Kajjitõk ko jãn Ro Rej Riit
Ta “l̦õmn̦ak” eo Jeova enaaj likũti ilo bũruon ri-aelõñ ko ilo raan ko rej pãd im̦aan?
Ilo naaj jinoin eñtaan eo el̦ap, Revelesõn 17:16, 17 ej ba: “Doon ko joñoul im menninmour awiia eo kwaar loe, renaaj dike kõrã eo ekijoñ im renaaj rakimi im kõm̦m̦an an keelwaan, im renaaj kañ kanniõkin im lukkuun tile kõn kijeek. Bwe Anij ear likũt ilo bũrueer ñan aer kajejjete l̦õmn̦ak eo an, aet, bwe ren kajejjete l̦õmn̦ak eo aer jim̦or ñan lel̦o̦k maroñ in irooj eo aer ñan menninmour eo eawiia.” Ilo kar jinoin, bok ko ad rar kwal̦o̦k bwe “l̦õmn̦ak” eo Jeova enaaj likũti ilo bũruon ri-aelõñ ko ej ñan ko̦kkure kabuñ ko reriab.
Ijoke, ewõr juon mel̦el̦e jej aikuj kajim̦we. “L̦õmn̦ak” eo me Jeova enaaj likũti ilo bũruon ri-aelõñ ko ej ñan “lel̦o̦k maroñ in irooj eo aer ñan menninmour eo eawiia.” Ñan mel̦el̦e wãween an men in naaj jejjet kũtien, l̦õmn̦ak kõn kajjitõk kein itulal̦.
Wõn ro kanaan in ej jitõñl̦o̦k ñan er? “Kõrã eo ekijoñ” ak ãt eo juon etan “Babil̦on El̦ap,” ej jutak kõn doulul in aolep kabuñ ko reriab. “Menninmour awiia [eo] ebũrõrõ” ej kõkkar kõn doulul in kõm̦m̦an aenõm̦m̦an eo me ear jino an jerbal ilo 1919 im kar n̦aetan League of Nations, im kiiõ ej United Nations. (Rev. 17:3-5) “Doon ko joñoul” rej jitõñl̦o̦k ñan aolep kien ko me rej rejetake menninmour awiia in.
Ta kõtaan eo an kõrã eo ekijoñ im menninmour awiia eo ebũrõrõ? Kõrã eo ekijoñ me ej “jijet ioon” menninmour eo eawiia ej kõjeraam̦m̦an menninmour eo im kajjioñ kajebwebweiki im irooj ioon.
Ta eo enaaj wal̦o̦k ñan kõrã eo ekijoñ? Menninmour eo eawiia kobal̦o̦k ippãn doon ko joñoul me rej rejetake “renaaj dike kõrã eo ekijoñ.” Ñan kwal̦o̦k aer kõjdate, renaaj rakimi im kwal̦o̦k jerbal ko an renana. Im renaaj ko̦kkure kõrã eo ekijoñ ekkar ñan men eo Jeova ear ba enaaj wal̦o̦k. (Rev. 17:1; 18:8) Eñin naaj jem̦l̦o̦kin kabuñ ko reriab. Bõtab, m̦okta jãn an men in wal̦o̦k, Jeova enaaj kõm̦m̦an bwe aelõñ ko ren kõm̦m̦ane juon men ekããl me ejjañin kar wal̦o̦k ilo bwebwenato in an armej ro tõl.
Ta eo Jeova enaaj kõm̦akũt ri-aelõñ ko bwe ren kõm̦m̦ane? Enaaj likũt ilo bũruon doon ko joñoul “l̦õmn̦ak eo an,” eñin bwe ren “lel̦o̦k kajoor im maroñ eo aer ñan menninmour [bũrõrõ] eo eawiia”—United Nations. (Rev. 17:13) L̦õmn̦ak kõn ta mel̦el̦ein men in. Kien ko an armej renaaj ke make pepe in lel̦o̦k maroñ im kajoor ko aer ñan menninmour eo eawiia? Jaab! Kanaan eo ej kwal̦o̦k bwe Anij make enaaj kõm̦akũt er bwe ren kajejjete men in. (JK 21:1; keidi Aiseia 44:28.) Renaaj ke jidik kõn jidik lel̦o̦k maroñ in irooj in? Jaab! Alikkar bwe enaaj juon oktak enaaj jejjet kũtien ilo jidimkij. Innem, menninmour awiia eo kar kõmaroñe enaaj bõktok ekajet eo an Jeova ioon doulul in kabuñ ko reriab im jol̦o̦k er ñan indeeo.
Innem ta ko jej kõtmãne bwe renaaj wal̦o̦k? Jejjab aikuj kõtmãne bwe jenaaj lo ripoot ko kõn an kien ko jidik kõn jidik jino rejetake United Nations. Men eo jemaroñ kõtmãne bwe enaaj wal̦o̦k ej men in: Ilo jidimkij, Jeova enaaj likũt ilo bũruon ri-aelõñ ko bwe ren lel̦o̦k maroñ in irooj ko aer ñan menninmour awiia eo. Ñe men in enaaj wal̦o̦k, jenaaj jel̦ã bwe eñtaan eo el̦ap epojakin ijjino. Ilo iien in jej kõttar, “jen ruj wõt im ekkõl wõt” kõnke ejjabto jãn kiiõ, elõñ oktak ko rej pojakin wal̦o̦k ilo idiñ!—1 Tes. 5:6