im kein jipañ ko jet el̦ap aer jipañ ro rej lali ñan keememej men ko rej katak. Ri-Kaki eo ad Em̦m̦antata, Jeova, ear kõjerbal men kein ñan katakin ro jet kõn juon men eaorõk. (Jen 15:5; Jer 18:1-6, UBS) Jesus, ri-Kaki eo El̦ap, ear bar kõjerbali men kein. (Mt 18:2-6; 22:19-21) Juon iaan kein jipañ ko me kar loe bwe el̦ap an jipañ armej ro ilo raan kein ej pijain alwõj ko. Kwõj ke kortokjãn pijain alwõj ko ñe kwõj katak Baibõl̦ ippãn ri-katak ro am̦?

Ewõr 10 pija ko kar kõm̦m̦ani ñan jipañ kõj ñe jej katak ippãn ri-katak ro ad kõn bok eo, Juon Ennaan Em̦m̦an Jãn Anij! Kajjojo iaan taitõl̦in pija kein kar bõke jãn juon iaan kajjitõk ko rekilmej ilo katak ko ilowaan bok in. Ñe kwõj taunl̦outi bok in ak lale ilo weepjait eo, enãj wõr jet link ilo katak ko ie ñan kakeememej kõj bwe jen kab kõjo̦e pija kein. Bareinwõt, ebar lõñ pijain alwõj ko jet jemaroñ kõjerbali ilo ad katak kõn bok ko jet ilo Nien Kein Jerbal ko Ad ilo Kwal̦o̦k Naan.

Kwõj ke itõn katak ippãn ri-katak eo am̦ kõn juon katak me emaroñ pen an mel̦el̦e kake? Ak ri-katak eo am̦ ej ke iioon juon kain apañ? Em̦m̦an kwõn etal ñan jw.org® im JW Broadcasting® im pukot pijain alwõj ta eo enaaj lukkuun jipañe. Bõlen komiro ri-katak eo am̦ emaroñ alwõje pija eo ippãn doon im bwebwenato kake ãlikin amiro alwõje.

Kajjojo allõñ, ej wõr pija ko rekããl. Ilo am̦ alwõji, em̦m̦an kwõn l̦õmn̦ak kõn ewi wãween am̦ maroñ kõjerbali ñe kwõj katak ippãn ro jet.