Ebwir Ke Ñõn Kajerbal Etan Anij?
ILO Jeje ko ilo kajin Hibru, rej naetair “Kallimur Mokta” (Old Testament), etan Anij ej walok enañin 7,000 alen ilo wãwen in יהוה (rej riiti jen anmoon ñõn anmiñ). Ilo bar juõn wãwen ba, etan Anij ej jutak ikijen letter ko emen ilo kajin Hibru Yohdh, He, Waw, He, ekkã kar je YHWH.
Ilo ien ko etto, dri Ju ro rar bõk lemnok eo bwe ebwir ñõn kajerbal etan Anij. Kin men in, ear kõmõn bwe ren jab ba ãt eo etan Anij, im ilo jeje ko air, rar kajerbal ãt ko jet. Bõtab, elõñ dri ukok Baibel ro, rar kajerbal wõt ãt in “Yahweh,” ak “Jeova.” Juõn ian ukok ko rej kajerbal ãt eo etan Anij ej Baibel eo an Catholic (Jerusalem Bible). Ekkar ñõn ukok in, ke Moses ear kajitõk iben Anij ewi wãwen enaj kar uak elañe dri Israel ro rar kajitõkin e kin wõn eo ear jilkinlok e ñõn ir, Anij ej uak: “Kwoj aikwij ba ñõn ro nejin Israel: ‘Yahweh, Anij an ro jimami, Anij an Ebream, Anij an Aisak, im Anij an Jekob, ear jilkinwõj iõ ñõn kom.’ Eñin eta ñõn in drio, im ebeben ko otemjej renaj kir eta.”—Exodus 3:15 Jerusalem Bible.
Ke Jisõs ear jar, ear kwalok kin wãwen an kajerbal ãt eo ekwojarjar: “I ar kwalok etõm ñõn ir, im I naj kwalok e.” Im ilo jar eo an Jisõs, ear ba: “Jememuij i lõñ, En kwojarjar Etõm.”—Jon 17:26; Matu 6:9, JB.
Inem, emaroñ kar einwõt juõn menin bwilõñ, ñõn jela bwe ilo buk eo ekãl an Pope Benedict eo kein ka 16, buk eo etan, Jisõs dri Nazeret (Jesus of Nazareth) ear ba nan kein ikijen kajerbal ãt eo ekwojarjar: “Dri Israel ro rar . . . lukkun jimwe ilo air kar makoko in kajerbal ãt in me Anij ear kajerbale kin e mõke, im ewalok ilo jeje kein YHWH, im bõprae air kaurõk e joñõn wõt ãt ko etan anij in pagan ro. Ilo ejja wãwen in wõt, ukok in Baibel ko ran kein rar bwir ñõn kajerbal ãt in me aolep ien dri Israel ro rar watõke einwõt juõn men ettino im emo air ba kake einwõt juõn ãt bajjek wõt.”
Ilo am baj lemnok, ejime ke ak ebwir ñõn kajerbal etan Anij? Elañe Jeova mõke ear ba: “Eñin eta ñõn in drio, im eñin Aõ men in kememej ñõn ebeben otemjej,” eor ke jabrewõt emaroñ kabwir Anij?
[Pija ilo peij 23]
Jisõs ear kajerbal ãt eo ekwojarjar ilo jar eo an