Jibellok Bwe Komin Ri Nebar Ro Relõñliñ Ibelakin Lõl
“Komin nebar Jeova. Komin nebar, O kom ro dri korijeran Jeova, komin nebar etan Jeova.”—PSALM 113:1.
1, 2. (a) Ilo errã ibben Psalm 113:1-3, wõn eo tellokin nebar eo ad ewor itoklimo ie? (b) Ta kajitõk eo ekwon ñõn kajitõk kake?
JEHOVAH ANIJ ej Ri Kõmõnmõn eo elap an lõñ im lõl, Kajur Bõtata eo ej indio ijoko otemjelok. E ej tellokin nebar eo ad ewor itoklimo ie. Eñin unin Psalm 113:1-3 ej kaiñ kij: “Komin nebar Jeova. Komin nebar, O kom ro dri korijeran Jeova, komin nebar etan Jeova. Emõnõnõ etan Jeova jen ien in im ñõn in drio. Jen tak al ñõn tulok eo an, ren kamõnõnõ etan Jeova.”
2 Einwõt Ri Kennan ro an Anij, jej lõñliñ in kõmmõne menin. Emenin kamõnõnõ bwe Jehovah Anij ejjabto enaj kõmmõne al in nebar in ekalõñliñ jej al kake rainin ñõn kobrak aolepen lõl! (Psalm 22:27) Rej roñjake ke ainikõm ilo jar in al in elap ibelakin lõl? Elañe eindein, emenin kamõnõnõ ibbõm bwe men in ej kajenolok yuk jen lõlin ejjab burukuk, im ejelok lõñliñ ie!
3. (a) Ta eo ej kõmmõn bwe armij ro an Anij ren jenolok, einjuõn jen armij ro jet? (b) Ilo wãwen et ko jej jenolok jen armij ro jet?
3 Ad nebar Jehovah ilo burukuk emol ej kõmmõn bwe jen jenolok im einjuõn. Jej buru wõt juõn ilo konono im katakin im kajerbal ejja kilen ko wõt ñõn keañ kin an Jehovah ‘emõn elap.’ (Psalm 145:7) Aet, einwõt armij ro an Jehovah emwij wujleplok, jej jenolok kin jerbal eo an Anij eo ad, Jehovah. Anij ear jiroñ ro don emwij air wujleplok etto, Israel, ñõn jibellok jen ailiñ ko ibelakiir im jab mãr ilo manit ko an ailiñ kein. (Exodus 34:12-16) Ear lelok kien ko ñõn armij ro an ñõn jibañ ir kõmmõne menin. Eindeinlok rainin, Jehovah ear letok ñõn kij Nan eo an ekwojarjar, Bible eo. Nan in jiroñ eo ie ej kwalok ñõn kij wãwen ad maroñ debij ad jibellok jen lõl in. (2 Korint 6:17; 2 Timothy 3:16, 17) Jejjab jenolok ilo ad kamakelok iad ilo bukwon ko armij rej makelok ie kin kabuñ, einwõt monk ro im nun ro in Babylon Elap. Ilo ad anõk joñok eo an Jesus Christ, jej ri nebar ro an Jehovah ilobwilij.
Kajeoñwe Ri Nebar eo Elap an Jehovah
4. Ewi wãwen an kar Jesus likit joñok eo ilo nebar Jehovah?
4 Jesus ear jab oktak jen karõk eo an ñõn nebar Jehovah. Im men in ear kajenolok e jen lõl. Ilo imõn kabuñ ko an ri Jew im ilo temple eo ilo Jerusalem, ear nebar ãt eo ekwojarjar etan Anij. Ilo jeban tol ak ilo ene, ijo jabdewõt jar in armij ro rej kuk ibben don, Jesus ear kwalok nan ilobwilij kin mol ko an Jehovah. Ear keañ: “Ij kamolol yuk, O Jema, Iroij in lõñ im lõl.” (Matthew 11:25) Meñe ear bed ilo ekajet iman Pontius Pilate, Jesus ear ba: “Kin men in I ar lotak, im kin men in I ar itok ñõn lõl, bwe In kennan kin mol.” (John 18:37) Jesus ear kamolol kin aorõkin jerbal eo an. Jabdewõt ijo ear bed ie, Jesus ear kennan kin Jehovah im nebar e ilobwilij.
5. Psalm 22:22 ej jerbal ñõn wõn, im ta eo ej aikwij lemnak eo ad?
5 Ilo Psalm 22:22, jej lo ennan in kanan in kin Ri Nebar eo Elap an Jehovah: “I naj kwalok etõm ñõn ro jeiõ im jatiõ; ilo bwiljin jar an armij I naj nebar Yuk.” Ilo Hebrew 2:11, 12, ri jilek Paul ej jerbale eon kein ñõn Iroij Jesus im ñõn ro Jehovah Anij ear kokwojarjar ir ñõn aibujuij eo i lõñ. Einwõt e, rejjab jook in nebar ãt eo etan Jehovah iolaplap in congregation eo. Jej bõk ke ejja kain lemnak rot in ñe jej bed ilo kwelok ko an congregation eo ad? Itoklimo eo ad ñõn bõk kwunad ilo kwelok ko, ilo lemnak im konono jimor, ej men in nebar Jehovah. Ak lõñliñ in nebar eo ad ej jemlok ke ijin?
6. Ta jerbal eo Jesus ear lelok ñõn ro ri kaloran, im ewi wãwen an ro rej yokwe maram kaibujuij Anij?
6 Ekkar ñõn Matthew 5:14-16, Iroij Jesus ear bareinwõt kajerbal ri kalor ro an bwe maram eo air en romak bwe ro jet ren nebar Jehovah. Ear ba: “Kom maram in lõl. . . . En romak ami maram iman mejen armij, bwe ren lo jerbal ko ami remõn, im nebar Jememi i lõñ.” Ri yokwe maram ro rej bõktok aibujuij ñõn Anij. Rej baj kõmmõne wõt ke men in ilo air ba im kõmmõn, men ko remõn ñõn jibañ armij? Jab, ak rej kõmmõne ilo air burukuk im kaibujuij Jehovah. Aet, ri yokwe maram ro rej wujleplok ir make ñõn Anij im erom ri nebar ro relõñliñ. Emwij ke am bõk buñten ne in ekamõnõnõ?
Lõñliñ Jen Ad Nebar Jehovah
7. Etke ri nebar ro an Jehovah elap air lõñliñ, im ta kar lõñliñ eo air ilo ran in Pentecost eo ilo 33 C.E.?
7 Etke ri nebar ro an Jehovah elap air lõñliñ? Kinke lõñliñ ej juõn ian leen jitõb kwojarjar eo an Anij. Ilo Galetia 5:22, rej kalãjrake elikin yokwe. Ri kalor ro an Jesus ilo ebeben eo kein kajuõn rar kalikar leen jitõb in an Jehovah. Bwe, ilo ran in Pentecost eo ilo 33 C.E., ke Anij ear lutõklok jitõb eo an ion enañin 120 ri kalor ro an Jesus, ir otemjej rar jino nebar Jehovah ilo kajjojo lo ko. Ri Jew ro ear wor kautiej ir ro rar itok ñõn Jerusalem jen elõñ ailiñ ko ‘rar bwilõñ im lokjenair.’ Rar lamõj: “jej roñ air konono ilo ar in nan men ko relap an Anij”! (Jerbal 2:1-11) Ta tokjen eo ear walok jen aibujuij in kin kajin lo ko relõñ rej nebar Jehovah? Iturinlok 3,000 ri Jew ro im ro rar oktak ñõn tõmak eo an ri Jew rar bõk news eo emõn an Ailiñ eo kin Messiah eo. Rar baptais, bõk jitõb kwojarjar, im kõnan kobaiklok ainikier einwõt ri nebar ro relõñliñ an Jehovah. (Jerbal 2:37-42) Men in kar juõn jerammõn!
8. Elikin Pentecost eo, ta eo Christian ro rar kõmmõne ñõn kalaplok air lõñliñ?
8 Report eo ej etal wõt: “Ilo ran otemjej rej ber im bin, im burueir wõt juõn, iloan tempel, im ruji bred iloan imweir, im rej mõña kijeir ilo mõnõnõ im emõn burueir, im wijtake Anij, im kabuñburuen armij otemjej. Im Iroij ej kobaik na ibeir ro re naj mour, ilo ran otemjej.” (Jerbal 2:46, 47) Air kar koba ibben don im bõk mõttan mõñã kar men eo dein ear bõktok elap lõñliñ ñõn ir ke? Jab, lõñliñ eo air elap ear itok jen air nebar Jehovah Anij jen ran ñõn ran. Im lõñliñ eo air ear laplok ke rar lo thousand ro rar bõk ennan in lomor eo air. Ejja einwõt ibbed rainin.
Ri Nebar ro Rej Lõñliñ ilo Ailiñ Otemjej
9. (a) Ñãt im ewi wãwen an kar Anij jino lelok ñõn armij ro in ailiñ ko otemjej ien emõn ñõn air roñjake news eo emõn? (b) Etke kar lutõklok jitõb kwojarjar eo ion Cornelius im ro rejtan mokta jen air baptais?
9 Jehovah ear jab kõnan bwe jerbal in kotak-maram eo an ro ri karejeran en bed ilo juõn wõt ailiñ. Kin men in, jen 36 C.E. ear lelok ñõn armij in ailiñ ko otemjej ien emõn ñõn air roñ kin news eo an emõn. Ilo tel eo an Anij, Peter ear illok ñõn mweo imõn juõn Gentile (Ri Ailiñ ko) ri tel in jar in tarinae ilo Caesarea. Ear lo ijo Cornelius ej bed ibben ro jeran rebake im family eo. Ke rar lukkun eoroñ nan ko an Peter, rar jerbale tõmak eo air ilo Jesus ilo burueir. Ewi wãwen ad jela? Kinke jitõb kwojarjar eo an Anij ear itok ion ri tõmak ro rej Gentile. Emakijkij an walok bwe, men in letok in jitõb eo an Anij kar lelok wõt elikin baptais, ak ilo ien eo Jehovah ear kwalok an kowãppen rein rar jab ri Jew mokta jen tulok eo air ilo den. Elañe Jehovah ear jab kõmmõne men in, Peter eban kar maroñ liki bwe Anij ear kiõ bõk Ri Ailiñ ko ak Gentile einwõt ri karejar ro An im bwe ear tellokin air baptais ilo den.—Jerbal 10:34, 35, 47, 48.
10. Ewi wãwen kar kanan eo jen ien ko etto bwe armij in ailiñ ko otemjej renaj kar nebar Jehovah?
10 Jen ien etto, Jehovah ear kanan bwe armij in ailiñ ko otemjej renaj nebar e. Enaj kar wor an ri nebar ro relõñliñ ilo ene otemjej. Ñõn kamol men in, ri jilek Paul ear elij kanan ko jen Jeje in Hebrew ko. Ear jiroñ congregation eo an Christian ro ilo Rome: “Kin men in komin bõk dron, einwõt Kraist e ar bõk kom, ñõn aibujuij an Anij. Bwe ij ba, Emwij kõmõn Kraist dri jerbal ñõn dri mijmij kin mol an Anij, bwe En kabin kalimur ko ar lelok ñõn ro jimair, im bwe ro dri ailiñ ko ren kaibujuij Anij kin An joij: einwõt emwij je [ilo Psalm 18:49]: ‘Kin men in I naj wijtake Yuk iolapin dri ailiñ ko, im al ñõn etõm.’ Im, Ej bar ba, [ilo Deuteronomy 32:43]: ‘Komin lõñliñ, kom ri ailiñ ko, ibben ro dron.’ Im bar juõn [ilo Psalm 117:1]: ‘Komin wijtake Iroij, kom otemjej dri ailiñ; im komin nebar E armij otemjej.’”—Rome 15:7-11.
11. Ewi wãwen an kar Anij jibañ armij in ailiñ ko otemjej ñõn katak kin mol ko an, im ta tokjen eo ear walok?
11 Armij rejjab maroñ burukuk ilo air nebar Jehovah mae ien rej likit air kejatdikdik ion Jesus Christ, eo Anij ear kãlet bwe en iroij ion armij in ailiñ otemjej. Ñõn jibañ ir kamolol kin mol ko An rej tellok ñõn mour indio, Anij ear ejake juõn program in katakin ibelakin lõl. Ej lelok ialin tel ikijen class in ri karejar eo etiljek. (Matthew 24:45-47) Kin tokjen et? Elõñlok jen lalim million ainikien ko relõñliñ rej al im nebar Jehovah ilo elõñlok jen 230 ailiñ ko. Im bar elõñlok million rej kwalok air itoklimo in kõmmõn eindein. Lale oran ro rar bed ilo Kwojkwoj eo ilo 1996: 12,921,933. Ekabwilõñlõñ!
Juõn Jar Elap In Ri Nebar Ro Relõñliñ Kar Kanan Kake
12. Ta vision eo ekairujruj ri jilek John ear loe, im ta eo jej lo rainin ikijen vision in?
12 Ilo vision, ri jilek John ear lo “juõn jar elap” jen ailiñ ko otemjej. (Revelation 7:9) Ta unin tel in nebar ko jar in elap rej al kake koba ibben bwen ri kabit ro an Anij? John ej jiroñ kij: “Lomor ñõn amuij Anij eo ej jijõt ion tron, im ñõn Lam.” (Revelation 7:10) Men in rej beran ilo air keañ kake ilo mõttan ko otemjej in lõl. Kamakitkit ra ko ran palm, ilo nan in kõkkar, jej burukuk ilo wijtake Anij einwõt Kajur Bõtata eo ijoko otemjelok im ilo lõñliñ kamol iman mejen lõñ im lõl bwe “jej muri” kin lomor eo ad ñõn E im Nejin, Lamb eo, Jesus Christ. Oh, e kar juõn men in ekabwilõñlõñ ri jilek John ear iione ilo an lo vision in elloetak in kin jar eo elap! Im ej juõn men in ekabwilõñlõñ elap ibbed rainin ilo ad loe, im meñe ad mõttan, vision in emol John ear loe, jar eo elap rainin!
13. Ta eo ej kajenolok armij ro an Jehovah jen lõl in?
13 Einwõt ro ri karejeran Jehovah, elap ad mõnõnõ in etnake ãt eo etan. (Isaiah 43:10, 12) Ke jej Ri Kennan ro an Jehovah men in ej kõmmõn bwe jen einjuõn jen lõl in. Elap ad lõñliñ ñõn etnake ãt eo ej make wõt etan Anij im ñõn kõmõnmõn jerbal eo an ekwojarjar einwõt un eo ilo mour! Karõk eo elap an Jehovah ej ñõn kokwojarjar ãt eo etan ekwojarjar im ñõn jojomare kajur bõtata eo an ijoko otemjelok ikijen Ailiñ eo ewor melelen ñõn mour ko ad. Im ear jibañ kij bwe en wor jikier ilo karõk eo an ekwojarjar ikijen etan im Ailiñ eo. Men in emwij an kõmmõne ilo jilu wãwen ko.
Likit ilo Ir Mol eo
14, 15. (a) Ta eo ej juõn wãwen Anij ear jibañ kij kake ñõn an wor juõn jikin ilo karõk eo an ekwojarjar ikijen ãt eo etan im Ailiñ eo? (b) Ewi wãwen jutak eo an Ailiñ eo ilo 1914 C.E. ear einjuõn jen eo ear buñ ilo 607 B.C.E.?
14 Moktata, Jehovah ear likit mol eo ibben armij ro an. Men in kalikar eo elap an kairujruj ej bwe Ailiñ eo an ear jino an iroij ilo 1914. (Revelation 12:10) Kien in ilõñ eoktak jen kar wãwen ailiñ eo ilo Jerusalem, ijo king ro ilo lãjrak in family eo an David rekin jijet ion throne ie. Ailiñ in ear okjak, im jino ilo 607 B.C.E., Jerusalem ear kõttaik e iumin kajur eo an ri Gentile ro reutiej. Ailiñ eo ekãl Jehovah ear ejaake ilo 1914 ej juõn kajur i lõñ eo ejamin kõttaik e ñõn jabdewõt ak ñõn Jehovah wõt, im ejamin jorrãn. (Daniel 2:44) Bareinwõt, e einjuõn iroij eo an. Ewi wãwen? Revelation 11:15 ej uak: “Eor ainiken relap ilo lõñ rej ba, Ailiñ an lõl emwij an erom ailiñ an am Iroij, im Kraist eo An, Im E naj kiñ in drio im in drio.”
15 “Ailiñ an (ad) Iroij im Christ eo an” ej jerbale maroñ eo ion aolepen lõl in an armij. Wãwen in ekãl kin kajur bõtata eo an Jehovah, eo ekoba Nejin Messiah eo im 144,000 ro jein im jatin Jesus, ro elõñ wõt iair rej kiõ jerkakbiji ñõn aibujuij ilõñ, im ejjab baj juõn men jej katak kake—juõn men ri katak ro rej bwebwenato kake ak rejañin loe. Jab, Ailiñ in ilõñ ej juõn lukkun kien. Im jerammõn eo ad ekamõnõnõ ñõn mour indio ilo wãppen einwõt juõn tokjen iroij eo an ej letok ñõn kij un eo emõn ñõn wõnmanlok wõt ilo lõñliñ. Ke emwij letok kain mol kein ilo Nan eo an Jehovah men in ej kamakit kij ien otemjej bwe en emõn ad konono kake. (Psalm 56:10) Kwoj ekkeini ke am kõmmõne men in ilo am jiroñ jabdewõt armij bwe Ailiñ in Messiah eo an Anij ej iroij ilo lõñ kiõ?
Jibañ Jen Jitõb Kwojarjar im Juõn Dolul in Jimjen Jimjatin Ibelakin Lõl
16, 17. Ta wãwen ko kein karuo im kajilu Anij ear jibañ kij kaki ñõn an wor juõn jikin ilo karõk eo an ekwojarjar?
16 Wãwen eo kein karuo Anij ear jibañ kij ñõn an wor juõn jikid ilo karõk eo an ekwojarjar ej ilo an letok ñõn kij jitõb kwojarjar eo an, eo ej kamaroñ kij ñõn kwalok leen eo leen eaibujuij ilo mour ko ad im bõk buñburu eo an. (Galetia 5:22, 23) Bareinwõt, Paul ear jeje ñõn Christian ri kabit ro: “A j’ar bõk . . . Jitõb eo jen Anij, bwe jen jela men ko Anij e ar wujleptok ñõn kij.” (1 Korint 2:12) Ilo ad uak ñõn jitõb eo an Jehovah, kij otemjej jemaroñ jela im melele kin men ko remõn kiõ ear ilo joij litok ñõn kij—kallimur ko an, kien ko, nan in kaiñi ko, im men ko eierlok wõt.—Keiri Matthew 13:11.
17 Ak kin wãwen eo kein kajilu Anij ej jibañ kij kake, ewor ibbed juõn dolul in jimjen jimjatin ibelakin lõl im karõk eo ekamõnõnõ in dolul eo an Jehovah ñõn kabuñ. Ri jilek Peter ear konono kake ke ear kõketak kij “yokwe jimjãn jimjaten.” (1 Peter 2:17) Dolul in family eo ad ibelakin lot kin ro jein im jatin maan im kõra rej yokwe ej jibañ kij ñõn ad karejar ñõn Jehovah ilo lõñliñ eo elap jen buru, einwõt an Psalm 100:2 kaiñ: “Komin karejar ñõn e ilo lõñliñ. Komin itok iman kin al.” Eon 4 ej etal wõt im ba: “Komin deloñ ñõn loan aur ko An kin kamolol, im iloan worwor ko An kin nebar; komin kamolol E, im nebar etan.” Inem meñe jej kwalok nan ilobwilij ak bed ilo kwelok ko ad, jemaroñ lo lõñliñ. Emwij ad lo ainemõn im jokane ilo melan ko reaibujuij in temple eo ilo jitõb an Jehovah!
Ilo Lõñliñ Nebar Jehovah!
18. Etke jemaroñ lõñliñ ilo nebar Jehovah meñe ewor matõrtõr ak abañ ko jet rej itok iod?
18 Jekdon ta wãwen ko rebin, matõrtõr ak abañ ko jet remaroñ itok iod, jen lõñliñ wõt bwe jej bed ilo imõn kabuñ eo an Jehovah. (Isaiah 2:2, 3) Kememej bwe lõñliñ ej juõn kadkad in buru. Christian ro jeid im jatid maan im kõra ilo jinoin rar ri nebar ro relõñliñ an Jehovah meñe rar iioni elõñ abañ ko rebin im elõñ men ko rar luji. (Hebrew 10:34) Ri tõmak ro mõttad rainin rej einwõt ir.—Matthew 5:10-12.
19. (a) Ta nan in jiroñ ko rej elijinmen rej lujur kij ñõn nebar Jehovah? (b) Ta eo mour eo ad ñõn indio ej atartar ion, im ta bebe eo ad?
19 Kij otemjej ro rej karejar ñõn Jehovah jej mõnõnõ in bokake nan in jiroñ ko ilo Bible ñõn nebar e. Ilo elijinmen book in Revelation ej kakõlleik nebar ko ñõn Jehovah kin kajin in “Nebar Jah!” (Revelation 19:1-6) Ilo eon ko jiljino in Psalm 150, rej jiroñ kij 13 alen ñõn nebar Jehovah. Men in ej juõn eowor ñõn men in kõmõnmõn ko otemjej ilõñ im ilõl ñõn air ibben don ilo lõñliñ im al ñõn nebar Jehovah. Mour eo ad ñõn indio ej atartar ion ad kobalok ilo al in Alleluya in elap! Aet, armij ro wõt renaj mour ñõn indio rej armij ro rej lelok nebar eo ejjab bõjrak ñõn Jehovah. Kin men in, jej beek ñõn ad eddeb wõt ñõn congregation eo an etiljek ibelakin lõl ke jemlok eo ej ebaktok. Inem, jemaroñ kejatdikdik ñõn ad lo an nan in kajemlok ko an Psalm 150 jejjet kitieir ilo eyu: “Men otemjej ewor air menono ren nebar Jeova. Komin nebar Jeova!”
Ewi Wãwen Am Naj Kar Uak?
◻ Ta eo ej kõmmõn an armij ro an Anij jenolok, im einjuõn jen armij ro jet?
◻ Etke ro ri karejeran Jehovah elap air lõñliñ?
◻ Ta eo ej kajenolok kij jen lõl in?
◻ Ilo wãwen et ko jilu Anij ear jibañ kij ñõn an wor juõn jikid ilo karõk eo an ekwojarjar?