Wãween an Yokwe Jipañ Kõj ñan Anjo̦ Ioon Mijak

1. Ta ko me ekkã an armej ro mijaki?

LÕMNAK kõn wãween kein me jet iaan ro jeid im jatid rar iiooni. Nestor im kõrã eo pãleen, María, rar kõn̦aan jerbal ilo juon jikin me el̦ap aer aikuj ri-kwal̦o̦k naan ie.b Bõtab bwe ren maroñ kõm̦m̦ane men in, rar aikuj in katak ñan kadikl̦o̦k joñan jããn ko rej julo̦ki. Ijoke rar mijak ñe men in ekõm̦m̦an bwe ren jab lukkuun m̦õn̦õn̦õ. Ke Biniam ear erom juon iaan Ri-Kõnnaan ro an Jeova ilo juon aelõñ me rej jum̦aik jerbal eo ad, ear kile bwe ãinwõt juon iaan armej ro an Anij, ro jet renaaj jum̦aiki im kaeñtaane. Men in ear kõm̦m̦an bwe en mijak. Bõtab men eo ear l̦apl̦o̦k an kar mijake ej wãween an naaj baam̦le eo an em̦m̦akũt ñe renaaj jel̦ã kõn kabuñ eo an ekããl. Kar lo bwe ewõr juon an Valérie nañinmej in kããnjer me ekanooj in nana, im ear pen an lo juon taktõ in m̦wijm̦wij me ej kautiej tõmak eo an ikijjeen bõtõktõk me ej pedped ioon Baibõl̦. Kõn men in, ear mijak ñe enaaj mej.

2. Etke jej aikuj kate kõj ñan anjo̦ ioon men ko jej mijaki?

² Kwõnañin ke kar iioon kain mijak rot kein? Elõñ iaad em̦õj ad iioon kain mijak rot kein. El̦aññe jejjab katak ñan irooj ioon men kein jej mijaki, innem jemaroñ kõm̦m̦ani pepe ko rejjab em̦m̦an me remaroñ jelõt kõtaan eo ad ippãn Jeova. Eñin men eo Setan ekõn̦aan. Ej bar kajjioñ kõjerbal men ko jej mijaki ñan kõm̦m̦an bwe jen jab pokake kien ko an Jeova, ekoba kien eo ñan kwal̦o̦k naan kõn nuuj eo em̦m̦an. (Rev. 12:17) Setan elukkuun nana, elãj, im ekajoor. Meñe ãindein, ak kwõmaroñ kõjparok kwe jãne. Ewi wãween?

3. Ta eo enaaj jipañ kõj ñan anjo̦ ioon men ko jej mijaki?

³ Ñe jej lõke bwe Jeova ej yokwe kõj—bwe ej pãd ippãd—innem jeban mijak Setan. (Sam 118:6, UBS) Ñan waanjoñak, ri-jeje eo an Sam 118 ear iiooni wãween ko me relukkuun pen. Elukkuun lõñ ro rar kõjdate, im jet iaaer rar ri-utiej ro (eoon 9, 10). Ewõr iien ear iiooni menin ijjiped ko (eoon 13). Im Jeova ear lukkuun kajeik e (eoon 18). Meñe ãindein, ak ri-jeje sam in ear al im ba: “Ijjãmin mijak.” Ta eo ear kõm̦m̦an bwe en jab mijak? Ear jel̦ã bwe eo Jemãn ilañ ear lukkuun l̦ap an yokwe e meñe ear kajeik e. Ri-jeje sam eo ear lõke bwe jekdo̦o̦n ta wãween eo ej iioone, ak aolep iien Anij eo an me el̦ap yokwe ippãn epojakin jipañe.​—Sam 118:29, UBS.

4. Ta men ko jej mijaki me jemaroñ anjo̦ ioer el̦aññe jej tõmak bwe Anij ej yokwe kõj?

⁴ Jej aikuj lukkuun tõmak bwe Jeova ej yokwe kõj kajjojo. Ad tõmake men in enaaj jipañ kõj ñan anjo̦ ioon men kein jilu me ekkã ad mijaki: (1) mijak ñe jejjab maroñ kabwe aikuj ko an baam̦le eo ad, (2) mijak armej, im (3) mijak mej. Ro me kar kwal̦o̦k kake er ilo pãrokõrããp eo jinointata rar maroñ anjo̦ ioon men ko rar mijaki kõnke rar lukkuun tõmak bwe Anij ej yokwe er.

MIJAK ÑE JEJJAB MAROÑ KABWE AIKUJ KO AN BAAM̦LE EO AD

5. Ta wãween ko remaroñ kõm̦m̦an bwe juon bõran baam̦le en lukkuun inepata? (Lale pija eo ilo kilin bok in.)

⁵ Juon bõran baam̦le me ej juon Kũrjin ej lukkuun kaorõk eddo eo an ñan lale im kabwe aikuj ko an baam̦le eo an. (1 Tim. 5:8) El̦aññe kwõj juon bõran baam̦le, bõlen ilo tõre in me ej wal̦o̦k nañinmej eo ejelõt aolepen lal̦ in, kwõmaroñ kar inepata bwe kwõnaaj luuji jerbal eo am̦. Kwõmaroñ kar inepata im l̦õmn̦ak bwe kwoban maroñ kabwe aikuj ko an baam̦le eo am̦ ikijjeen m̦õñã im jikin jokwe. Kwõmaroñ kar bar mijak bwe ñe kwõnaaj luuji jerbal eo am̦, kwoban bar lo juon am̦ jerbal. Ak bõlen ãinwõt Nestor im María, ro me kar kwal̦o̦k kake er m̦oktal̦o̦k, kwõmaroñ kar mijak in kõm̦m̦an ukoktak ilo jikin jerbal eo am̦ im mour ilo juon wãween el̦amwaan. Setan ear maroñ kõm̦m̦an bwe elõñ ren bõjrak jãn aer karejar ñan Jeova kõnke rar bõk ejja eñjake kein wõt.

6. Ta eo Setan ej kajjioñ kõm̦m̦an bwe jen tõmake?

⁶ Setan ej kajjioñ kõm̦m̦an bwe jen tõmak bwe Jeova ejjab kea kõn kõj kajjojo im bwe jej make iaad ilo ad kabwe aikuj ko an baam̦le eo ad. Kõn men in, jemaroñ l̦õmn̦ak bwe jej aikuj kõm̦m̦an jabdewõt men jemaroñe ñan dãpij wõt jerbal eo ad kiiõ, jekdo̦o̦n ñe enãj kõm̦m̦an bwe jen kõjekdo̦o̦n naanin kakapilõklõk ko ilo Baibõl̦.

7. Ta eo Jesus ej kakeememej kõj kake me ekaenõm̦m̦an kõj?

⁷ Jesus, eo me el̦apl̦o̦k an jel̦ã kajjien eo Jemãd ilañ jãn jabdewõt, ej kaenõm̦m̦an kõj im ba bwe Anij eo ad “ejel̦ã ta ko [jej] aikuji m̦okta jãn [ad] kajjitõk ippãn.” (Matu 6:8) Im Jesus ejel̦ã bwe Jeova epojakin kabwe aikuj ko ad. Ãinwõt Kũrjin ro, jej uwaan baam̦le eo an Anij. Innem ãinwõt eo me ej Bõran baam̦le eo ad, jemaroñ lõke bwe Jeova enaaj kõm̦m̦ane ejja men eo wõt me ej jiroñ aolep ro rej bõran baam̦le ñan kõm̦m̦ane ilo 1 Timote 5:8.

8. (1) Ta eo enaaj jipañ kõj ñan anjo̦ ioon ad mijak kõn el̦aññe jeban maroñ kabwe aikuj ko an baam̦le eo ad? (Matu 6:31-33) (2) Ãinwõt an wal̦o̦k ilo pija eo, ewi wãween jemaroñ anõke rippãlele ro ruo me rej bõktok kijen juon jeid im jatid kõrã?

⁸ El̦aññe jej tõmak bwe Jeova ej yokwe kõj ekoba baam̦le eo ad, innem eban pen ad tõmak bwe jenaaj bõk men ko jej aikuji. (Riit Matu 6:31-33.) Jeova ekõn̦aan kabwe aikuj ko ad, im ej juon eo el̦ap an yokwe im em̦õn̦õn̦õ in lel̦o̦k! Ke ear kõm̦anm̦an lal̦ in, ear jab letok wõt men ko jej aikuji ñan mour. Ak ilo yokwe, ear bareinwõt kõm̦anm̦an elõñ men ko me jemaroñ m̦õn̦õn̦õ kaki. (Jen. 2:9) Meñe jet iien ewõr ippãd joñan eo wõt me jej aikuji ñan mour, ak jej aikuj keememej bwe unin an wõr ippãd men ko jej aikuji, ej kõnke Jeova ear litoki ñan kõj. (Matu 6:11) Jej aikuj aolep iien keememej bwe jabdewõt m̦weiuk jej kaarmejjeteiki kiiõ, jeban keidi ñan men ko Anij eo ad me el̦ap yokwe ippãn enaaj letok ñan kõj ilo tõre in ekoba ilju im jekl̦aj. Eñin men eo Nestor im María rar kile tokãlik.​—Ais. 65:21, 22.

9. Ta eo kwõmaroñ katak jãn joñak eo an Nestor im María?

⁹ Ear em̦m̦an kõjeiien Nestor im María ilo Colombia. Erro ej ba: “Kõm̦ro ear l̦õmn̦ak kõn am̦ro kadikl̦o̦k joñan men ko m̦weiõm̦ro im kal̦apl̦o̦k ijo kun̦aam̦ro ñan Jeova, bõtab kõm̦ro ear mijak ñe kõm̦ro ban m̦õn̦õn̦õ ñe kõm̦ro mour ilo juon wãween el̦amwaan.” Ta eo ear jipañ erro ñan anjo̦ ioon mijak in aerro? Rar kõl̦mãnl̦o̦kjen̦ kõn wãween ko rellõñ me em̦õj an Jeova kam̦ool bwe ej yokwe erro. Kõn aerro lukkuun tõmak bwe aolep iien Jeova enaaj lale im kabwe aikuj ko aerro, erro ear kam̦õj er jãn jerbal ko aerro me el̦ap on̦ãerro ie. Rar wiakake m̦weo m̦weerro im em̦m̦akũt ñan juon jikin ilo aelõñ eo rej jokwe ie me el̦ap aikuj ri-kwal̦o̦k naan ie. Ewi wãween aerro l̦õmn̦ak kõn kar pepe in aerro? Nestor ej ba: “Em̦õj am̦ro loe bwe elukkuun m̦ool naan ko ilo Matu 6:33. Ejjel̦o̦k juon iien kõm̦ro ear pãd ilo aikuj. Im el̦apl̦o̦k am̦ro m̦õn̦õn̦õ kiiõ.”

MIJAK ARMEJ

10. Etke jemaroñ mel̦el̦e kõn an armej ro maroñ mijak doon?

¹⁰ Jãn iien eo Adam im Iv rar jum̦aik Jeova tok ñan kiiõ, em̦õj an armej ro ko̦kkure im kõjorrããn doon. (Ekl. 8:9) Ñan waanjoñak, ewõr ro rej kõjerbal maroñ ko em̦õj lel̦o̦k ñan er ilo wãween eo ejjab jim̦we, ri-nana ro rej kõm̦m̦ani men ko relãj, ri-jikuul̦ ro rej kõnanaik im kaamijak ri-jikuul̦ ro jet, im joñan jet armej elãj wãween aer kõm̦m̦an ñan baam̦le ko aer make. Kõn men in, jejjab bwilõñ kõn an armej ro maroñ mijak doon! Ewi wãween an Setan kajjioñ kõjerbal mijak in n̦ae kõj?

11-12. Ewi wãween an Setan kõjerbal mijak armej n̦ae kõj?

¹¹ Setan ej kajjioñ kõm̦m̦an bwe jen lukkuun mijak armej ñan joñan eo me ejako ad kwal̦o̦k naan ak kõm̦m̦ani men ko jet me Jeova ej jiroñ kõj ñan kõm̦m̦ani. Ium̦win maroñ eo an Setan, em̦õj an kien ko kõmo̦ jerbal eo ad im jum̦ae im kaeñtaan kõj. (Luk 21:12; Rev. 2:10) Ilo lal̦ in an Setan, elõñ armej rej kajeeded mel̦el̦e ko rejjab jim̦we im reriab kõn Ri-Kõnnaan ro an Jeova. Ro me rej tõmaki riab kein remaroñ kajjirere kake kõj, im joñan remaroñ bar kõjorrããn ak m̦an kõj. (Matu 10:36) Jej ke bwilõñ kake kõl kein an Setan? Jejjab ñan jidik. Ilo m̦ool, em̦õj an kar jino kõjerbale kõl kein ilo tõre ko an rijjilõk ro.​—Jrb. 5:27, 28, 40.

¹² Setan ej kõm̦m̦an bwe jen mijak ñe kien ko renaaj jum̦aik kõj, ijoke ejjab men eo dein ej kõjerbale. Ñan jet, el̦apl̦o̦k aer mijak wãween an naaj baam̦le eo aer l̦õmn̦ak kõn m̦ool eo jãn aer mijak an ro jet m̦an er. Elukkuun l̦ap aer yokwe baam̦le ko aer im rekõn̦aan bwe rein ren jel̦ã kajjien im yokwe Jeova. El̦ap an kõmetak er ñe rej roñ an baam̦le eo aer kõnono ilo wãween eo ejjab kwal̦o̦k kautiej kõn Anij eo em̦ool im ri-karejar ro an. Bõtab ewõr iien ko me ro ilo baam̦le ko aer me rar jum̦ae ilo jinoin, rej oktak im del̦o̦ñtok ñan m̦ool eo. Ijoke, ta el̦aññe ro uwaan baam̦le eo ad rej jol̦o̦k kõj jãn ad m̦õttan baam̦le eo? Enaaj ewi wãween ad em̦m̦akũt?

13. Ñe jej lukkuun tõmak bwe Anij ej yokwe kõj, ewi wãween an men in maroñ jipañ kõj ñan kijenmej wõt ñe baam̦le eo ad ej kõjekdo̦o̦n kõj? (Sam 27:10)

¹³ Jemaroñ bõk kaenõm̦m̦an jãn naan kein rekõketak ilo Sam 27:10. (Riit.) Ñe jej keememej ewi joñan an Jeova yokwe kõj, jeban inepata kõn ta eo enaaj wal̦o̦k, jekdo̦o̦n ñe baam̦le eo ad enaaj kõjekdo̦o̦n kõj. Im jej lõke bwe enaaj kõjeraam̦m̦an kõj kõn ad kijenmej wõt. Jeova enaaj kabwe aikuj ko ad, jipañ kõj bwe jen ineem̦m̦an im m̦õn̦õn̦õ, im pãd epaake wõt e; emaroñ kõm̦m̦ane men in ilo juon wãween em̦m̦anl̦o̦k jãn jabdewõt armej! Eñin men eo Biniam, eo me kar kwal̦o̦k kake m̦oktal̦o̦k, ear kile.

14. Ta eo kwõmaroñ katak jãn joñak eo an Biniam?

¹⁴ Biniam ear erom juon iaan Ri-Kõnnaan ro an Jeova meñe ear jel̦ã bwe ro jet remaroñ naaj lukkuun jum̦aiki im kaeñtaane. L̦õmn̦ak kõn wãween an Biniam maroñ kar anjo̦ ioon mijak armej jãn wõt an jel̦ã bwe Jeova ej yokwe e. Ej ba: “Ke ro jet rar jum̦aik im kaeñtaan eõ, ear lukkuun nanal̦o̦k jãn joñan eo iar kõtmãne. Bõtab men eo ear l̦apl̦o̦k aõ mijake jãn an kien eo kaeñtaan eõ, ej an baam̦le eo aõ naaj jum̦aik eõ. Iar mijak bwe pepe eo aõ ñan erom juon iaan Ri-Kõnnaan ro an Jeova enaaj kar kabũrom̦õj jema, eo me ejjab juon rũttõmak, im kõm̦m̦an bwe en jako an baam̦le eo aõ kautiej eõ.” Bõtab, Biniam ear lukkuun tõmak bwe aolep iien Jeova ej lale im kõjparok ro me rej yokwe E. Biniam ej kõmel̦el̦e im ba: “Iar kõl̦mãnl̦o̦kjen̦ kõn wãween an kar Jeova jipañ ro jet ñan kijenmej wõt ium̦win aer jab maroñ kabwe aikuj ko an baam̦le, iioon kalijekl̦o̦k, im an kumi in armej ro kõjorrããn im lãj ñan er. Iar jel̦ã bwe ñe inaaj eddãp wõt ñan Jeova, enaaj kõjeraam̦m̦an eõ. Ke kar kalbuuj eõ elõñ alen im bareinwõt kaeñtaan eõ, iar lo kõn meja bwe aolep iien Jeova ej jipañ kõj ilo iien ko jej aikuji ñe jej dãpij wõt ad tiljek ñane.” Jeova ear erom juon Jemãn eo em̦ool ñan Biniam, im armej ro An rar kwal̦o̦k aer m̦oolin baam̦le ñane.

MIJAK MEJ

15. Etke eitok wõt bwe jen mijak mej?

¹⁵ Baibõl̦ ej kwal̦o̦k bwe mej ej juon ri-kõjdat. (1 Kor. 15:25, 26) Jemaroñ eñjake ad inepata ñe jej l̦õmn̦ak kõn mej, el̦aptata ñe kõj ak ro rejitõnbõro ippãd jelukkuun nañinmej. Etke jej mijak mej? Kõnke ke Jeova ear kõm̦anm̦an kõj, ear kõm̦m̦an bwe en wõr ippãd kõn̦aan eo ñan m̦õn̦õn̦õ kõn mour ñan indeeo. (Ekl. 3:11) An jim̦we wãween ad l̦õmn̦ak kõn mej emaroñ jipañ kõj ñan kõjparok mour ko ad. Ñan waanjoñak, emaroñ kõm̦akũt kõj ñan kõm̦m̦ani pepe ko rem̦m̦an kõn m̦õñã ko jej kañi im joñan ad ekjerjaij, ñan bõk jipañ jãn taktõ ro ak idaak uno ko ñe emenin aikuj, im ñan kõjparok kõj jãn ad likũt mour ko ad ilo kauwõtata.

16. Ewi wãween an Setan kajjioñ kõjerbal ad mijak mej n̦ae kõj?

¹⁶ Setan ejel̦ã bwe jej kaorõk mour ko ad. Bõtab, ej ba bwe jenaaj kaarmejjeteik aolep men ko ewõr ippãd—ekoba jem̦jerã eo ad ippãn Jeova—bwe jen mour wõt. (Job 2:4, 5, UBS) Elukkuun bõd Setan! Meñe ãindein, ak kõnke “ewõr an maroñ ioon mej,” Setan ej kajjioñ kõjerbal mijak in n̦ae kõj ñan kõm̦m̦an bwe jen el̦l̦o̦k jãn Jeova. (Hib. 2:14, 15) Jet iien, ewõr ro me Setan ej kõm̦akũt er ñan kaamijak kõj im ba bwe renaaj m̦an kõj ñe jejjab jol̦o̦k ad tiljek ñan Jeova. Ak jet iien, Setan emaroñ lo bwe ewõr juon ad nañinmej me elukkuun kauwõtata im emaroñ kõjerbal men in ñan kõm̦m̦an bwe jen jab pokake Jeova. Taktõ ro im ro uwaan baam̦le eo ad me rejjab rũttõmak remaroñ kajjioñ iuun kõj ñan bõk bõtõktõk, men in me enaaj kõm̦m̦an bwe jen ko̦kkure kien eo an Anij. Ak juon emaroñ rõjañ kõj ñan bõk juon wãween kõm̦adm̦õd me ej n̦ae naanin kakapilõklõk ko ilo Baibõl̦.

17. Ekkejell̦o̦k ippãn Rom 8:37-39, etke jejjab aikuj in mijak mej?

¹⁷ Meñe jejjab kõn̦aan mej, bõtab ñe men in enaaj wal̦o̦k ñan kõj, jejel̦ã bwe eban bõjrak an Jeova yokwe kõj. (Riit Rom 8:37-39.) Ñe ro m̦õttan Jeova rej jako ilo mej, ej likũt er ilo ememej eo an, im ej ãinwõt ñe rej mour wõt. (Luk 20:37, 38) Elukkuun kõn̦aan kõjerkakpejeik er bwe ren bar mour. (Job 14:15) Jeova ear kõl̦l̦ã juon on̦ããn el̦ap bwe jen maroñ “bõk mour indeeo.” (Jon 3:16) Jejel̦ã ewi joñan an Jeova lukkuun yokwe kõj im kea kõn kõj. Innem ijello̦kun ad el̦l̦o̦k jãn Jeova ñe jej nañinmej ak jemaroñ mej, jej reilo̦k ñane bwe en kaenõm̦m̦an kõj, letok mãlõtlõt, im kõkajoor kõj. Eñin men eo Valérie im l̦eo pãleen rar kõm̦m̦ane.​—Sam 41:3.

18. Ta eo kwõmaroñ katak jãn joñak eo an Valérie?

¹⁸ Ke ear 35 an Valérie iiõ, kar lo bwe ewõr juon an nañinmej in kããnjer me ejeja an armej bõke im ekanooj in nana. L̦õmn̦ak kõn wãween an yokwe kar jipañe ñan anjo̦ ioon an mijak mej. Ej ba: “Ke iar jel̦ã bwe ewõr aõ nañinmej in kããnjer, men in ear lukkuun kailbõk kõm̦ro l̦eo pãleõ. Iar aikuj m̦wijm̦wij bwe in maroñ mour wõt. Iar kajjioñ bõk jipañ jãn elõñ taktõ ro me rej taktõ in m̦wijm̦wij, ak rar aolep m̦akoko in m̦wijm̦wij el̦aññe rejjab maroñ kõjerbal bõtõktõk. Iar mijak, ak kõn wõt kien eo an Anij, iar m̦akoko in bõk bõtõktõk ñan jidik! Ilo aolepen mour e aõ, em̦õj an Jeova kwal̦o̦k ñan eõ ewi joñan an lukkuun yokwe eõ. Kiiõ, ear pel̦l̦o̦k juon iien ñan aõ kwal̦o̦k aõ yokwe e. Kajjojo iien iar bõk juon nuuj ejjab em̦m̦an, ear l̦apl̦o̦k kõn̦aan eo aõ ñan kabuñbũruon Jeova im jab kõtl̦o̦k bwe Setan en anjo̦ ioõ. Ejjabto tokãlik, iar maroñ m̦wijm̦wij ilo aõ jab bõk bõtõktõk. Meñe ij wõnm̦aanl̦o̦k wõt im eñtaan kõn nañinmej ko aõ, ak aolep iien Jeova ej letok men ko kõm̦ro ej aikuji. Ñan waanjoñak, ilo kar kweilo̦k eo an eklejia ilo wiikããn eo m̦okta jãn aõ kar jel̦ã kõn nañinmej eo aõ, kõmar etale katak eo etan ‘Peran Wõt Ñe Kwõj Iioon Apañ ko ilo Raan Kein.’c Katak in ear lukkuun l̦ap an kaenõm̦m̦an kõm̦ro. Elõñ alen am̦ro kar riiti katak in. Katak rot kein im am̦ro wõnm̦aanl̦o̦k wõt im kõm̦m̦ani men ko me rej kõkajoor jem̦jerã eo am ippãn Jeova, rej jipañ kõm̦ro l̦eo ippa ñan ineem̦m̦an wõt im ñan pel̦an wõt im kõm̦m̦ani pepe ko rem̦m̦an.”

ANJO̦ IOON MEN KO JEJ MIJAKI

19. Ta eo me m̦õttan jidik enaaj wal̦o̦k?

¹⁹ Kõn jipañ eo an Jeova, Kũrjin ro ipel̦aakin lal̦ in rar maroñ anjo̦ ioon wãween ko reppen rar iiooni im lo tõprak ilo aer jum̦aik Tepil̦ eo. (1 Pit. 5:8, 9) Kwõmaroñ bar ãindein. M̦õttan jidik, Jeova enaaj kappeik Jesus im ro me renaaj tõl ippãn ñan “ko̦kkure jerbal ko an Tepil̦ eo.” (1 Jon 3:8) Ãlikin iien in, armej ro an Anij me rej karejar ñane ilo lal̦ in rejjãmin “mijak; im . . . lõl̦ño̦ñ.” (Ais. 54:14; Mai. 4:4) Bõtab m̦ae iien en̦, jej aikuj kate kõj ñan anjo̦ ioon men ko jej mijaki.

20. Ta eo enaaj jipañ kõj ñan anjo̦ ioon men ko jej mijaki?

²⁰ Jej aikuj wõnm̦aanl̦o̦k wõt im kõkajoorl̦o̦k ad lõke bwe Jeova ej yokwe im kõjparok ri-karejar ro an. Men eo emaroñ jipañ kõj ñan kõm̦m̦ane men in ej ñan kõl̦mãnl̦o̦kjen̦ im kõnnaan kõn wãween an kar Jeova kõjparok armej ro an ilo iien ko etto. Im jemaroñ l̦õmn̦ak wõt kõn wãween an Jeova kar jipañ kõj ñan kijenmej wõt ium̦win wãween ko reppen. Kõn jipañ eo an Jeova, jemaroñ anjo̦ ioon ad mijak!—Sam 34:4.