Ekan ko Lor Jitõb ilo Ien Ekkar
1 “I naj . . . lamõj ñan ine ko im kõmman bwe ren orlok, im I jamin bõktok ñitta iom,” Iroij Bõtata Jehovah ej ba. (Ezek. 36:29, NW) Nan in kanan kein rej jerbal ñan armij ro an Anij rainin. Ilo juõn wãwen kõkkar, Jehovah ear kõmman bwe ine ko rej kejbãrok mour ren eddeklok im orlok ñan armij ro an. Ekan ko lor jitõb ilo ien ekkar me rej itok ikijen assembly im convention ko rej kalikar men in.
2 Ilo convention eo ear walok ilo Columbus, Ohio, ilo 1931, Jehovah ear tel ri kabuñ ro an ñan bõk juõn ãt ekãl—Ri Kennan ro an Jehovah. (Ais. 43:10-12) Ilo 1935 ear jimwe air kile jar eo elap ilo Reveles̃õn 7:9-17. Ilo 1942, Brother Knorr ear kwalok katak eo “Ainemõn—Emaroñ ke To an Bed?” Katak in ear lelok kajur ñan jerbal in kwalok nan eo ibelakin lal im tellok ñan an ejaak Watchtower Bible School of Gilead. Meñe jet convention ko elap ad kememeji, ak kajjojo iair ear mol an juõn table eobrak kin ekan ko lor jitõb kar litoki ilo ien ekkar.—Sam 23:5; Mat. 24:45.
3 Ej Emõn ke Am Bõk Ekan Kein? Emaroñ lõñ mõñã ko rej bed ibelakid ak jej jabwe õn elañe jejjab kate kij ñan mõñã. (Ken. 26:15) Men in ej eindein kin men ko ilo jitõb. Emwij ad lo bwe jet rej etetal bajjek inabõj ilo ien assembly im convention ko, ak bwebwenato ibben ro jet ilo ien kwelok eo. Meñe kamao ko rekõketak ej juõn wãwen eaorõk ilo convention eo, ewõr ien mokta im elikin kajjojo kwelok ko ñan men in. (Ekkl. 3:1, 7) Elañe jejjab bed ilo jikin jijet ko ad im lukkun liñõre katak ko, jemaroñ likjap in bõk juõn point eaorõk. Jen ien ñan ien convention department overseer ro im brother ro me ewõr kunair remaroñ lo bwe ej juõn men in aikwij ñan konono kin men ko kin convention eo ñe program eo ej wõnmanlok wõt. Elañe rejjab lolorjake men ko an convention eo, ren likit juõn joñok emõn ilo air lukkun roñjake program eo. Ejelok juõn iad en likjap jen jabdewõt ekan ko lor jitõb rej litoki.—1 Kor. 10:12; Pil. 2:12.
4 Elap ad lañliñ kin mol ko relap ilo jitõb Jehovah ej litoki, ñe keidi ibben katak ko rewan im ejelok õniir an Christendom! (Ais. 65:13, 14) Juõn wãwen jemaroñ kwalok ad ‘kamolol’ ej ilo ad watõk convention eo einwõt juõn ien emõn jej bõk katak jen Jehovah. (Kol. 3:15) Lemnak kin ennan eo, jab ri konono eo, im watõk bwe ennan eo ej itok jen ‘Ri Kaki eo ad Elap.’ (Ais. 30:20, 21; 54:13) Lukkun roñjake. Ilo tu-kadu je point ko relap. Elij kin point ko relap kar roñjake ilo ran eo ilo jota. Jerbale ta eo kwar katak kake.
5 Kajjojo assembly im convention eo ej walok mokta jen Armageddon, meñe ej walok ilo juõn camp an ro ri jibokwe, ilo juõn ailiñ ejorrãn kin tarinae, ak ilo juõn jikin elaplok im ewõr ainemõn ie, ej juõn anjo ion Satan! Einwõt juõn dolul in jimjãn jimjatin eburukuk, jej kaorõk ien ko ad remõn ñan kuktok ibben don ilo assembly im convention ko ad. (Ezek. 36:38, NW) Jej liki bwe bar juõn alen Jehovah ilo yokwe enaj letok “kijeir ñõn ir ien ejejit.”—Luk 12:42.
[Kajjitõk ko]
1. Ewi wãwen Ezekiel 36:29, NW, ej jejjet kitien ilo ran kein?
2. Ewi wãwen an kar Jehovah kajerbal district convention ko ñan letok ekan ko lor jitõb ilo ien ekkar?
3. Ta eo jej aikwij kõmmane ñan bõk tokjen jen kwojkwoj eo ilo jitõb ilo district convention eo ad?
4. Ewi wãwen jemaroñ kwalok ad kamolol kin ekan ko ilo jitõb Jehovah ej litoki?
5. Ta un ko ñan lañliñ district convention ko rej litoki ñan kij?
[Caption on peij 3]
Kwalok Kamolol kin Table eo an Jehovah
◼ Lukkun roñjake
◼ Je point ko relap
◼ Elij point ko relap ilo program eo ilo joten eo
◼ Jerbale ta eo kwar katak