Ewõr Ke Iien Kwõj Mijak im L̦õmn̦ak bwe Ejjel̦o̦k M̦õttam̦?

Lale m̦õk l̦addik e ilo pija in. Emijak im ejjel̦o̦k m̦õttan. Kwõkajoor ke bar mijak im l̦õmn̦ak bwe ejjel̦o̦k m̦õttam̦?​— Jet iien ãindein armej. Baibõl̦ ej kwal̦o̦k kõn jet iaan armej ro m̦õttan Jeova me rar bar mijak im l̦õmn̦ak bwe ejjel̦o̦k m̦õttaer. Juon iaaer ej Ilaija, jen kiiõ katak kõn e.

Ilaija ear jokwe ilo Israel m̦okta jãn an kar Jijej l̦otak. Ilo iien in, Ehab ej irooj in Israel im ear jab kabuñ ñan Anij eo em̦ool etan Jeova. Etan lio ippãn Ehab in Jezebel, im erro kar kabuñ ñan riab in anij eo etan Beal. Kõn men in, eitõn aolep Ri Israel ro rar bar kabuñ ñan Beal. Jezebel ear juon kõrã elukkuun m̦õrõ. Im ear kõn̦aan m̦ane Ilaija im aolep ro rar kabuñ ñan Jeova. Kwõjel̦ã ke ta eo Ilaija ear kõm̦m̦ane?​—

Ilaija ear ko! Elukkuun kar ettol̦o̦k ijo ear ko ñane, joñan ear tõpar ãne jem̦aden ijo me ejjel̦o̦k armej ie. Im ear kũttiliek ilowaan juon roñ ilo juon tol̦. Etke Ilaija ear ko im kũttiliek?​— Kõnke ear mijak. Ilaija ejjab aikuj kar mijak kõnke ejel̦ã bwe Jeova emaroñ jipañ e. Jeova ekajoor, im ear kwal̦o̦k an kajoor m̦oktal̦o̦k ñan Ilaija. Ta eo Jeova ear kõm̦m̦ane me ear kwal̦o̦k an kajoor ñan Ilaija? Ear jilkinl̦o̦k kijeek jãn lañ ñan ippãn Ilaija bwe en uwaake jar eo an. Alikkar bwe Jeova emaroñ bar jipañ Ilaija ilo iien eo me ear ko!

Ke Ilaija ej pãd ilowaan juon roñ, Jeova ear kajjitõk ippãn im ba: ‘Kwõj ta ijin?’ Ilaija ear uwaak im ba: ‘Ña wõt iaõ ij kabuñ ñan kwe im imijak kõnke armej rekõn̦aan m̦an ña.’ Ilaija ej ba wõt ke aolep ro me rar kabuñ ñan Jeova remej. Ak Jeova eba ñan Ilaija im ba: ‘Ejjab m̦ool men in. Ebar wõr jimjuon to̦ujin armej ro rej kabuñ ñan eõ. Kwõn peran wõt bwe ewõr jerbal ko jet ikõn̦aan bwe kwõn kõm̦m̦ani!’ Ilaija ear ke m̦õn̦õn̦õ ke ej roñ naan kein jãn Jeova?​—

Ta eo kwõmaroñ katak jãn Ilaija?​— Jab mijak im l̦õmn̦ak bwe ejjel̦o̦k m̦õttam̦. Ewõr m̦õttam̦ im rej yokwe Jeova, im rej bar yokwe eok. Bareinwõt, Jeova enaaj jipañ kwe aolep iien kõnke ekajoor! Kwõj ke m̦õn̦õn̦õ kiiõ ke kwõjel̦ã bwe elukkuun lõñ m̦õttam̦?​—