MOURIN KŨRJIN
Kweilo̦k El̦ap ko Kajjojo Iiõ—Iien ko Repel̦l̦o̦k ñan Kwal̦o̦k Yokwe
Etke elukkuun l̦ap ad m̦õn̦õn̦õ ilo iien kweilo̦k el̦ap ko ad ilo kajjojo iiõ? Ãinwõt ilo kar iien ko an ri-Israel ro etto, kweilo̦k el̦ap ko ad rainin ekkã aer letok ñan kõj iien ko repel̦l̦o̦k ñan kabuñ ñan Jeova ippãn elõñ bukwi rũttõmak ro m̦õttad, im bar elõñ to̦ujin. Jej lukkuun m̦õn̦õn̦õ kõn m̦õñã ko rellõñ ilo kõkkar. Jej bar lukkuun kaorõk iien ko raorõk jej julo̦k ippãn ro m̦õttad im baam̦le ko ad. Kam̦m̦oolol eo ad el̦ap ej kõm̦akũt kõj ñan pãd ilo aolep raan ko jilu ilo kweilo̦k el̦ap eo.
Ñe ewõr iien ko me repel̦l̦o̦k ñan ad koba ippãn doon, jejjab aikuj l̦õmn̦ak wõt kõn wãween ko me kõj make jemaroñ bõk tokjãn ak jej aikuj bar l̦õmn̦ak kõn ewi wãween jemaroñ kwal̦o̦k yokwe ñan ro jet. (Ga 6:10; Hi 10:24, 25) Ñe jej dãpiji wõt juon kõjãm bwe en pel̦l̦o̦k ñan an juon jeid im jatid em̦m̦aan ak kõrã del̦o̦ñ im kakon̦i wõt jea ko me jenaaj aikuji, jej kwal̦o̦k bwe jej l̦õmn̦ak kõn kõn̦aan ko an ro jet. (Pil 2:3, 4) Iien kweilo̦k el̦ap ko rej kõpel̦l̦o̦k iien ko rem̦m̦an ñan ad maroñ m̦õttãiki ro jet. M̦okta jãn im ãlikin bũrookraam̦ eo im ilo iien eo jej kakkije im m̦õñã in raelep, jemaroñ kõm̦m̦an bwe en juon ad mejãnkajjik ñan bwebwenato ippãn juon eo me jejjañin kar jel̦ã kajjien bwe jen maroñ jel̦ã kajjien. (2Ko 6:13) Jem̦jerã ko me jej ejaaki ilo iien kein remaroñ pãd ñan indeeo! Ilõñin men otemjej, ñe ro jet rej lo ad kwal̦o̦k yokwe eo em̦ool, kiiõ remaroñ kããlõt ñan kobatok ippãd im karejar ñan Jeova.—Jon 13:35.
ALWÕJE PIJA EO ETAN “LOVE NEVER FAILS”! INTERNATIONAL CONVENTIONS, INNEM UWAAKI KAJJITÕK KEIN ITULAL̦:
Ewi wãween aer kar kwal̦o̦k yokwe ñan ro rar etal ñan iien International Convention ko ilo 2019 eo?
Etke bõrokuk im yokwe eo ibwiljin armej ro an Jeova elukkuun kabwilõñlõñ?
Ta wãween ko kõn yokwe eo an Kũrjin ro me ro uwaan Kumi eo Ej Lale Aolep Eklejia ko an Ri Kõnnaan ro an Jeova rar lukkuun kaalikkare?
Ewi wãween kwõmaroñ bõk kun̦aam̦ ñan kwal̦o̦k yokwe ilo iien kweilo̦k el̦ap ko ad?
Ewi wãween an kar yokwe kabõrokuk ro jeid im jatid ilo Jãmne im South Korea?
Ta eo jej aikuj jek ilo bũruod ñan kõm̦m̦ane?