1999 “Nan in Kanan eo an Anij” District Convention ko
1 Ke Ri Israel ro rar bojak in deloñ ilo Enen Kallimur eo, Moses ear eowore ir ñan kamolol kin nan in kibel eo an Anij. Ear jiroñ ir: “Bwe e jab jitokjen men in ibemi; bwe ej ami mour.” (Dut. 32:45-47) Jejjab kamolol ke bwe mour ko ad raorõk ñan Jehovah bwe ej wõnmanlok im tel kij ikijen Nan eo an ejej uan an aorõk? Kin men in jej kijororetok “Nan in Kanan eo an Anij” District Convention eo ilo alliñ in lal im ta eo Jehovah ear keboj ñan kij.
2 Ejelok bere bwe ededelok am kõmman karõk ko ñan bed ilo aolep program ko ilo convention eo kinke kwoj tõmak bwe Jehovah ej kõtmene am bed. Kwon liki bwe ej lo jibadbad ko im men in katok ko ri karejar ro an rar kõmmani ñan bed, im ej kememej ilo kamolol. (Hib. 6:10) Ilo ad bed ilo convention eo jen al in kabellok eo ñan jar in kajemlok eo, jej kalikar ñan Jehovah bwe jej kaorõk nan ko an ñan kij. (Dut. 4:10) Jej bareinwõt kwalok ad kamolol kin jerbal eo ro jeid im jatid rar kõmmani ñan keboj convention eo. Kamelele eo im nan in kakememej kein tok kar litoki bwe kwon maroñ bõk elap lañliñ kin ekan ko lor jitõb im kamao in Christian ilo convention eo.
Mokta Jen Convention eo
3 Ro kwoj katak Bible ibbeir im ro jet rej itoklimo rej aikwij ke jibañ ñan kõmman karõk ko ñan bed ilo convention eo? Men ko rej lo im roñjake ñe rej bed remaroñ kamakit ir ñan erom ri kabuñ ro an Jehovah. (1 Kor. 14:25) Elder ro rej aikwij jelã kin wõn ro rej aikwij jibañ ikijen jikin bed im ial in ito-itak, elaptata ritto ro uan congregation eo, im lolorjake ilo yokwe aikwij ko air.—Gal. 6:10.
4 Kinke kar kajutak First Aid Department ilo convention eo ñan jerbale men ko wõt im rej jidimkij air walok, kimij rejañ yuk bwe kwon make bõktok uno in metak, korak ko, inhaler ko, kein jibañ digestion ko, im men ko eierlok wõt ñan convention eo elañe kwoj lemnak enaj juõn men in aikwij.
5 Ñan kejbãrok ien im kõmman bwe en lamwan, Society eo ear kajitõk ibbed aolep ñan bõktok mõñã ko kijed make ñan convention eo kajjojo ran. Enañin aolep brother ro rar lor nan in tel in im rar lo bwe ilo ien mõñã in raelep, remaroñ jijet ibben family ko air im mõñã men ko rar bõktoki ñan ran eo. Elõñ rar ba bwe ien in ñan kakije im kamao ibben ro jeiir im jatiir kar juõn ien ekalañliñ. Men in ej aikwij am wia lok iman mõñã im den in idak ko im likiti ilo juõn cooler jidikdik me emaroñ deloñ iumin jea eo am. Kimij rejañ bwe aolep ro rej kwelok ren lor nan in kibel in. Ro rej itoklimo im rej itok ibbam tok ñan convention eo ren bareinwõt bõktok kijeir make. Ejjab melim ñan bõktok nien glass im den in kadõk ñan jikin convention eo.
6 Kwonaj baptais ke ilo district convention eo? Renaj kejbãrok jet jea ko ñan ro renaj baptais, im ri lale kejam ro renaj jitõñ yuk ñan jikin in. Ñe emaroñ, joij im jijet ilo jikin in mokta jen ej jino program eo. Bõktok Bible eo am, book in al, towel, im juõn nuknuk in tutu ekkar. Cutoff ko (trousers [jeraujij] ko emwij mwijit neir), T-shirt ko elõñ jeje ion, im nuknuk ko eierlok wõt rejõkkar ñan ien in. Elder ro rej eliji kajitõk ko ilo Our Ministry book eo ibben ro rekõnan baptais ren lale bwe kajjojo ren melele kin point kein. Kinke baptais ej juõn kakõlle kin wujleplok eo an juõn armij make ñan Jehovah Anij, enaj jõkkar an ro renaj baptais ñan jibwe pein don ñe rej baptaisi ir.
Ilo Ien Convention eo
7 Renaj kabellok kejam ko ilo jikin convention eo ilo 8:00 a.m. kajjojo ran. Kwomaroñ kejbãrok jea ko ñan ro uan family eo am ak ñan ro rej iuwe ibbam. Renaj kajenolok juõn jikin ekkar im jejjet ñan brother im sister ro reritto, im ro rej handicap.
8 Kwomaroñ kajerbal camera ko, camcorder ko, im audiocassette recorder ko ilo convention eo. Bõtab, jikin eo kwoj likiti na ie im wãwen eo kwoj kajerbali ren jab binej ial in etetal eo, binej mejen armij, ak kamad armij jen air roñjake program eo. Rej aikwij make jerbal—melelen, kwon jab kõlaake ilo electrical ak sound system ko.
9 Kwoj mõnõnõ ke in jibañ karreo jikin convention eo ilo ran ko kajjojo? Ak kwomaroñ ke jerbal ilo juõn ian department ko ilo convention eo? Elañe kwomaroñ jibañ, joij im itok ñan Volunteer Service Department eo ilo convention eo. Ajiri ro ilalin 16 yiõ dettan remaroñ jerbal ibben jemen ak jinen ak bar juõn armij eritto. Emol, aolep remaroñ bõk kunair in karreo jikin convention eo ilo air bõk im jolok jabdewõt kobej ilo nien kobej ko.
10 Emwij ad bõk nan in tel ko remõn ikijen nuknuk im baotok ko rekkar ilo convention eo. Ñan wanjoñok: Jaar bõk nan in tel ko ikijen men in ilo Ad Jerbal Ñan Ailiñ Eo peij eo iloa, ewõr wanjoñok ko im pija ko ilo book ko ad, im elaptata an aorõk, ewõr ibbed ta eo Jehovah ej ba ilo Bible eo. (Rom 12:2; 1 Tim. 2:9, 10) Armij rej jelã kajjid im rej jelã etke jaar kweloktok ilo jikin kwelok eo air. Kin men in, nuknuk ko ad im baotokid emaroñ juõn wãwen ekajur ñan kwalok nan. Jarlepju in armij ro an Jehovah rej likit juõn joñok emõn ikijen men in. Ak, jet ien, jej lo jitõb in lal ilo nuknuk ko im baotokin jet ian ro rej bed ilo convention ko ad. Jabdewõt kain nuknuk ko elap buruen, mãni, ak kadu rej kariap nan ko an armij eo bwe ej juõn armij ekajur ilo jitõb. Juõn baotok ekkar, erreo, im karbõb elaptata an emejaja. Kin men in, ro bõran family eo ren lale ta eo ro uan family eo air renaj kõnake. Men in ej bareinwõt jerbal ñe jejjab bed ilo jikin convention eo. Ad kõnak badge ko ad mokta im elikin program eo ej ej bareinwõt kalikar bwe jej mõttan Jehovah im armij ro an rerreo.—Keidi Mark 8:38.
11 Kar kakõrmole King eo emeletlet Solomon ñan lo bwe “E lukjõk men in bwebwe ilo buruen juõn ajiri” im “a ñe likit ajiri mõke ian, ej kajok jinen.” (Ken. 22:15; 29:15) Kar lo ilo convention ko mokta bwe jet Ri Kennan jodikdik ro me ejelok armij ear lale ir rar kokkure ainemõn an ro jeid im jatid rar kajeoñ in bõk tokjen jen program eo. Kinke ro jemen im jinen rej aikwij uak ñan Jehovah kin mwilin ro nejiir, juõn jinen ak jemen emaroñ liki bwe ro nejin renaj kwalok mwiliir emõn im renaj roñjake nan in kibel ko an Jehovah elañe rej jijet wõt ibbeir.
12 Ej kõketak kij in lo ro jeid im jatid rej jeje note ko ilo ien kwelok ko. Note ko rekadu renaj jibañ yuk ñan kalmenlokjen im kememej point ko relap. Ilo am elij note ko am tokelik ibben ro uan family eo am ak ibben ro mõttam enaj kamaroñ yuk ñan kalmenlokjen kin point ko relap ilo convention eo im jab melokloki.
13 Armij ro an Jehovah ien otemjej emmol air jabawõt ñan kowõnmanlok men ko rej theocratic. (Ex. 36:5-7; 2 Kron. 31:10; Rom 15:26, 27) Jabawõt ko am ñan jerbal eo ibelakin lal rej kajerbali ñan kabwe expenses ko kin jikin ko convention ko rej walok ie. Elañe kwoj kõmman jabawõt eo am ikijen kajerbal juõn check, joij im kõmman bwe en payable ñan “Watchtower.”
14 Einwõt kar je ilo Amos 3:7 (New World Translation), Jehovah ear ba bwe “ejamin kõmman juõn men mae ien emwij an kwalok karõk eo an ñan ri kanan ro karejaran.” Einwõt “Eo ej kwalok kin men in ittino ko,” Jehovah ear kõmman bwe ren je elõñ buki kanan ko ilo Bible me ear jimwe im wãppen air jejjet kitieir. (Dan. 2:28, 47, NW) Kallimur ko relap rej bojak in jejjet kitieir. Convention eo ilo 1999 etan “Nan in Kanan eo an Anij” District Convention ko naj kakajurlok tõmak eo am ilo kallimur ko an Anij. Lukkun roñjake nan eo an Jehovah ñan kwe. Jerbale men eo kwonaj loe im roñjake—ilo jerbal in kwalok nan, ilo congregation eo, im ilo mour eo am make. Kimij jar bwe Jehovah enaj kajerammõn aolep karõk ko am ñan bed ilo aolep kwelok ko ilo kwojkwoj in kin men ko lor jitõb!
[Naan ko ilo peij 3]
Karõk ñan bed ilo aolep kwelok ko an convention eo!