1998 “Mour Ekkar ñan Wãwen Anij” District Convention ko
1 Jabõn Kennan 10:29 ej kakememej kij bwe “ial an Jeova e juõn me e kajur.” District convention eo ilo yiõ in ewõr juõn unin tel elap an ekkar—“Mour Ekkar ñan Wãwen Anij”! Ewi wãwen air naj ejaake unin tel in? Kij aolep jej reimanlok ilo kijoror ñan ta eo rar keboji. Convention program eo enaj kwalok report ko kin ewi wãwen Jehovah ej kajerammõn jerbal eo ilo elõñ territory ko.
2 Ewõr Tokjen ñan Bed ilo Kwelok eo: Elõñ ian ro jeid im jatid ilo Africa rar lo abañ ko kin an wõr tarinae im keojaljal ilo jet mõttan ko ilo ene eo. Rej watõk convention ko an armij ro an Jehovah einwõt line in mour eo air. Jet rej aikwij etetal ilo juõn ial eaetok ñan bed ilo juõn convention, ak rejjab lemnak in jako jen juõn. Juõn brother 73-yiõ rittan ilo Democratic Republic of Congo (Zaire mokta) ear etetal enañin 280 mile ko ñan an bed ilo juõn convention. Ear tõkeãklok ijo 16 ran ko elikin an ijjino ial eo an, ear ebbõj neen, ak ear mõnõnõ in bed ijo. Elikin convention eo, ilo an mõnõnõ im kajurlok ilo jitõb, ear etetal im jeblak lok ñan mweo imõn. Men in kar manit eo an iumin elõñ yiõ ko!
3 Ilo Mozambique juõn district overseer im lio ibben rar tallõn juõn tol eutiej im kijone juõn ene jemaden ekilep ñan bed ilo juõn kwelok elap. Rar kõmmane trip in 55-mile ko aetokin iumin 45 awa ko. Aolep ro rar bed ilo kwelok eo rar bõk kõketak jen joñok emõn in ri belele rein ruo. Elõñ family ko rar bareinwõt aikwij kõmman jibadbad rot in ñan bed ilo kwelok eo. District overseer eo ear report bwe jet brother ro, ekoba juõn eo ear 60 yiõ rittan, rar aikwij etetal iumin 130 mile ko!
4 Kwo nañin ke kõmman karõk ko ñan am bed ilo convention eo ilo yiõ in? Bõlen kwojjab aikwij etetal ilo juõn ial eaetok, ak kwoj aikwij kõmman jet jibadbad ko bwe kwe im family eo am maroñ bed ilo ien eo. Karõk ñan bed ilo aolepen program eo jen jinoin ñan jemlokin. Elõñ ri katak Bible ro rej wõnmanlok ñan air wujleplok air mour. Bed eo air ilo convention eo naj jibañ ir ñan kõmman bebe eo ejimwe. Kwar kir ke ri katak Bible ro am im ro jet rej itoklimo ñan bed ibbam ilo kwelok eo?
5 Ñe jej itoitak ñan im jen jikin convention eo, jej aikwij kabukõt ien ko remõn ñan kwalok nan ilo jabdewõt ien emõn tok. Ro ri lale gas station ko, ri lale mõn wia, buwae ro ilo restaurant ko, im ro jet remaroñ itoklimo ilo ennan in Ailiñ eo. Kwomaroñ kebojak kin men in ilo am bõk ibbam tract ko, magazine ko rekãl, brochure ko, ak book ko jet bwe kwon maroñ kortokjen ien ko remõn ñan kwalok nan ñan armij ro me jejjab maroñ kar jibadõk ir kin news eo emõn.—2 Tim. 3:17.
6 “Lale Wãwen Am Roñjake”: Ri kwelok ro ilo convention eo renaj meletlet ñan bokake nan in kakabilek eo ilo Luke 8:18. Rej rejañ aolep ñan bõktok juõn Bible im bareinwõt juõn book in al im juõn notebook. Lukkun roñjake kin point ko relap jen kajjojo katak, im kõmman note ko rekadu. Kajitõkin yuk make kin ewi wãwen kwomaroñ jerbale katak eo. Kajjojo boñin ran in convention eo, mokta jen kwoj kiki, etke kwojjab elij note ko am im etale ewi ebak am lore ial in mour eo an Jehovah.—Jabõn Kennan 4:10-13.
7 Kar lo bwe ilo ien kwelok ko jet rej jijet ak etetal inabõj ñe rej aikwij bed iloan auditorium eo im roñjake. Jet ri karejar ro an Jehovah ilo ien ko remotlok rar kõmman bwid ko relap kinke rar jab kejbãrok im roñjake nan in kakememej ko an Jehovah. Emol jekõnan bõprae ad kõmman juõn bwid einwõt in.—2 Kñ. 17:13-15.
8 “Dri korijer e tiljek im meletlet” ear keboje nan in kibel ko kij aolep jej aikwiji. Elap an aorõk bwe “jen kalaplok ar kejbãrok men kein j’ar roñjaki” ilo kajjojo katak ko ilo program in convention eo. Juõn men me elap an kaitoktoklimoen kij naj walok ilo kajjojo ran, ekoba kamelele ko me renaj jelet ilo juõn wãwen emõn ial in mour eo ad ilo ran ko renaj itok. Ilo ad lukkun roñjake im kortokjen men in letok ko ilo jitõb Jehovah ej letok ñan kij ilo convention eo, kejatdikdik eo ad enaj bin, bwe jen jab “elãlok jen” wãwen mour eo an Anij.—Mat. 24:45; Hib. 2:1.
9 Nuknuk ko me Rej Kautiej Jehovah: Ilo ien kein renana, jej aikwij lukkun kejbãrok bwe jitõb an lal in en jab jelet kij. (1 Kor. 2:12) Nuknuk ko ad im baotokid rej aikwij karbõb im kwalok ad kautiej Anij eo jej kabuñ ñan e. (1 Tim. 2:9, 10) Nuknuk ko elap wõnair rejjab juõn men in aikwij elañe jekõnan bed ibwiljin ro rej “kaibujuij katak eo an Anij, Dri Lomorer.” (Titus 2:10) Jab kajettokjen nan eo ekajur jemaroñ kwalok kake ñe jej nuknuk ilo juõn wãwen ej kaibujuij Jehovah.
10 Mwij ko me Rej Nebar Jehovah: Jej jelã bwe mwilin Christian eo ad emaroñ jelet wãwen an ro jet lemnak kin kabuñ eo emol. Kin men in, ien otemjej jej aikwij kõmman bwe mwilid en tellokin news eo emõn im ej bõktok nebar ñõn Jehovah.—Pil. 1:27.
11 Yiõ eo lok, rej kab kõmman juõn district convention ilo tueañ in Angola. Ilo ran eo kein karuo in convention eo, ruo policemen ilo bukwon eo kar jilkinlok ir ñan jikin kwelok eo ñan kõmman bwe en jab walok jabdewõt abañ. Rar bed aolepen ran eo. Ilo tujemlokin ran eo, rar kwalok air bwilõñ kin ta eo rar roñjake im kin mwil emõn ko rar loi. Juõn iair ear ba: “Etke rar jilkintok kim ñan ijin? Jej jelã bwe Ri Kennan ro an Jehovah rej kejbãrok mwiliir ilo kuktok ko air.”
12 Ewi wãwen mwilid ilo convention ko ilo yiõ in enaj jelet ro ej kab juõn allen air bed ilo kwelok ko? Renaj kile ke jitõb in jerbal ibben don ej alikar ñe jej mõnõnõ in lelok kij make ñan jibañ jerbal? Renaj bwilõñ ke kin an erreo jikin ko ibelakid im ilo air lo men in mokta jen rej ilok jen jikin kwelok eo, im kin kij im ro nejid jej bõk kobij ko rar bed turin jikin ko jaar jijet ie? Renaj lo mwilid emõn ke ñe jej itoitak ñan im jen jikin convention eo? Renaj lo ke bwe einwõt ro jemen im jinen, ien otemjej jej lolorjake ro nejid? Jen kõmman bwe jen kabwilõñ aolep ro rej kalimjek kij.
13 Kabwe Expenses ko an Convention eo: Society eo ien otemjej ear bõk manit eo “ejelok wõnãn jea ko, ejelok leto-letak plate in jabawõt” ilo convention ko. Inem, ewi wãwen naj kabwe expenses ko an convention eo? Ikijen jabawõt ko rejoij an ro rej bed ilo kwelok eo. Jej jelã bwe kwonaj kwalok juõn jitõb in joij im emmol einwõt ro ri karejaran Anij ilo ien ko remotlok rar kwaloke. (2 Kor. 8:7) Elap air kejbãrok bwe jabawõt ko rej bõki, jeje ilo record ko, im kajerbali ilo wãwen eo kar karõke kake.
14 Jikin Jijet ko: Nan in jiroñ ko me rar kwaloki iumin elõñ yiõ ko rej jerbal wõt, eñin, KWOMAROÑ KEJBÃROK JEA KO ÑAN RO UAN FAMILY EO AM WÕT IM JABDEWÕT ARMIJ REJ IUWE ILO WA EO WAAM. Men in enaj kautiejlok mejatoto in yokwe rej kwaloke ilo convention ko. Ilo enañin aolep jikin ko, jet jikin jijet ko ebidodolok air deloñ ie jen ko jet. Joij im kwalok am lemnak kin ro jet, im lelok jikin jijet kein ñan ro reritto im ro jet me wãwen ko ibbeir ej aikwiji air bed ijo. Kememej bwe yokwe ‘e jab kabukot men ko an.’—1 Kor. 13:4, 5; Pil. 2:4.
15 Volunteer (mõnõnõ in lelok yuk make ñan jerbal) Service: Kwomaroñ ke karõk jet ien ko ilo convention eo ñan jibañ juõn ian department ko? Karejar ñan ro jeõm im jatõm, meñe kin jet wõt awa ko, enaj lap an jibañ im naj bõktok elap mõnõnõ ñan kwe make. Ajiri ro iumin 16 yiõ rittan remaroñ bareinwõt jibañ ilo air jerbal ibben jemeir ak jineir ak bar juõn armij ebwe an ritto.
16 Camera ko, Camcorder ko, im Audiocassette Recorder ko: Camera ko im equipment ko ñan kanne tape remaroñ kajerbali ilo convention ko. Bõtab, am kajerbali en jab kamad ro jet. Am etetal im kõmman pija ko ilo ien katak ko enaj kamad ro jet rej kate ir ñan air roñjake katak eo. Ejelok kein jerbal ko ñan kanne tape ren kõlaake ilo electrical ak sound system ko, im equipment ko air ren jab binej ial eo, jikin etetal eo, ak an ro jet reimanlok.
17 Mõñã ko ilo Convention eo: Kajjojo armij ej kwelok en make bõktok kijen jen an etal jen jikin kwelok eo ilo ien eo ekadu ilo elikin raelep ñan wia kijen. Juõn mõñã ejjab lap me emaroñ kakajurlok enbwinin im ebidodo bõkto-bõktake enaj bwe. May 1995 Ad Jerbal Ñõn Ailiñ Eo peij eo iloa, paragraph 26, ej letok jet lemnak ko kin ta eo kwomaroñ bõktok. Nien glass ko im den in kadõk emo am bõktoki ñan jikin kwelok eo. Food cooler ko (nien mõñã ko) ej aikwij bwe an dik ñõn deloñ iumin jea eo am. Jet ri kwelok ro kar lo air mõñã im idak ilo ien kwelok eo. Men in ej kwalok air jab kautiej ien eo.
18 Elap ad mõnõnõ bwe ejjabto jen kiõ 1998 “Mour Ekkar ñan Wãwen Anij” Convention eo enaj ijjino! Kwar kadedelok ke karõk ko am ñan am bed ie? Ejelok bere bwe kwonaj bõk kakajur ilo jitõb, im bin wõt ilo bebe eo am ñan jibadõk wõt wãwen mour eo an Anij ñan jerammõn eo am ej indio.