Rehab Ear Tõmak ilo Jeova

Jen ba ke jej pãd ilo juon jikin etan in Jeriko. Jikin in ej pãd ilo aelõñ in Kenean, im armej ro ilo ijin rejjab tõmak ilo Jeova. Ewõr juon kõrã ej jokwe ilo jikin in, etan in Rehab.

Ke Rehab ear dik, ear roñ bwebwenatoun an kar Moses kõjepel Lom̦al̦o eo Ekilmir. Im ear bar roñ kõn an kar jipañ Ri Israel ro etal jãn Ijipt. Rehab ear bar roñ bwe Jeova ear jipañ er ñan wiin ilo iien tarin̦ae jãn ri nana ro. Ak kiiõ ej roñ bwe Ri Israel ro repãd turin Jeriko!

Juon boñ, ruo Ri Israel rar kũttiliekl̦o̦k im lale Jeriko. Ke rar tõpar m̦weo m̦õn Rehab, ear kadel̦o̦ñ er. Kiiñ eo an Jeriko ear roñ bwe ruo em̦m̦aan rar kũttiliekl̦o̦k in tõn lale jikin eo, im bwe repãd lo m̦weo m̦õn Rehab. Innem, kiiñ eo ear jilkinl̦o̦k ri jerbal ro an ñan pukot l̦õm̦aro ak em̦õj an Rehab n̦ooj er ilo raan m̦weo m̦õn. Im ke ri jerbal ro an kiiñ eo rar itok, Rehab ear ba: ‘L̦õm̦aro rar pãd m̦wiin, im rej kab moot. Ñe komi kõpel̦ er kiiõ, kom̦ maroñ jibwe er!’ Etke Rehab ekar kõjparok l̦õm̦aro?​— Kõnke ear tõmak ilo Jeova. Im ejel̦ã bwe Jeova enaaj lel̦o̦k Kenean bwe en jikin Ri Israel ro.

M̦okta jãn an kar l̦õm̦aro etal jãn m̦õn Rehab, rar kallim̦uri bwe e im baam̦le eo an renaaj mour ñe enaaj jorrããn Jeriko. Ta eo l̦õm̦aro rar ba Rehab en kab kõm̦m̦ane?​— Rar ba: ‘Kwõn bõke to bũrõrõ in, im kab katotoiki ilo wũntõ eo am̦. Ñe kwõnãj kõm̦m̦ane, aolep ro ilo m̦wiin m̦õm̦ renaaj mour.’ Rehab ear pokake men eo l̦õm̦aro rar ba. Kiiõ, kwõjel̦ã ke ta eo ear wal̦o̦k?​—

Ilo raan ko tok jet, Ri Israel ro rar m̦aaj im rauni Jeriko ilo ejjel̦o̦k ainikien. Jiljino raan in aer kar rauni Jeriko, juon alen ilo juon raan. Ak ilo raan eo kein kajimjuon, rar rauni Jeriko jimjuon alen. Im aolep rar buul̦ lam̦õj im Jeova ear kõm̦m̦an bwe en kajju rup worwor in Jeriko. M̦weo wõt me to bũrõrõ eo ear etoto ilo wũntõ eo ie ear jab rup! Kwõj ke loe ilo pija in?​— Rehab im baam̦le eo an rar jab mej!

Ta eo Rehab ear kõm̦m̦ane im kwõj aikuj bar kõm̦m̦ane?​— Elukkuun lõñ men ko rem̦m̦an Rehab ear katak kaki kõn Jeova. Eñin unin, ear tõmak ilo Jeova. Kwe, kwõj bar katak kõn elõñ men ko rem̦m̦an kõn Jeova. Kwõj tõmak ke ilo Jeova ãinwõt kar Rehab?​— Kõm jel̦ã bwe kwõj tõmak!