1997 “Tõmak ilo Nan in Anij” District Convention
1 Ri jilek Paul ear kakememej Timothy bwe “Jeje ko otemjej emwij letok kin kakõrmol an Anij.” (2 Tim. 3:16) Kinke Nan in Anij ej kakõrmol an Anij, ewor unin ñõn jerbale tõmak ilo e. Unin tel in district convention eo ilo yiõ in ej “Tõmak ilo Nan in Anij.” Program eo enaj kakajurlok tõmak eo ad ilo Bible eo, meñe etto ad kar jela mol eo ak jej kab deloñ ilo dolul eo an Jehovah ilo ran kein. Kij aolep jej aikwij karõk in bed ilo kwelok eo iumin aolepen program eo. Enaj lukkun kõketak kij elañe ro rekãl rej itoklimo, elaptata ro jej katak Bible ibbeir, rej kwelok ibbed!
2 Kõmmõn Emõn ilo Am Kejbarok Katak ko: Ri jilek Peter ear kakememej Christian ro ilo ebeben eo kein kajuõn bwe enaj emõn air kõmmõn elañe rej kejbarok nan in drikanij einwõt maram ej romak ijo e marok. (2 Pet. 1:19) Ejja wãwen dein an mol ñõn kij. Ad mour ilo jukjuk im bed in emor iumin iroij eo an Satan ej einwõt ad bed ilo juõn jikin emarok. Jej kamolol bwe kar kir kij jen marok eo ilo jitõb. (Kol. 1:13; 1 Pet. 2:9; 1 John 5:19) Ñõn bed wõt ilo maram, jej aikwij kõmmõn bwe tõmak eo ad en kajur wõt ilo ad kejbarok Nan in kakõrmol eo an Jehovah. District convention eo ad enaj rejañ kij ñõn ad kõmmõn eindein.
3 Kate ej men eo jej aikwij in kõmmõne elañe jekõnan kalmenlokjen kin program eo, ak jenaj lukkun jerammõn elañe jej kõmmõn eindein. Ej aikwij emõn ad kar kakije mokta jen jej itok ñõn convention eo bwe en emõn ad roñjake program eo. Kwon bed ilo jikin jijet eo am moktalok jen an jino program eo. Inem koba ilo al in kabellok eo im jar ilo jinoin program eo ilo kajjojo ran. Ritto ro rej aikwij likit joñok eo, im ro jemen im jinen rej aikwij katakin ajiri ro nejiir.—Ep. 6:4.
4 Elañe jej lale unin tel in katak ko mokta jen an jino program eo ilo ran eo, jemaroñ kajeoñ in lemnak kin ta point ko renaj kwalok kaki ilo program eo. Men in enaj kalaplok ad itoklimo ilo katak eo ñe renaj kwaloke. Jemaroñ bukõt point ko me renaj jibañ kij kwalok ñõn ro jet kin etke jej tõmak ilo Anij im ilo kallimur eo an ñõn lelok jinekjej ñõn ro rej bukõte. (Hib. 11:1, 6) Kar rejañ kij bwe jen je note ko rekadu ñõn jibañ kij kememej point ko relap ilo program eo. Elañe jej je elõñ note ko, jemaroñ luji jet point ko relap kinke jaar boub in jeje.
5 Ilo convention ko ilo yiõ eo lok, elõñ ritto ro im jodikdik ro kar lo air etetal bajjõk inabõj ak lolok ro jet ilo ien program eo, jen air roñjake ta eo “dri korijer eo e tiljek im meletlet” rar letok kin tokjen eo ad. Jesus ear kallimur in letok ñõn kij ekan ko lor jitõb ilo ien ekkar. (Mat. 24:45-47) Kin men in, jej aikwij bed ñõn bõk tokjen jen ekan eo im jab kwalok ad jab kamolol. (2 Kor. 6:1) Bareinwõt ñe jet ajiri ro rej mõk, ekkã air kajitõk in kajerbal mõn kabojak eo einwõt juõn jekben ñõn jutak im etetal bajjõk. Kaminene ko remõn ilo mweo ekkã an naj kõmmõn bwe en jab juõn men in aikwij ñõn an emakijkij air etal ñõn mõn kabojak eo. Jet ien, jodikdik ro renaj jijet ibben don ilo jikin ko retolok, bwebwenato, unojdikdik, im leto-letak note ko ñõn don. Jodikdik ro ad, ro me rej jelmae elõñ ijibed ko ilo ran kein, rej aikwij kalmenlokjen kake katak ko rej kwaloki, im jab kõmmõn men ko jet ilo ien program eo. Kõnan ko an jodikdik me rejjab ekkar ñõn Bible eo rej aikwij bõpraiki. (Keiri 2 Timothy 2:22.) An aolep, ritto ro im jodikdik ro, kejbarok air roñjake naj kautiej Jehovah im kalõñliñ e.
6 Elañe ej juõn men in aikwij bwe juõn ian attendant (ri lale kejem) ro ej lelok nan in kakabilek ñõn jabdewõt armij ilo men kein, rej aikwij bõke einwõt juõn men in letok ej yokwe jen Jehovah. (Gal. 6:1) Aolep rej aikwij kememej bwe un eo unin jej kate kij in bed ilo convention eo ej bwe jen maron ‘roñjake im katak.’ (Dut. 31:12) Bareinwõt, “dri meletlet eo en roñjake im kalaplok an jela.” (Jabõn Kennan 1:5) Ilo bween ien eo mokta jen kwoj etal ñõn convention eo, bwebwenato einwõt juõn family kin aikwij eo ñõn jijet ibben don, jijet wõt iumin program eo, im lukkun roñjake, bwe komin bõk tokjen jen aolepen program eo.
7 Kalitlit ko Me Rej Kabuñburuen Jehovah: Armij ro an Jehovah rej men in aluij ñõn aolepen lõl in. (1 Kor. 4:9) Ekkã air jela kin kij kin wãwen an emõn ad kalitlit kij. Ilo jerbale nan in kakabilek ko ilo Jeje ko jemaroñ loi ilo 1 Timothy 2:9, 10 im ilo 1 Peter 3:3, 4 kar walok oktak ko relap ilo baotokin elõñ ñe keiri ibben wãweir ke rej kab jino koba ibben congregation eo an Christian. Men in ej lukkun oktak jen wãwen kalitlit ko renanalok me jej loe ilo lõl in. Jej aikwij kejbarok bwe jen jab einwõt lõl in ikijen baotokid.—kõnak nuknuk ko elejen joñan, kowõnmanlok style in bõr ko rebuñbuñ ilo lõl in, ak kõnak nuknuk ko rejjab ekkar ñõn Christian. Wãwen kalitlit ko ad remõn ren jibañ ro rekãl ro rej bed ilo convention eo ñõn lo wãwen eo Christian ro rej aikwij kalitlit ir make.
8 Meñe lemnak eo ear walok jen tokjen convention ko ilo yiõ eo lok ear emõn, wãwen kalitlit ko in lõl in ej juõn abañ wõt ibben jet brother im sister ro. Ñe jej kõmmõn karõk ko ñõn ad bed ilo convention eo, jej aikwij etale kij make ikijen kalitlit ko ad. Ro jemen im jinen, ilo meletlet lale ta eo ajiri im jodikdik ro nejimi renaj kõnaki. Kõmmõn bwe jen jab kõtlok bwe style im men ko rebuñbuñ an lõl in ren jelet ilo juõn wãwen enana baotokin Christian eo ad.
9 Kejbarok Mwil Emõn: Mwil emõn ej juõn kakõllan Christian ro remol. (1 Pet. 2:12) Mwilid emaroñ kwalok juõn nan emõn im jibañ ro jet ñõn lo ta eo tõmak ilo Anij im ilo Nan eo an emaroñ kõmmõne ñõn armij. Men in emaroñ kamakit jet ñõn jela Jehovah. (Keiri 1 Peter 3:1, 2.) Ewor jerammõn eo ibbed ñõn kaibujuij Anij ikijen mwilid.
10 Kar letok elõñ nan in kakememej ko kin debdebiji ajiri ro nejid. Meñe convention ko rej letok ñõn kij ien eo emõn ñõn lolok im kamao ibben ro jeid im jatid, ro jemen im jinen rej aikwij lemnak wõt kin eddo eo air ñõn lale ajiri ro nejiir ien otemjej. Men in ej juõn eddo Jehovah ej lelok ñõn aolep ro jemen im jinen. (Jabõn Kennan 1:8; Ep. 6:4) Makitkit ko an ajiri ro rejjab lale ir emaroñ kokkure ãt emõn eo me Ri Kennan ro jet rar kate ir in kaleke.—Jabõn Kennan 29:15.
11 Kabwe Expenses ko an Convention eo: Kij aolep naj wor expenses ko ikijen ad etal ñõn convention ko. Ewor bareinwõt expenses ko jet me jej aikwij kejbaroki, ekoba wõnãn kajerbal Kingdom Hall eo rej kajerbale ñõn convention eo. Jabawot ko ad remmol ilo convention ko elap kamolol kaki.—Jerbal 20:35; 2 Kor. 9:7, 11, 13.
12 Jikin Jijet: Nan in tel ko rar letok iumin elõñ yiõ ko rej jerbal wõt, melelen, KWOMAROÑ KEJBAROK JEA KO ÑÕN RO UAN FAMILY EO AM WÕT IM JABDEWÕT ARMIJ REJ IUWE IBBÕM. Emõn ad lo bwe elõñlok armij rej bokake nan in tel kein ilo yiõ ko rej kab motlok, im men in ej kalaplok mejatoto in yokwe rej kwaloke ilo convention ko.
13 Baptais: Ro renaj baptais rej aikwij jijet ilo jikin eo kar karõke mokta jen ej jino program eo ilo jibboñ in Saturday. Kajjojo armij eo enaj baptais ej aikwij bõktok juõn nuknuk in tutu ekkar im juõn towel. Ilo ien ko remotlok jet rar kõnak nuknuk ko rejakkar im men in ear bõk jen aibujuij in ien eo. Elder ro rej elij kajitõk ko ibben ro renaj baptais ilo Our Ministry book rej aikwij lale bwe kajjojo armij rej melele point kein. Baptais an juõn ilo kakõllan wujleplok eo an ej juõn men ikõtan armij eo make im Jehovah. Kin men in, ej jakkar an ro rej baptais ñõn atbokwõje don ak jibwe pein don ñe rej baptais.
14 Camera ko, Camcorder ko, im Audiocassette Recorder ko: Camera ko im kein kanne tape ko remaroñ kajerbali ilo convention ko. Bõtab, ad kajerbali en jab kamad ro jet rej kwelok. Ilo ien kwelok ko jen jab etetal im kõmmõn pija ko, bwe men in enaj kamad ro jet rej kate ir ñõn roñjake program eo. Ejelok jabdewõt kein kanne tape ko remaroñ kalake ñõn electrical ak sound system ko, im bareinwõt kein jerbal ko an armij eo make ren jab binej ial ko, jikin etetal ko, ak binej mejen ro jet.
15 Mõñã ko ilo Convention eo: Kinke rejjab kõmmõn mõñã ilo convention ko men in ear walok ilo tokjen eo bwe elõñlok armij rej anemkwoj ilo ien kwelok ko ñõn kalmenlokjen kin ekan ko lor jitõb. Elõñ nan in kamolol ko rar bõki jen ien eo karõk in ñõn kabidodoik jerbal kar kajutake. Aolep ren kõmmõn karõk ñõn bõktok mõñã ko rekkar im remõn ilo ien kakije ilo raelep. Ejelok nien glass ak den in kadõk ren kadeloñtok ilo mõn kwelok eo. Jet ri roñjake ro kar lo air mõñã im idak ilo ien program eo. Air kõmmõn men in ej kwalok air jab kautiej.
16 Jej lukkun kamolol kin kwojkwoj in ilo jitõb im mejatoto in jimjerã eo eainemõn ilo ien kakije ilo raelep. Ilo ad jerbal ekkar ñõn unin karõk in, jen ad illok jen mõn kwelok eo ilo ien kakije ilo raelep ñõn wia mõñã ko, joij im bõktok jet mõñã ko ibbõm. Ilo wãwen in, enaj laplok ien ñõn lõñliñ kin am kamao ibben ro jeim im jatim maan im kõrã.
17 Elap ad mõnõnõ bwe mõttan wõt jidik “Tõmak ilo Nan eo an Anij” District Convention ko renaj jino! Kij aolep jekõnan kõmmõn bwe karõk ko ad kar kõmmõne bwe jen bed ilo aolepen program eo, bwe jen maroñ lõñliñ kin kwojkwoj eo emõn ilo jitõb me Jehovah ear keboje ñõn kij ikijen dolul eo an. Ilo wãwen in jenaj maroñ “wãppen im emwij kõkõmõnmõn e ñõn jerbal emõn otemjej” ilo ran ko rej bed iman.—2 Tim. 3:17.