Dãpij Wõt Am̦ Lañlõñ ilo Iien eo Kwõj Rũtto

1-2. Ewi wãween an Jeova watõk ri-karejar ro an retiljek me rerũtto? (Sam 92:​12-14; bar lale pija eo.)

ILO jet jikin ko ilo lal̦ in, armej ro rej watõk bwe ej juon jeraam̦m̦an ñe rej rũttol̦o̦k. Bõtab ilo jikin ko jet, armej rej lukkuun kate er joñan wõt aer maroñ bwe en jab alikkar aer rũttol̦o̦k. Ñan waanjoñak, ñe rej lo juon uwan̦ ilo bõraer rej kajju tũm̦we. Bõtab jekdo̦o̦n ewi joñan aer kate er ñan kabõjrak aer rũttol̦o̦k, ak rejjab maroñ kõm̦m̦ane men in.

² Ijoke, eoktak wãween an Jemãdwõj ilañ watõk ri-karejar ro an me rerũtto. (JK. 16:31) Ej keidi er ñan wõjke ko rewãmourur. (Riit Sam 92:​12-14.) Etke elukkuun jejjet waanjoñak in? Kõnke ekkã an wõjke ko rerũtto lukkuun lõñ bõlõkier im wũt ko ie. Ñan waanjoñak, juon iaan wõjke ko relukkuun aiboojoj ej pãd ilo Japan. Im jet iaan wõjke kein me relukkuun aiboojoj, elõñl̦o̦k jãn juon to̦ujin iiõ in aer pãd. Ãinwõt wõjke kein, ri-karejar ro retiljek an Jeova me rerũtto, relukkuun aiboojoj im̦aan mejãn. Jeova ej kalimjek armej eo itulowa im elukkuun kaorõk kadkad ko aer rem̦m̦an. Rein rerũtto rar karejar ñane ium̦win elõñ iiõ ko m̦aantak im rej dãpij wõt aer tiljek ñane ilo iien ko rem̦m̦an im ilo iien ko reppen.

3. Kwal̦o̦k waanjoñak ko kõn wãween an Jeova kõjerbal ro rerũtto ñan kajejjet ankilaan.

³ Ñe juon armej ej rũttol̦o̦k, men in ejjab mel̦el̦ein bwe edikl̦o̦k an aorõk ippãn Jeova.a Ilo m̦ool, ekkã an Jeova kõjerbal ro rerũtto ñan kajejjet ankilaan. Ñan waanjoñak, Sera ear lukkuun rũtto ke Jeova ear ba bwe enaaj jinen juon aelõñ ekajoor im Messaia eo enaaj itok jãn menmenbwij eo an. (Jen. 17:​15-19) Moses ear bar lukkuun rũtto ke Jeova ear jitõñe bwe en tõl ri-Israel ro ilo aer diwõjl̦o̦k jãn Ijipt. (Ex. 7:​6, 7) Im rijjilõk Jon ear lukkuun rũtto ke Jeova ear kõm̦akũt e ñan je l̦alem iaan bok ko ilo Baibõl̦.

4. Ekkar ñan Jabõn Kõnnaan 15:​15, ta eo emaroñ jipañ ro rerũtto ñan kijenmej wõt ium̦win wãween ko reppen rej iiooni? (Bar lale pija eo.)

⁴ Elukkuun lõñ wãween ko reppen ro rerũtto rej iiooni kõn wõt aer rũttol̦o̦k. Juon jeid im jatid lel̦l̦ap ej kõm̦m̦an kõjak im ba, “Rũttol̦o̦k ejjab ñan ro repuwal̦.” Ijoke, ñe ro rerũtto rej dãpij wõt aer lañlõñ,b men in emaroñ jipañ er ñan kijenmej wõt ium̦win wãween ko reppen rej iiooni kõn wõt aer rũttol̦o̦k. (Riit Jabõn Kõnnaan 15:​15, UBS.) Ilo katak in, jenaaj etale men ko ro rerũtto remaroñ kõm̦m̦ani ñan dãpij wõt aer lañlõñ. Jenaaj bareinwõt etale wãween an ro jet maroñ jipañ ro jeid im jatid me rerũtto ilo eklejia eo aer. Jen m̦okta etale etke emaroñ pen ñan dãpij wõt ad lañlõñ ñe jej rũttol̦o̦k.

AM̦ RŨTTOL̦O̦K EMAROÑ KÕM̦M̦AN BWE EN PEN AM̦ LO LAÑLÕÑ

5. Ta ko remaroñ kõm̦m̦an an ro rerũtto ebbweer?

⁵ Ta ko remaroñ kõm̦m̦an bwe kwõn ebbweer? Bõlen kwõlukkuun bũrom̦õj kõnke kwõjjab maroñ kõm̦m̦ani men ko kwaar kõm̦m̦ani m̦okta. Kwõmaroñ oñ kake iien ko kwaar dik im ear em̦m̦anl̦o̦k ãjmour eo am̦. (Ekl. 7:10) Ñan waanjoñak, juon jeid im jatid lel̦l̦ap etan Ruby ej ba: “Elukkuun pen aõ ekkõn̦ak aõ nuknuk kõnke elukkuun metak ãnbwinnũ im ejjab em̦m̦an aõ em̦m̦akũtkũt ãinwõt kar m̦okta. Joñan elukkuun pen aõ kotak neõ im kõl̦aaki jito̦kin ko aõ. Kõn wõt nañinmejin kũrro ekõn metak im mej pã ko peiũ, kõn men in epen aõ kõm̦m̦ani jerbal ko reddik.” Im Harold, eo me ear jerbal ilo Betel̦, ej ba: “Jet iien ij illu kõnke ijjab maroñ kõm̦m̦ani men ko ikõn kõm̦m̦ani m̦okta. Ña kar juon eo me elukkuun em̦m̦an ippãn iukkure. Elukkuun kar em̦m̦an ippa iukkure in iakiu. Ro jet rekõn ba, ‘Jol̦o̦k ball n̦e ñan Harold bwe jen wiin.’ Ak kiiõ, ãinwõt ijjab maroñ jol̦o̦k ball eo ñan jidik.”

6. (1) Ta ko jet remaroñ kõm̦m̦an bwe ro rerũtto ren ebbweer? (2) Ta ko remaroñ jipañ ro rerũtto ñan jel̦ã el̦aññe rej aikuj bõjrak jãn aer kattõr? (Lale katak eo etan “Ij Aikuj Ke Bõjrak jãn Aõ Kattõr?” ilo magazine in.)

⁶ Kwõmaroñ ebbweer kõnke ewõr men ko kwõjjab maroñ kõm̦m̦ani make iaam̦. Ñan waanjoñak, bõlen kwõj aikuj juon bwe en lale eok ak kwõj aikuj em̦m̦akũt im jokwe ippãn juon iaan ro nejũm̦. Ak bõlen kwõlukkuun bũrom̦õj bwe kwõjjab maroñ ito-itak make iaam̦, kattõre juon wa kõn wõt an nanal̦o̦k ãjmour eo am̦, ak ejjab em̦m̦an am̦ lol̦o̦kjen̦. Men in ejjab pidodo ñan jidik! Bõtab em̦m̦an ñan keememej bwe meñe kwõjjab maroñ lale eok make, jokwe make iaam ak kattõre juon wa, ak kwõj aorõk wõt ippãn Jeova im ro jet. Im jemaroñ lõke bwe Jeova ej mel̦el̦e kõn eñjake ko ad. Men eo aorõk ippãn Jeova ej kain armej rot kõj itulowa. Jeova ejel̦ã ewi joñan ad yokwe im kam̦m̦oolol E im ro jeid im jatid.—1 Sa. 16:​7, UBS.

7. Ta eo emaroñ jipañ ro rej bũrom̦õj kõn aer maroñ jab pãd im loe an jem̦l̦o̦k jukjukun pãd in?

⁷ Bõlen kwõmaroñ bũrom̦õj kõnke kwõmaroñ jab pãd im loe an jem̦l̦o̦k jukjukun pãd in. El̦aññe kwõj bõk eñjake in, ta eo emaroñ jipañ? Em̦m̦an ñan keememej bwe Jeova ej kijenmej wõt im ej kõttar ñan iien eo enaaj ko̦kkure jukjukun pãd in enana. (Ais. 30:18) Etke Jeova ej kijenmej? Kõnke ej kõtl̦o̦k iien bwe elõñ armej ren jel̦ã kõn E im karejar ñane. (2 Pit. 3:9) Innem ñe kwõj ebbweer, em̦m̦an ñan l̦õmn̦ak kõn wãween an naaj elõñ armej bõk tokjãn jãn an Jeova kwal̦o̦k kijenmej m̦okta jãn an itok jem̦l̦o̦kin. Bõlen jet iaan armej rein ej ro nukum̦.

8. Ta ko ro rerũtto remaroñ kõm̦m̦ani kõn wõt aer nañinmej ak jab em̦m̦an ãjmour eo aer?

⁸ Jekdo̦o̦n ewi dettad ak kõj aolep ñe ejjab ad mour, ekkã ad ba ak kõm̦m̦ani men ko jemaroñ ajl̦o̦k kaki. (Ekl. 7:7; Jem. 3:2) Ñan waanjoñak, ke em̦m̦aan eo etiljek etan Job ear iioon eñtaan ear ba ‘naan ko rejajel̦o̦kjen̦.’ (Job 6:​1-3) Ro rerũtto remaroñ ba ak kõm̦m̦ani men ko rekõn jab kõm̦m̦ani kõn wõt uno ko rej bũki ak nañinmej ko ewõr ippãer. Em̦ool bwe ejjel̦o̦k juon iaad enãj kõjerbal ãjmour eo an ak an rũtto ãinwõt juon jekpen bwe en kõbbo̦o̦jo̦j ak jab jouj ñan ro jet. Im ñe jej kile bwe jaar ba juon men ejjab jouj ñan juon armej, jen m̦õkaj im jol̦o̦k ad bõd ippãn.—Matu 5:​23, 24.

WÃWEEN AM̦ MAROÑ DÃPIJ WÕT AM̦ LAÑLÕÑ

9. Etke kwõj aikuj kõtl̦o̦k an ro jet jipañ eok? (Bar lale pija ko.)

⁹ Kõtl̦o̦k bwe ro jet ren jipañ eok. (Gal. 6:2) Ilo jinoin, emaroñ pen am̦ kõm̦m̦ane men in. Juon jeid im jatid lel̦l̦ap etan Gretl ej ba: “Jet iien epen aõ kõtl̦o̦k an ro jet jipañ eõ kõnke ij l̦õmn̦ak bwe ij kõm̦m̦an aer jerbal. Ear bõk iien bwe in ukot wãween aõ l̦õmn̦ak, im kõttãik bũruõ im kile bwe ij aikuj jipañ jãn ro jet.” Ñe kwõj m̦õn̦õn̦õ in bõk jipañ jãn ro jet, kwõj kõtl̦o̦k bwe ren lo lañlõñ eo ej itok jãn aer lel̦o̦k ñan ro jet. (Jrb. 20:35) Im ejjel̦o̦k pere kwõnãj m̦õn̦õn̦õ in loe joñan an ro jet lukkuun yokwe eok im kea kõn eok.

10. Etke kwõj aikuj keememej ñan kwal̦o̦k am̦ kam̦m̦oolol? (Bar lale pija ko.)

¹⁰ Kwal̦o̦k am̦ kam̦m̦oolol. (Kol. 3:15; 1 Tes. 5:18) El̦ap ad kam̦m̦oolol ñe ro jet rej kõm̦m̦ani men ko rem̦m̦an ñan kõj, bõtab jet iien jemaroñ mel̦o̦kl̦o̦k in kwal̦o̦k ad kam̦m̦oolol er. Ijoke, ñe jej ettõñdikdik im ba kom̦m̦ool, ro m̦õttad renãj jel̦ã bwe jej yokwe im kam̦m̦oolol er. Leah, eo me ej juon ri-kau ñan ro rerũtto ilo Betel̦, ej ba: “Ekkã an juon iaan lel̦l̦ap ro jeid jatid me ij lale kam̦m̦oolol eõ. Ekõn je naanin kam̦m̦oolol ko ilo peba jidikdik ko. Meñe ej jei jejjo wõt naan ak relukkuun tõpar bũruõ. El̦ap aõ m̦õn̦õn̦õ ñan jel̦ã bwe ej lukkuun kam̦m̦oolol kõn jipañ ko aõ.”

11. Ewi wãween am̦ maroñ jipañ ro jet? (Bar lale pija ko.)

¹¹ Kate eok ñan jipañ ro jet. Ñe kwõj kõjerbal iien im maroñ ko am̦ ñan jipañ ro jet, enãj dikl̦o̦k am̦ l̦õmn̦ak wõt kõn apañ ko kwõj iiooni. Juon jabõn kõnnaan in Africa ej keidi ro rerũtto ñan juon l̦ãibrãre eobrak kõn bok ko me kwõmaroñ loe mel̦el̦e ko remãlõtlõt ie. Bõtab ñe ejjel̦o̦k rej riiti bok kein, ejjel̦o̦k en̦ emaroñ katak jãni. Ejja ãindeinl̦o̦k wõt, ãinwõt juon eo me el̦ap jel̦ã im imminene ko ippãn, kwõn em̦m̦akũt im kwal̦o̦k men ko raorõk em̦õj am̦ katak ilo mour eo am̦ ñan ro redikl̦o̦k. Kwal̦o̦k kajjitõk ko ñan er innem lukkuun roñjake. Kwal̦o̦k ñan er wãween an kar Jeova jipañ eok ilo mour eo am̦ im wãween aer nãj lo m̦õn̦õn̦õ ñe renãj pokake Jeova. Ejjel̦o̦k pere kwõnãj lo lañlõñ ñe kwõj kaenõm̦m̦an im kõkajoor ro m̦õttam̦ me redikl̦o̦k.—Sam 71:18.

12. Ekkar ñan Aiseia 46:​4, ta kallim̦ur eo an Jeova ñan ro rerũtto? (Bar lale pija ko.)

¹² Jar bwe Jeova en lewaj kajoor. Jet iien kwõmaroñ eñjake am̦ m̦õk ak m̦õjn̦o̦, im men in emaroñ kabbweerer. Bõtab keememej bwe Jeova el̦ap an kajoor. Baibõl̦ ej ba bwe “ejjab kijel̦o̦k im ejjab m̦õk.” (Ais. 40:28) Kõn men in, emaroñ lewaj kajoor eo kwõj aikuji. (Ais. 40:​29-31) Joñan, Jeova ej kallim̦ur bwe enaaj jipañ eok. (Riit Aiseia 46:​4, UBS.) Im aolep iien Jeova ej kajejjet kallim̦ur ko an. (Jos. 23:14; Ais. 55:​10, 11) Ñe kwõj jar im lo an Jeova jipañ eok, kwõnaaj lañlõñ kõnke kwõnaaj kile joñan an yokwe eok.

13. Ekkar ñan 2 Korint 4:​16-18, ta eo jej aikuj keememej? (Bar lale pija ko.)

¹³ Keememej bwe wãween eo kwõj iioone ej ñan jidik wõt iien. Emaroñ pidodol̦o̦k ad kijenmej ñe jej keememej bwe apañ ko jej iiooni rej ñan jidik wõt iien. Im Baibõl̦ ej kaalikkar ñan kõj bwe an juon rũtto im jab em̦m̦an ãjmour eo an, ej ñan jidik wõt iien. (Job 33:25; Ais. 33:24) Kõn men in, kwõmaroñ lo lañlõñ ilo am̦ jel̦ã bwe ilju im jekl̦aj kwõnaaj ãjmourl̦o̦k im lukkuun deo̦l̦o̦k im wũliol̦o̦k jãn kar m̦okta. (Riit 2 Korint 4:​16-18.) Bõtab ewi wãween an ro jet maroñ jipañ?

WÃWEEN AN RO JET MAROÑ JIPAÑ

14. Etke eaorõk ñan lol̦o̦k im call e ro rerũtto?

¹⁴ Ekkeini ad lol̦o̦k im call e ro jeid im jatid me rerũtto. (Hib. 13:16) Ro rerũtto remaroñ bũrom̦õj kõnke ekkã aer make iaaer. Juon jeid im jatid l̦al̦l̦ap me ej pãdwõt m̦weo im̦õn etan Camille ej ba: “Ij aikuj pãdwõt lowaan m̦weo im̦õ jãn jibboñ ñan boñ. Kõn men in, ekkã an ejjel̦o̦k men en̦ ij kõm̦m̦ane. Jet iien ij l̦õmn̦ak bwe ij ãinwõt juon l̦aiõn erũtto me ej kalbuuj ilo juon wõrwõr. Men in ej kõm̦m̦an aõ inepata im illu.” Ñe jej lol̦o̦k ro rerũtto, jej kaalikkar ñan er bwe jej yokwe er im relukkuun aorõk ippãd. Bõlen ewõr juon iien kõj aolep jaar kõn̦aan lol̦o̦k ak call e juon eo erũtto ilo eklejia eo ad, bõtab jaar jab kõm̦m̦ane men in. Ejjel̦o̦k pere bwe kõj aolep jelukkuun poub. Kõn men in, ta ko remaroñ jipañ kõj ñan kõm̦m̦ani “[men] ko raorõkl̦o̦k,” ãinwõt lol̦o̦k ro rerũtto? (Pil. 1:10) Kwõmaroñ kõm̦m̦ane juon kein kakeememej ñan jejel̦o̦k ak call e ro rerũtto ilo eklejia eo am̦. Bareinwõt ijello̦kun am̦ l̦õmn̦ak wõt in lol̦o̦k er, kwõmaroñ karõke raan eo im awa eo ñan am̦ kõm̦m̦ane men in.

15. Ta ko ro rerũtto im ro redikl̦o̦k remaroñ kõm̦m̦ani ippãn doon?

¹⁵ Ñe kwõj juon eo edikl̦o̦k, bõlen kwõj inepata kõnke kwõjaje ta eo kwõn bwebwenato kake ak ta ko kwõmaroñ kõm̦m̦ani ippãn ro rerũtto. Bõtab en jab l̦ap am̦ inepata kõn men in. Kate eok bwe kwõn juon m̦õttan eo em̦m̦an. (JK. 17:17) Kõm̦m̦an iien ñan bwebwenato ippãn ro rerũtto m̦okta jãn ak ãlikin iien kweilo̦k ko. Bõlen kwõmaroñ kajjitõk eoon ta eo em̦m̦antata ippãer ak ñe remaroñ kwal̦o̦k juon bwebwenato ekõjak jãn tõre ko rar dik. Kwõmaroñ bareinwõt kũrtok er bwe kom̦win alwõje JW Broadcasting^®. Ebar wõr wãween ko jet kwõmaroñ jipañ ro rerũtto. Ñan waanjoñak, kwõmaroñ jipañ er ñan update i talboon ak tablet ko nejier ak taunl̦outi kein katak ko ad rekããl. Juon jeid im jatid lel̦l̦ap etan Carol ej ba: “Ñe kwõj itõn kõm̦m̦ani men ko rem̦m̦an ippam̦, kwõmaroñ kajjitõk ippãn ro rerũtto ñe rekõn̦aan kobawaj ippam̦. Meñe irũtto, ak ikõn̦aan kõm̦m̦ani men ko relimo im rekam̦õn̦õn̦õ. Em̦m̦an ippa kaikujkuj, m̦õñã ippãn ro m̦õtta ilo restaurant ko, im jam̦bo im lale menin kõm̦anm̦an ko an Jeova.” Im juon jeid im jatid kõrã etan Maira ej ba: “Ewõr juon m̦õtta me 90 an iiõ. Im 57 iiõ kõtaamro. Meñe ãindein, ak ekkã aõ mel̦o̦kl̦o̦k bwe elukkuun rũtto jãn ña kõnke kõm̦ro ekõn ettõñ ippãn doon im alwõji pija ko ippãn doon. Im ñe ewõr apañ ko kõm̦ro ej iiooni, kõm̦ro ej kajjitõk naanin jipañ ko jãn doon.”

16. Etke elukkuun em̦m̦an ñan etal ippãn ro rerũtto ñe rej etal im taktõ?

¹⁶ Etal ippãer ñe rej etal im taktõ. Kobal̦o̦k ippãn am̦ kattõr ñan ro rerũtto, kwõmaroñ bar lale el̦aññe em̦m̦an an taktõ ro ak nõõj ro kõm̦m̦an ñan er im lel̦o̦k jipañ eo rej aikuji. (Ais. 1:17) Kwõmaroñ bar jipañ ro rerũtto ikijjeen am̦ lukkuun roñjake kõmel̦el̦e ko jãn taktõ ro. Juon jeid im jatid lel̦l̦ap etan Ruth ej ba: “Ñe ij etal im taktõ make iaõ, ekkã an taktõ ro jab roñjake ta ko ij ba. Ewõr iien ko taktõ ro rej jiroñ eõ im ba, ‘Bõlen ebõd am̦ l̦õmn̦ak, kwõjjab nañinmej ñan jidik.’ Bõtab, ñe juon ej itok ippa, em̦m̦anl̦o̦k an taktõ ro kõm̦m̦an ñan ña. Ij kam̦m̦oolole ro jeiũ im jatũ me rej itok ippa ñan iien ko ij etal im taktõ.”

17. Ilo wãween et kwõmaroñ kwal̦o̦k naan ippãn ro jeid im jatid me rerũtto?

¹⁷ Kwal̦o̦k naan ippãer. Ewõr ro rerũtto rejjab maroñ kwal̦o̦k naan jãn em̦ ñan em̦ kõn wõt aer m̦õjn̦o̦. Ñan waanjoñak, kwõmaroñ ke kũr juon jeid im jatid lel̦l̦ap ñan amiro kwal̦o̦k naan ikijjeen wabwilbwil eo? Bõlen kwõmaroñ kõpooje juon an jea bwe en jijet iturin wabwilbwil eo. Ak kwõmaroñ ke kũr juon jeid im jatid l̦al̦l̦ap bwe en kobawaj ippam̦ ilo iien am̦ katak ippãn juon iaan rũkkatak ro am̦? Bõlen komiro maroñ katak ippãn rũkkatak eo ilo m̦weo im̦õn l̦al̦l̦ap eo jeid im jatid. Em̦m̦aan ro rej lale eklejia eo remaroñ kõm̦m̦an karõk ñan kõm̦m̦ane kweilo̦k in kwal̦o̦k naan eo ilo m̦weo im̦õn ro rerũtto bwe en pidodo aer bõk kun̦aaer ilo jerbalin kwal̦o̦k naan. Jeova elukkuun buñbũruon ñe jej kate kõj ñan kõm̦m̦ani men ko me rej kwal̦o̦k ad yokwe im kautiej ro rerũtto.—JK. 3:27; Rom 12:10.

18. Ta eo jenaaj etale ilo katak eo tok juon?

¹⁸ Katak in ear kakeememej kõj bwe Jeova ej lukkuun yokwe im kaorõk ro rerũtto. Im kõj aolep ilo eklejia eo jej bar bõk ejja eñjake in! Ejjab pidodo ñe jej rũttol̦o̦k, ak kõn jipañ eo jãn Jeova, kwõmaroñ dãpij wõt am̦ lañlõñ. (Sam 37:​25, UBS) Ej juon men ekõketak ñan jel̦ã bwe ilju im jekl̦aj, kwõnaaj ãjmourl̦o̦k, kajoorl̦o̦k, im lukkuun deo̦l̦o̦k im wũliol̦o̦k jãn kar m̦okta! Ak ta kõn ro me rej ri-kau ñan juon nukwier me erũtto, juon nejier, ak juon m̦õttaer me enañinmej? Ewi wãween an ro rej ri-kau maroñ dãpij wõt aer lañlõñ? Ilo katak eo tok juon, jenaaj etale uwaakin kajjitõk in.