Jibañ Armij Ro Ñan Air Ruaklok Ñan Jehovah

“Ejelok armij ej itok ñõn Jema, elañe jab kin Iõ.”—JON 14:6.

1. Ta kien eo Jesus eo ear jerkakbiji ear lelok ñan dri kalor ro an, im ta eo ear walok ke Ri Kennan ro an Jehovah rar bokake?

JESUS CHRIST ear jiroñ ri kalor ro an bwe ren “kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar.” (Matu 28:19) Ilo yiõ ko joñoul remotlok, Ri Kennan ro an Jehovah rar jibañ elõñlok jen jilu million armij ro ñan air itok ñan Anij, im tokelik baptais ir ilo kakõllan wujleplok eo air ñan e ñan kõmanmõn ankilan. Jej mõnõnõ in jibañ ir ñan air ruaklok ñan Anij!​—Jemes 4:8.

2. Meñe elõñ ro ri kãl rej baptais, ta eo ear walok?

² Ilo jet ene ko elõñ ri kalor ro rekãl rar baptais, bõtab, kar ejelok juõn laplok in oran ri kwalok ro an Ailiñ eo. Emol, jej aikwij lemnak kin ro rar mij, joñan eo ilo kajjojo yiõ ikijen ro rar mij ej enañin 1 percent. Ak, ilo jejjo yiõ ko remotlok, elõñ oran ro rar wõtloklok kin jet un ko. Etke? Ilo katak in im katak in tok juõn renaj etale wãwen an armij ro ruaklok ñan Jehovah im un ko unin an jet maroñ kar wõtloklok.

Unin Kwalok Nan eo Ad

3. (a) Ewi wãwen an jerbal eo Jesus ear kabbeik ri kalor ro an kake errãlok ibben eo an enjel eo me ej walok ilo Reveles̃õn 14:6? (b) Ta eo ear kamol bwe ej juõn wãwen eo ekeie ñan lujur itoklimo eo an armij ro ilo ennan eo an Ailiñ eo, ak ta abañ eo ej bed?

³ Ilo ien in “ien jemlokin,” ri kalor ro an Jesus rar bõk jerbal eo ñan kajeded “jelãlokjen eo emol” kin “news eo emõn kin ailiñ eo.” (Daniel 12:4; Matthew 24:14, New World Translation) Jerbal eo air ekoba ibben eo an enjel eo “ibben news eo emõn indio ñan keañ kake einwõt news emõn ñan ro rej jokwe ion lal, im ñan ailiñ otemjej im bwij im konono im armij.” (Revelation 14:6, NW) Ilo lal in me elap madjaki men ko bajjek an lal in, wãwen eo ej make wõt keie ñan kaitoklimoen armij ro ilo Ailiñ in Anij im jibañ ir ñan air ruaklok ñan Jehovah ej ñan jiroñ ir kin kejatdikdik eo ñan mour indio ion juõn paradise ion lal. Ke menin ewõr melele kake, ro rej kobalok ibben armij ro an Anij kin aolepen air ñan bõk deloñlok eo ñan loan Paradise eo rejjab lukkun bin ilo air etetal ilo jitõb ion ial eo eaidik ej tellok ñan mour.​—Matu 7:13, 14.

4. Ekkar ñan Jesus im enjel eo ej kãke ilukon lañ, ta un eo unin jerbal in kwalok nan eo ad?

⁴ Jesus ear ba: “Im men in mour in drio, bwe ren jela Kwe juõn Anij emol, im Jisõs Kraist, eo Kw’ar jilkintok.” (Jon 17:3) Enjel eo ej kãke ilukon lañ ej keañ kin “news eo emõn indio” im ej jiroñ ro rej jokwe ion lal: “Komin mijõk Anij im lelok aibujuij ñõn E, bwe auõ in ekajet eo An e mottok: im komin kabuñ ñõn Eo e ar kõmõnmõn lõñ, im ene, im lometo, im un ko unin dren.” (Reveles̃õn 14:7) Kin menin un eo elaptata in jerbal in kwalok nan eo ad kin news eo emõn ej ñan jibañ armij ro ñan air ruaklok ñan Jehovah ikijen Christ Jesus.

Ijo Kunad ilo Jerbal eo An Jehovah

5. Ta ennan ko an Paul im Jesus rej kwalok bwe jej kõmmane jerbal eo an Jehovah, im jab ad?

⁵ Ilo an jeje ñan Christian ri kabit ro, ri jilek Paul ear konono kin “jerbal in kilajrõk” im ej ba bwe Anij ej kõlajrak armij ñan e make ion bedbed in katok in binmour eo an Jesus Christ. Paul ej ba bwe “einwõt elañe Anij ej akwelap ilo kim” im bwe “kim akwelap ñõn kom kin Kraist: Komin rel ñõn Anij.” Juõn lemnak in kõmãnãn buru! Meñe jej ri kabit “dri keañ kin Kraist” ak ri jilek ro kin kejatdikdik eo ñan mour ilal, jej aikwij jab meloklok bwe menin ej jerbal eo an Anij, ejjab ad. (2 Dri Korint 5:18-20) Anij eo ej lukkun karuaklok armij ro im katakin ro rej itok ñan Christ. Jesus ear ba: “Ejelok armij ej maroñ itok ñõn iba elañe Jema eo E ar jilkintok Iõ E jab ibertok e: im I naj kejerkak e ilo ran eo eliktata. Ro dri kanan r’ar je, Im Anij e naj katakin ir otemjej. Ro otemjej r’ar roñ jen Jema, im ar katak, rej itok ñõn Iõ.”​—Jon 6:44, 45.

6. Ewi wãwen an Jehovah kamakitkit ailiñ ko ilo juõn wãwen eo lok iman, im ejja ien eo wõt, wõn ro rej lo jokane ilo “imõn“ kabuñ eo an?

⁶ Ilo ran kein eliktata, ewi wãwen an Jehovah karuaklok armij im kabellok ñan ir “aur in tõmak”? (Jerbal 14:27, footnote; 2 Timote 3:1) Juõn wãwen elap ej ilo an Ri Kennan ro an keañ kin ennan in lomor eo an im kin ekajet eo nae jukjuk im bed in enana. (Aiseia 43:12; 61:1, 2) Nan in keañ in ibelakin lal ej kamakitkit ailiñ ko ilo juõn wãwen eo lok iman​—juõn kabwilõñlõñ in ekajet in kabedakilkil eo ejjabto an itok. Ilo ejja ien in wõt, armij ro “raorõk” ilo mejen Anij rej kadiojlok ir jen jukjuk im bed in im rej lo jokane ilo “mweo imõn” in kabuñ eo emol. Kin menin Jehovah ej kajejjet kitien nan in kanan ko an Haggai eo ear jei: “I naj kamakitkit ailiñ ko, im men ko remõn an ailiñ ko otemjej rej aikwij deloñtok; im I naj kobrak mwin kin aibujuij.”​—Haggai 2:6, 7, NW, footnote; Reveles̃õn 7:9, 15.

7. Ewi wãwen an Jehovah kabellok buruen armij ro im karuaklok kajjojo armij ro ñan e make im ñan Nejin?

⁷ Jehovah ej kabellok buruen ro rej mijak-Anij​—“men in aorõk ko remõntata an ailiñ ko”​—bwe ren maroñ “eoroñ nan ko” an Ri Kennan ro an. (Haggai 2:7, Jewish Publication Society; Jerbal 16:14) Einwõt ilo ebeben eo kein kajuõn, Jehovah jet ien ej kajerbal enjel ro an ñan tel Ri Kennan ro an ñan armij ro ettã burueir ro rar lamõj ñan e ñan jibañ. (Jerbal 8:26-31) Ke kajjojo armij rej katak kin menin letok ko remõn Anij ear kõmmani ñan ir ikijen Nejin, Jesus Christ, rej ruaklok ñan Jehovah kin yokwe eo an. (1 Jon 4:9, 10) Aet, Anij ej karuaklok armij ro ñan e make im ñan Nejin ikijen “joij-im yokwe” eo An, ak “yokwe eo etiljek.”​—Jeremiah 31:3, NW, footnote.

Wõn Ro Jehovah Ej Karuaklok?

8. Kain armij rot eo Jehovah ej karuaklok?

⁸ Jehovah ej karuaklok ñan e make im Nejin ro rej kabukõt E. (Jerbal 17:27) Rein ekoba armij ro “rej inebata im bwok burueir kin aolep menin kajjõjõ ko rej kõmmani” ilo Christendom im, ilo mol, ibelakin lal. (Ezekiel 9:4 NW) Rej “jelã kin aikwij eo air ilo jitõb.” (Matthew 5:3, NW) Emol, rej “armij ro rej inemõn [“ettã buru,” footnote] ilo lal,” ro renaj jokwe ion paradise eo ilal ñan indio.​—Zephaniah 2:3, NW.

9. Ewi wãwen an Jehovah maroñ lo elañe armij ro kar “likit ir bwe ren mour in drio,” im ewi wãwen an karuaklok rein?

⁹ Jehovah emaroñ readi buruen juõn armij. Kiiñ David ear jiroñlok leo nejin Solomon: “Jehovah ej tur buru otemjej, im E jelã kin aolep karõk in lemnak ko. Elañe kwoj bukõt e, enaj kwalok e make bwe kwon loe.” (1 Chronicles 28:9, NW) Ion bedbedin wãwen eo ilo kajjojo buruen armij im jitõb, ak lemnak eo ekajur, Jehovah emaroñ loe elañe leo ak lio ej einwõt uak ñan menin letok eo an ekwojarjar ñan jolok bwid in jerawiwi ko im kejatdikdik eo kin mour indio ilo jukjuk im bed eo ekãl im wãnik an Anij. (2 Piter 3:13) Ikijen Nan eo an, Ri Kennan ro an rej kwalok im katakin kake, Jehovah ej kebaklok armij ro ñan e make im ñan Nejin ‘ro jabrewõt ar likit ir bwe ren mour in drio,’ im rein ‘rej tõmak.’​—Jerbal 13:48.

10. Ta eo ej kwalok bwe an Jehovah karuaklok jet im jab ro jet ejjab kwalok lok iman jemlok eo an juõn?

¹⁰ An Jehovah karuaklok jet im jab ro jet ekoba ke juõn wãwen eo ej kwalok kadede jemlok eo an juõn armij? Ejjab ñan jidik! Karuaklok eo an Anij kin armij ro ej wawa ion kajur in kõnan eo air make. E ej kautiej anemkwoj in kõnan eo air. Jehovah ej likit iman armij ro ilo lal in rainin ejja jokãlet eo wõt einwõt eo kar likit iman ri Israel ro elõñlok jen 3,000 yiõ ko remotlok, ke Moses ear ba: “I ar likit imam ranin mour im emõn, kab mij im nana. . . . Ij kir ñõn lõñ im ñõn lõl bwe ren kennan nae yuk ranin, bwe emwij aõ kwalok ñõn yuk mour im mij, kejerammõn im kejerata: inem kwon kãlet mour bwe kwon mour wõt, kwe im ro ineõm; bwe kwon yokwe Jeova am Anij, ñõn bokake aniken, im edrep ñõn E: bwe E am mour, im aitokõn ran ko am.”​—Duteronomi 30:15-20.

11. Ewi wãwen an kar ri Israel ro kãlet mour?

¹¹ Lale bwe ri Israel ro rar maroñ kãlet mour ilo air ‘yokwe Jeova, bokake aniken, im edreb ñõn E.’ Ke rar konono nan kein, armij in Israel ro rejañin kar bõk Enen Kallimur eo. Rar jutak ilo Melaj eo ilo Moab, im rar keboj ir make ñan kijone River Jordan im deloñe Canaan. Ke eindein ñan air ukõtlok air lemnak ñan ene eo “emõn im e rãbõkbõk” im “e ibwijliplip kin milk im hõnni” eo ejjabto renaj kar bõke, kile in ettõnak ko air ear wawa ion yokwe eo air ñan Jehovah, air eoroñ ainikien, im air eddeb ñan e. (Exodus 3:8) Moses ear kalikar menin, ilo an ba: “Elañe kwo naj bokake kien ko an Jehovah am Anij, eo ij kakien yuk rainin, bwe kwon yokwe Jehovah am Anij, ñan etetal ilo ial ko an im ñan kejbãrok kien ko an im nan in kaiñi ko an im ekajet ko an, inem kwo naj mour im orlok, im Jehovah am Anij enaj kajerammõn yuk ilo eneo kwoj deloñlok in bõke.”​—Deuteronomy 30:16.

12. Ta eo joñok eo an ri Israel ro ej aikwij katakin kij kin jerbal in kwalok nan im katakin eo ad?

¹² Wãwen in ejjab aikwij katakin kij ke kin jerbal in kwalok nan im katakin eo ilo ien in ien jemlokin? Jej lemnak kin itok eo an Paradise eo ilal im konono kake ilo jerbal in kwalok nan eo ad. Ak ejjab kij ak ri kalor ro jej kõmman jenaj lo an jejjet kitien kallimur eo elañe kij ak ir jej karejar ñan Anij kin un ko rekibbon. Einwõt ri Israel ro, kij im ro jej katakin ir jej aikwij katak ñan ‘yokwe Jeova, bokake aniken, im eddeb ñõn E.’ Elañe jej kememej menin ñe jej kõmmane jerbal in kwalok nan eo ad, jenaj lukkun kobalok ibben Anij ilo karuaklok armij ro ñan e.

Ri Jerbal ro Mõttan Anij

13, 14. (a) Ekkar ñan 1 Dri Korint 3:5-9, ewi wãwen ad erom mõttan ri jerbal ro ibben Anij? (b) Wõn ro kautiej eo ej aikwij ilok ñan ir kin jabdewõt laplok, im etke?

¹³ Paul ej kalikar kobalok eo ibben Anij ilo an jitõñlok ñan kalbwin juõn melaj. E ar je: “Inem wõn Apollõs? Wõn Paul? Dri kaki kom ar tõmak kin ir; im einwõt Iroij e ar kajulok ñõn ir. I ar kallip, Apollõs e ar kamorur, a Anij e ar kadreklok. Ein drein eo ej kallip jekron, ak eo ej kamorur jekron: a Anij eo Ej kadreklok. Kiõ eo ej kallip im eo ej kamorur eirwõt juõn: im kaju iair e naj bõk wõnan ekar ñõn an mõke jerbal. Bwe kim dri jerbal iben Anij: kom jikin kallip an Anij, kom men in kalek an Anij.”​—1 Dri Korint 3:5-9.

¹⁴ Einwõt ri jerbal ro mõttan Anij, jej aikwij tiljek ilo kalbwin “nan eo an Ailiñ eo” ilo buruen armij ro, inem utdikdik kin den jabdewõt tokjen eo ej alikar ilo bar jeblak im katak Bible ko emõn kar keboji. Elañe bũdej eo, buru eo, emõn, Jehovah enaj kõmmane ijo kunan ilo an kõmman bwe ine in mol eo ilo Bible en eddek einwõt juõn menin eddek eo ekouwa. (Matu 13:19, 23) E enaj karuaklok armij eo ñan e make im ñan Nejin. Inem ilo etale eo eliktata, jabdewõt laplok in oran ri keañ ro an Ailiñ eo ej walok jen tokjen jerbal eo an Jehovah ilo buruen armij ro, im kõmman ine in mol eo bwe en eddek im kebaklok rein ñan e make im ñan Nejin.

Jerbal in Ekkal eo Enaj Bed Wõt

15. Ta wanjoñok eo Paul ear kajerbale ñan kwalok wãwen ad jibañ ro jet ñan ejaake tõmak eo?

¹⁵ Ke jej lañliñ kin laplok in, jej kõnan lo an armij ro etal wõt im yokwe Jehovah, bokake ainikien, im eddeb ñan e. Jej buromõj ñe jej lo an jet mololok im wõtloklok. Ewõr ke jabdewõt men jemaroñ kõmmane ñan bõprae menin? Ilo bar juõn wanjoñok, Paul ej kwalok wãwen ad maroñ jibañ ro jet ejaake tõmak. Ej jeje: “Bwe ejelok armij e maroñ in likit bar juõn foundes̃õn jen eo emwij likite, eo Jisõs Kraist. A elañe jabrewõt armij ej kalek ion foundes̃õn in, gold, silver, dreka aurõk, wijki, ujoj emõra, kãn; Jerbal an jabrewõt armij e naj alikar: bwe ran eo e naj kwalok e, bwe e naj walok ilo kijeek; im kijeek en e naj melejoñ jerbal an jabrewõt ie ein.”​—1 Dri Korint 3:11-13.

16. (a) Ewi wãwen an wanjoñok ko ruo Paul ear kajerbali oktak jen don ilo jibadbad ko air? (b) Ewi wãwen an jerbal in ekkal eo ad maroñ oktak im jab juburu im jab kajur ñan kijeek?

¹⁶ Ilo wanjoñok eo an Paul kin melaj eo, an men ko eddek ie ej wawa ion lemnak kin kallip, ekkeini utdikdiki kin den, im kajerammõn eo an Anij. Wanjoñok eo bar juõn an ri jilek eo ej kwalok kin eddo eo an Christian ri jerbal eo kin jerbal in ekkal eo an ej erom ta. E ar ekkal ke ion juõn foundation emol kin wijkinen em ko remõn? Paul ej kakkõl: “Jadrewõt armij en kanuij lale ewi wãwen an ekkal.” (1 Korint 3:10, NW) Ñe emwij ad jarõk itoklimo eo an juõn armij ilo ad jiroñ leo ak lio kin kejatdikdik eo ñan mour indio ilo Paradise, jej kõmmane ke katak eo ad ion baj bedbed in jelãlokjen eo ilo Jeje ko inem kalikar ilo nanin kaiñi ko ta eo armij eo ej aikwij kõmmane ñan bõk mour indio? Katak eo ad emaroñ ke ejaak aolepen ilo wãwen in: ‘Elañe kwo kõnan mour indio ilo Paradise, kwoj aikwij katak, ilok ñan kwelok ko, im bõk kunam ilo jerbal in kwalok nan eo’? Elañe eindein, jejjab kalek tõmak eo an armij eo ion juõn foundation ebin, im men eo jej kaleke emaroñ jab jumae kijeek in melejoñ ko ak kijenmij iumin juõn ien eo eaetok. Kajeoñ kebaklok armij ro ñan Jehovah ilo baj kejatdikdik eo wõt ñan mour ilo Paradise ñan oktan jejjo wõt yiõ ko jaar karejar ñan e ej einwõt ekkal kin “wijki, ujoj emõra, kãn.”

Kalek Yokwe ñan Anij im Christ

17, 18. (a) Ta eo ejjab maroñ rõlok elañe tõmak eo an juõn armij ej ñan kijenmij? (b) Ewi wãwen ad maroñ jibañ juõn armij maan ak kõrã ñan an Christ jokwe ilo buruen?

¹⁷ Ñan an tõmak eo kijenmij, ej aikwij bedbed ion kõtan eo an armij eo ibben Jehovah Anij ikijen Jesus Christ. Einwõt armij ro rejjab wãppen, jemaroñ tõbar juõn kõtan ainemõn eo einwõt in ibben Anij ikijen wõt Nejin. (Dri Rom 5:10) Kememej bwe Jesus ear ba: “Ejelok armij ej itok ñõn Jema, elañe jab kin Iõ.” Ñan jibañ ro jet kalek tõmak, “ejelok armij e maroñ in likit bar juõn foundes̃õn jen eo emwij likite, eo Jisõs Kraist.” Ta eo ekoba ilo menin?​—Jon 14:6; 1 Dri Korint 3:11.

¹⁸ Ekkal ion Christ einwõt foundation eo ej melelen ñan katakin ilo juõn wãwen eo ri katak Bible eo ej ejaake juõn yokwe eo emũlal ñan Jesus ikijen jelãlokjen eo elap kin jerbal eo An einwõt Ri Binmour, Bõran congregation eo, Priest eo Elap ej yokwe, im iroij einwõt Kiiñ. (Daniel 7:13, 14, NW; Matu 20:28; Dri Kolosse 1:18-20; Dri Hibru 4:14-16) Ej melelen kõmman bwe ren tõmak kin Jesus im bwe ej jokwe ilo burueir. Jar eo ad kin ir ej aikwij einwõt eowor eo an Paul ilo etan Christian ro ilo Epesõs. E ar je: “Ij bukwelõlõ ñan Jemer, . . . bwe en lewoj ñõn kom . . . bwe Kraist en jokwe ilo buruemi kin tõmak: bwe ke ebin im elle okrami ilo yokwe.”​—Dri Epesõs 3:14-17.

19. Ta eo ej aikwij tokjen eo kin yokwe eo ñan Christ ilo buruen ri katak Bible ro ad, ak ta eo rej aikwij katakin kake?

¹⁹ Elañe jej ekkal ilo juõn wãwen eo einwõt in bwe yokwe eo ñan Christ ej ejaak ilo buruen ri katak ro ad, menin enaj walok tokjen ilo kalek yokwe eo ñan Jehovah Anij. Yokwe, eñjake, im joij eo an Jesus rej juõn menin kalikar kadkad ko kadkadin Jehovah. (Matu 11:28-30; Mark 6:30-34; Jon 15:13, 14; Dri Kolosse 1:15; Dri Hibru 1:3) Inem ke armij ro rej etal im jelã im yokwe Jesus, renaj etal im jelã im yokwe Jehovah.a (1 Jon 4:14, 16, 19) Jej aikwij katakin ri katak Bible ro bwe Jehovah ej bed ilikin aolepen men eo Christ ear kõmmane ñan armij im kin menin jemuri ñan E kin kamolol, wijtak, im kabuñ einwõt “Anij eo Ej am lomor.”​—Sam Ko 68:19, 20; Aiseia 12:2-5; Jon 3:16; 5:19.

20. (a) Ewi wãwen ad maroñ jibañ armij ro ruaklok ñan Anij im ñan Nejin? (b) Ta eo naj etale ilo katak in tok juõn?

²⁰ Einwõt ri jerbal ro mõttan Anij, jen jibañ armij ro ñan air ebaklok ñan e im ñan Nejin, jibañ ir ejaake yokwe im tõmak ilo burueir. Kin menin Jehovah enaj erom juõn men eo emol ñan ir. (Jon 7:28) Ikijen Christ, renaj maroñ kajutak juõn kõtan eo ebak ibben Anij, im renaj yokwe e im eddeb ñan e. Ejelok joñan ien ion jerbal in yokwe eo air, im jerbale tõmak eo bwe kallimur aibujuij ko an Jehovah enaj jejjet kitieir ilo ien eo an. (Liaajlo̦l̦ 3:24-26; Dri Hibru 11:6) Bõtab, ke jej jibañ ro jet ejaake tõmak eo, kejatdikdik, im yokwe, jej aikwij kalek tõmak eo ad make bwe en einwõt juõn tima eo ebin eo ej maroñ dibuk lañ ko rekajur im ellã. Menin naj etale ilo katak in tok juõn.

[Kamelele eo itulal]

Ilo Wãwen Elij

◻ Ewi emakijkij in ad lujur itoklimo eo an armij ilo ennan eo an Ailiñ eo, ak ta kauwatata eo ej bed?

◻ Kain armij rot eo Jehovah ej kebaklok ñan e make im ñan Nejin?

◻ Ion ta eo deloñlok eo an Israel ñan loan Enen Kallimur eo ear wawa ion, im ta eo jemaroñ katak jen menin?

◻ Ta jerbal eo jej kõmmane ilo jibañ armij ro ñan air ruaklok ñan Jehovah im ñan Nejin?

[Pija eo ilo peij 10]

Meñe jej jakelok ñan armij ro kejatdikdik eo ñan mour indio ilo Paradise, jibadbad eo ad elap ej ñan karuaklok ir ñan Jehovah

[Pija ko ilo peij 13]

Bar jeblak ko ad remaroñ kanuij in keie elañe ej emõn ad kebojak