Ewi Wãwen Ad Maroñ Lo Kabuñ Eo Emol

Elañe kwokõnan bwe kwon jeran Anij, kwoj aikwij kabuñ ilo wãwen eo Anij ej buñburuen kake. Jesus ear ba bwe “dri kabuñ ro remol” renaj kabuñ ñan Anij ekkar ñan “mol” eo. (Jon 4:23, 24) Ewõr juõn wõt wãwen ejimwe ñan kabuñ ñan Anij. (Dri Epesõs 4:4-6) Kabuñ eo emol ej tellok ñan mour indio, im kabuñ wan ej tellok ñan mij.​—Matu 7:13, 14.

Kwomaroñ kile kabuñ eo emol ilo am kalimjek armij ro rej jerbale. Kinke Jehovah ej emõn, ri kabuñ ro an remol rej aikwij armij ro remõn. Einwõt juõn wijki orange ej jebar leen orange ko renno, eindein kabuñ eo emol ej jebar armij ro remõn.​—Matu 7:15-​20.

Ro jeran Jehovah elap air kautiej Bible eo. Rej jelã bwe Bible eo ej jen Anij. Rej kõtlok bwe en tel mour ko air, kamadmõde abañ ko air, im jibañ ir ñan katak kin Anij. (2 Timote 3:16) Rej kajeoñ in jerbale nan ko rej kwaloki.

Ro jeran Jehovah rej yokwe don. Jesus ear kwalok an yokwe armij ilo an katakin ir kin Anij, kejmour ro ri nañinmij. Ro rej jerbale kabuñ eo emol rej yokwe ro jet bareinwõt. Einwõt Jesus, rejjab kajekdon ro ri jeramel ak ri ailiñ ko jet. Jesus ear ba bwe armij ro renaj jelã kajjen ri kalor ro an kin air yokwe don.​—Jon 13:35.

Ro jeran Anij rej kautiej etan Anij, Jehovah. Elañe juõn armij ear makoko in kajerbal etõm, armij eo enaj kar ke jeram? Jaab! Ñe ewõr juõn jerad, jej kajerbal etan im kwalok men ko remõn kin eo ej jerad ñan ko jet. Inem ro rekõnan bwe ren jeran Anij rej aikwij kajerbal etan im konono kake e ñan ro jet. Jehovah ekõnan bwe jen kõmmane men in.​—Matu 6:9; Dri Rom 10:13, 14.

Einwõt Jesus, ro jeran Anij rej katakin armij kin Ailiñ eo an Anij. Ailiñ in Anij ej juõn government ak kien ilañ me enaj kõmman bwe lal in en juõn paradise. Ro jeran Anij rej kwalok kin news eo emõn kin Ailiñ eo an Anij ñan ro jet.​—Matu 24:14.

Ri Kennan ro an Jehovah rej kajeoñ bwe ren jeran Anij. Rej kautiej Bible eo im yokwe don. Bareinwõt rej kajerbal im kautiej ãt eo etan Anij im katakin ro jet kin Ailiñ eo an Anij. Ri Kennan ro an Jehovah rej jerbale kabuñ eo emol ilo mour eo air ion lal ilo ran kein.