Katak 8

Etke Anij Ej Kõtlok An Wõr Eñtan?

1, 2. Armij ekkã air et ñe ewalok eñtan ibbeir?

ÑE jorrãn ko rewalok, im rej kokkure mweiuk im mour an armij, elõñ rejjab maroñ melele kin etke men kein renana rej walok. Ro jet rej abõnõnõ kin joñan jorrãn, joñan lej, im joñan jõkkar in kõtõrãi kien im kowadoñ. Bar kwe kwomaroñ kar lemnak, ‘Etke Anij ej kõtlok an wõr eñtan?’

² Kin air jañin lo juõn uak emõn ñan kajitõk in, elõñ rar luji air tõmak ilo Anij. Rej lemnak bwe ejelok an itok limo kin armij ro. Ro rej watõk eñtan einwõt wãwen dein mour rej illu im naruõn Anij kin nana ko otemjej rej walok ibben armij ro. Elañe eñjake kein kar bed ibbam, enaj kaitoklimoem in jelã ta eo Bible ej ba kin men kein.

EÑTAN EJJAB JEN ANIJ

3, 4. Etke je jelã bwe nana im eñtan rejjab jen Jehovah?

³ Bible eo ej kalikar bwe eñtan ko jej loi rejjab jen Jehovah Anij. Einwõt, Christian ri kalor eo James ear je: “Ejelok armij en ba ñe kabo e Anij ej kabo iõ: bwe men ko renana re ban kabo Anij, im Ej kabo ejelok armij.” (Jemes 1:13) Ke ej eindein, Anij ejamin kar kõmmani eñtan ko im rej kokkure armij ro. Ejjab kaeñtan armij ro bwe ren tellokin bõk mour ilañ, bareinwõt ejjab kaeñtan armij ro kin kõmman ko air renana ilo mour eo air kar mokta.​—Dri Rom 6:7.

⁴ Kobatok ibben menin, meñe elõñ men ko renana kar kõmmani ilo etan Anij ak ilo etan Christ, ejelok jabdewõt kein kamol ilo Bible eo im ej kalikar bwe rar kowãppen jerbal rot kein. Ejelok kunan Anij im Christ ibben rein im rej ba rej karejarair ak rej kameoeo, kwot, uror im kokkure, im bar men ko jet rej menin kaeñtan armij. Ilo mol, “ial eo an dri nana, men in jõjõik ñõn Jeova.” Anij “ej etolok jen dri nana ro.”​—Jabõn Kennan Ko 15:9, 29.

5. Ta jet ian kadkad ko kadkadin Jehovah, im ta eñjake eo an kin menin kõmanman ko an?

⁵ Bible eo ej kamelele bwe Jehovah “e kanuij joij im tiriamokake.” (Jemes 5:11) Ej kwalok bwe “Jehovah ej yokwe ekajet jimwe.” (Psalm 37:28, New World Translation; Aiseia 61:8) Ejelok idenwõne elej ibben. Ej kejbãrok menin kõmanman ko an kin yokwe emol im ej lelok aikwij ko rekkar ñan ir. (Jerbal 14:16, 17) Kar eindein an Jehovah kõmman jen jinoin an walok mour ion lal.

JUÕN IJJINO EO EWÃPPEN

6. Ewi wãwen an jet inoñ ko kamelele kin jinoin bed an armij?

⁶ Kij aolep jeminene in lo im eñjake metak im eñtan. Inem emaroñ bin ñan tõmak bwe ear wõr juõn ien im ekar ejelok eñtan, ak kar wãwen dein mour ilo jinoin bwebwenato in armij. Bar ilo inoñ ko an jet ian ailiñ ko rej kamelele kin juõn jino rot in. Ilo inoñ ko an Ri Greek, ien eo moktata ian “Ien ko Lalem an Armij” kar naetan “Ien ko Remõntata.” Ilo ien in armij ro rar mour ilo mõnõnõ, kin an ejelok jerbal wan, eñtan, im jorrãn kin air rittolok. Ri China rej ba bwe ilo inoñ ko air kin Iroij eo e Yellow (Huang-Ti) armij ro rar mour ilo ainemõn, im jokane ibben men ko otemjej ibelakiir koba menin mour ko rawia. Ri Persia, Ri Egypt, Ri Tibet, Ri Peru, im Ri Mexico ro kar wõr air inoñ rot in kin juõn ien lemõnõnõ im mour wãppen ke ear ijjino bwebwenato ko an armij.

7. Etke Anij ear kõmanman lal im armij ro?

⁷ Inoñ ko an ri ailiñ ko rej eliji wõt jeje ko etto tata air bed ilo bwebwenato ko an armij, Bible eo. Ej kejelãik kij bwe Anij ear likit armij ro ruo jinoin, Adam im Eve, ilo juõn paradise eo kar naetan jikin kallip in Eden im ear kakien ir: “Komin timon im orlok, im kobrõk lõl, im kajur jen e.” (Jenesis 1:28) Ro jemed im jined ilo jinoin rar lo mõnõnõ kin mour wãppen im rar maroñ reimanlok ñan ien eo ñe aolepen lal enaj erom juõn paradise eobrak kin juõn family in armij ewãppen, ñan air mour ie ilo ainemõn im mõnõnõ ñan indio. Eñin kar karõk eo an Anij ilo an kõmanman lal im armij ro.​—Aiseia 45:18.

JUÕN AITWERÕK E LEJ

8. Kar watõk bwe Adam im Eve ren bokake kien et eo, ak ta ear walok?

⁸ Bwe ren ebake wõt Anij, Adam im Eve rar aikwij karmijete air mõñã jen “wijki in jelã emõn im nana.” (Jenesis 2:16, 17) Elañe rar bokake wõt kien Jehovah, ejamin kar wõr eñtan ñan rupe mour eo an armij. Ilo air bokake wõt kien Anij, ren kar kalikar air yokwe Jehovah im tiljek wõt ñan e. (1 Jon 5:3) Ak einwõt emwij ad katak ilo Chapter 6, ear jab wãwen dein jemlokin. Kin kabo an Satan, Eve ear mõñã jen leen wijki eo. Tokelik, bar Adam ear mõñã jen wijki eo emwij kamoiki air mõñã jen e.

9. Ta kajitõk eo Satan ear jomantak ibben Jehovah?

⁹ Kwoj kile ke eddon men eo ear walok? Satan ear jumae lajrak eo an Jehovah eo Eutiej Tata. Ilo an ba, “Kwo jamin mij otem mij,” Devil eo ear jumae nan ko an Anij, “Kwo naj mij otem mij.” Nan ko jet an Satan ear einwõt melelen bwe Jehovah ear debij jen Adam im Eve maroñ eo bwe ren einwõt Anij, im rar jab aikwij E ñan beek kin ta emõn im ta enana. Ilo wãwen in jumae eo an Satan ear jomantak kajitõk eo kin jimwe eo an Jehovah im an tellokin bwe en Iroij Bõtata Ijoko Otemjej.​—Jenesis 2:17; 3:1-6.

10. Ellotan et eo Satan ear bõkmantak nae armij ro?

¹⁰ Satan, Devil eo ear bar ba bwe armij ro renaj kar bokake Jehovah toan wõt air bõk jerammõn jen e.  Einwõt ba, ear wõr an bere tiljek eo an armij. Kin jumae Satan ear ba bwe ejelok juõn eo emaroñ tiljek wõt ñan Anij. Riap in elej jen Satan ej walok im alikar ilo bwebwenato in Bible kin Job, ri karejaran Jehovah etiljek, eo ear bõk melejoñ elap mokta jen 1600 B.C.E. Ñe kwonaj readi chapter ko ruo moktata ilo book in Job, kwonaj maroñ kile unin an armij ro eñtan im etke Anij ej kõtloke.

11. Kain armij rot kar Job, ak ta eo Satan ear ba nae e?

¹¹ Job, “juõn armij e wãppen im wãnik,” ear bõk jorrãn jen Satan. Mokta, Satan ear liakelok Job ilo an jomantak kajitõk eo kin, “Ejelok unin an Job mijõk Anij ke?” Inem, Devil eo ear liakelok Anij im Job jimor ilo an ba bwe Jehovah ear wiaiki tiljek eo an Job kin an kejbãrok im kajerammõn e. “Ak,” Satan ear ba ke ear jumae Jehovah, “Kwon kõtellok peõm kiõ, im uñire men otemjej an, inem e naj karmijete Yuk iman mejõm.”​—Job 1:8-11.

12. (a) Ta kajitõk ko ren kar alikar uakiir elañe Anij ear kõtlok an Satan melejoñe Job? (b) Ta tõbrakin an Job bõk melejoñ?

¹² Emol ke bwe Job ear karejar ñan Jehovah kin wõt an bõk men otemjej remõn jen Anij? Tiljek eo an Job en bin wõt ke iumin melejoñ? Im kar wõr ke an Jehovah liki Job bwe en kõtlok an bõk melejoñ? Uak in kajitõk kein renaj kar alikar wõt elañe Jehovah enaj kar kõtlok an Satan melejoñe Job kin melejoñ ko rebin. Tiljek eo an Job iumin melejoñ emwij kamelim e jen Anij, im ewalok ilo book in Job, kar kamol jimwe an Jehovah im tiljek eo an armij.​—Job 42:1, 2, 12.

13. Ewi wãwen ad deloñ ibben men eo ear walok ilo Eden im ñan Job?

¹³ Bõtab, men eo ear walok ilo jikin kallip in Eden im ñan Job, ewõr melele ko relaplok ie. Kajitõk ko Satan ear kwaloki rej jelet aolep, bar kij rainin. Kar kananaik etan Anij, im kar jumae utiej eo an. Jimwe eo an armij, kar deloñ ilo aitwerõk in. Kar aikwij uaki aitwerõk kein.

WÃWEN UAKI AITWERÕK KEIN

14. Ñe juõn ej iion nan in kariap enana, armij eo rej naruõn emaroñ ta?

¹⁴ Ñan kõkkar, jen ba bwe kwoj yokwe ajiri ro nejõm im family eo am elap air mõnõnõ. Inem juõn ian ri turõm ej kariap yuk, im ej ba bwe enana wãwen am lale family eo am. Ta elañe ri turõm in ej ba bwe ajiri ro nejõm rejjab yokwe yuk, air bed ibbam ej kinke ejelok air maroñ in kãlet, im ren kar ilok jen mweo elañe juõn ear kwalok kilen. Kwomaroñ ba: ‘Eban otem ban!’ Aet, ak en ewi wãwen am maroñ kamole? Jet jemen im jinen ro remaroñ uak ilo air lukkun illu. Ak ijellokin an kalaplok inebata ko, ilulu eo air enaj kar rejetake nan in riap ko. Juõn wãwen emõnlok ñan jelmaik riap in ej ñan lelok ien bwe eo ej liakelok yuk en make kamol nan ko an im bwe ajiri ro nejõm ren make kamelele kin air lukkun yokwe yuk.

15. Jehovah ear kãlet wãwen et eo bwe en wõnmaik jumae eo an Satan?

¹⁵ Jehovah ej einwõt jemen eo ej yokwe nejin. Im jemaroñ kõkkar Adam im Eve ñan ro nejin, im Satan einwõt ri turin eo e riap. Ear menin meletlet bwe Anij ear jab mõkaj in kokkure Satan, Adam, im Eve ak ear kõtlok air mour manlok wõt. Bebe in ear kabellok ien ñan jemed im jined ro moktata bwe ren jino kobrak lal kin armij, im ear bellok ien an Satan maroñ kamol an in nan bwe uak in aitwerõk kein ren alikar. Bõtab, jen jinoin, Anij ear jelã bwe jet ian armij ro renaj tiljek wõt ñan e im kamol an Satan riap. Elap ad kamolol kin an Jehovah kajerammõn im jibañ wõt ro rej yokwe e!​—2 Kronikel 16:9; Jabõn Kennan Ko 15:3.

EMWIJ KAMOLE TA?

16. Ewi wãwen an kar lal in bo ilo kajur eo an Satan?

¹⁶ Ilo enañin aolepen bwebwenato an armij, Satan ear maroñ anemkwoj bwe en jerbale kõnan ko an ion armij. Ijellokin men ko jet, ear jerbale maroñ eo an ion kien ko rekajur im ear kowõnmanlok kabuñ ko rittino wãwen air tel armij ñan e im jab ñan Jehovah. Ilo wãwen in Devil eo ear erom “anij in lõl in,” im kar bar naetan “iroij in lõl in.” (2 Dri Korint 4:4; Jon 12:31) Ilo mol, “aolepen lõl ej berwõt ilo dri nana eo.” (1 Jon 5:19) Ej melelen bwe emwij an Satan kamol an maroñ kareel armij otemjej jen Jehovah Anij ke? Alikar ejjab! Ke ear kõtlok an Satan bed, Jehovah ear wõnmanlok wõt im kajejjet karõk ko an make. Inem, ta eo, Bible ej kalikar kin an Anij kõtlok nana?

17. Ta melele ko jen debiji wõt kin unin an wõr nana im eñtan?

¹⁷ Nana im eñtan rejjab jen Jehovah. Kinke Satan ej iroij in lal in im anij in lal in, e kab ro don rar nawãwen bed eo an armij ro kiõ im buromõj otemjej armij ro rej eñtan kake. Ejelok en emaroñ jimwe an ba bwe Anij ej okran abañ kein.​—Dri Rom 9:14.

18. An Jehovah kõtlok bwe en wõr nana im eñtan ear kamol ta kin an armij bukõt air jenolok jen Anij?

¹⁸ An Jehovah kõtlok nana im eñtan ear kamol bwe jenolok jen Anij ejjab maroñ bõktok juõn lal emõnlok. Ealikar, bwebwenato in lal eobrak kin ejouj in jorrãn ko. Unin an eindein ej kinke armij ro rar kãlet ial in anemkwoj eo air im ejelok air kautiej nan ko an Anij im ankil an. Ke ro don Jehovah in etto im ri tel ro air renana rar jibadõk “ial ebuñbuñ” im jolok an in nan, jemlokair kar jerata. Ikijen Jeremiah, ri kanan eo an, Anij ear jiroñ ir: “Ri meletlet ro ami rejook. Relelñoñ im renaj bo. Lo! Rar jolok nan ko an Jehovah, im ebed ia air meletlet?” (Jeremiah 8:5, 6, 9, NW) Armij otemjej ilal, kin air jab lor nan in kaiñi ko an Jehovah, rej einwõt juõn wa in lojet im ejelok an jebwe, ej betobetak kin limajnono in lojet.

19. Ta kein kamol bwe Satan ejjab maroñ ukõt armij otemjej nae Anij?

¹⁹ An Anij kõtlok bwe en bedwõt nana im eñtan ear bar kamol bwe Satan ear jab maroñ kareel armij otemjej jen Jehovah. Bwebwenato in lal ej kalikar bwe aolep ien ear wõr armij ro im rar tiljek wõt ñan Anij jekdon ta kabo ak abañ ko rar iioni. Iumin elõñ buki yiõ ko, kajur eo an Jehovah ear alikar kin ri karejar ro an, im emwij kabuñbuñ etan iaolepen lal. (Exodus 9:16; 1 Samuel 12:22) Book in Dri Hibru jebta 11 ej jiroñ kij kin elõñ ri tõmak ro, ekoba Abel, Enoch, Noah, Abraham, im Moses. Book in Dri Hibru 12:1 ej naetair ‘dri kennan, einwõt juõn kõro elap.’ Rar mõttan joñok ko kin tõmak ebin ñan Jehovah. Ilo ran kein ad bareinwõt, elõñ rar debij wõt air tiljek ñan Anij jekdon mij. Ikijen air tõmak im yokwe, rein kajjojo rar kamol bwe Satan ejelok an maroñ ukõt aolep armij ñan jumae Anij.

20. An Jehovah kõtlok bwe nana im eñtan ren wõnmanlok wõt ear kamol ta kin Anij im armij ro?

²⁰ Eliktata, an Jehovah kõtlok bwe nana im eñtan ren wõnmanlok wõt ear letok kein kamol bwe maroñ im jimwe in iroij ion armij ro ej ibben Jehovah wõt, Ri Kõmanman eo, ñan air maroñ bõk jerammõn im mõnõnõ ñan indio. Iumin elõñ buki yiõ ko, armij rar kajeoñ elõñ kain kien. Ak ta jemlokair? Abañ ko relap im jorrãn ko rej jelmaik ri ailiñ ko rainin ebwe air kamol, einwõt an Bible eo kalikar, bwe “armij rar iroij ion armij ñan air jorrãn.” (Ecclesiastes 8:9, NW) Jehovah wõt emaroñ lomoren kij im kajejjet karõk eo an jen jinoin. En ewi wãwen an kõmmane men in, im ñããt?

21. Ta enaj walok ñan Satan, im naj kajerbal wõn ñan kajejjet men in?

²¹ Jen ien eo Adam im Eve rar bo ilo kabo eo an Satan, Anij ear kalikar karõk eo an kin lomor. Eñin men eo Jehovah ear kwalok kin Satan: “Inaj likit kijirãt ikõtam im kõra eo, im ikõtan ineõm im inen: e naj kokkure bõrõm im kwo naj kokkure jimwin neen.” (Jenesis 3:15) Nan in kejelã in ear kamol bwe naj jamin kõtlok bwe kõmman ko renana an Devil eo ren bedwõt indio. Einwõt King in Ailiñ eo an Messiah, Inen kallimur eo, Jesus Christ, enaj ‘kokkure bõran Satan.’ Aet, Jesus “e naj mõkaj” in juri ri jumae eo Satan!​—Dri Rom 16:20.

TA EO KWONAJ KÕMMANE?

22. (a) Ta kajitõk ko kwonaj aikwij jelmaiki? (b) Meñe Satan ej kwalok an illu nae ro retiljek ñan Anij, rein remaroñ liki ta?

²² Kwonaj jutak im rejetak wõn kiõ, kin am melele kin aitwerõk in? Kwon kamol ke ikijen jerbal ko am retiljek bwe kwoj rejetake Jehovah? Ke Satan ejelã bwe ien eo an ekadu, enaj kamaat an illu nae ro im rekõnan debij air tiljek wõt ñan Anij. (Reveles̃õn 12:12) Ak kwomaroñ reilok ñan Anij kin jibañ kinke “Anij e jela kijkan an kõtlok ro remõn jen men in kabo.” (2 Piter 2:9) Ejamin kõtlok bwe ren kabo yuk elaplok jen am maroñ, im enaj kõmman ial in ko bwe kwon ellã jen kabo ko.​—1 Dri Korint 10:13.

23. Kin liki elap jemaroñ reimanlok ñan ta?

²³ Kin liki elap, jen reimanlok ñan ien eo ñe King eo Jesus Christ enaj bõk kunan nae Satan im aolep ro rej lore. (Reveles̃õn 20:1-3) Jesus enaj kokkure aolep ro im ewõr air eddo kin jerata ko im jorrãn ko armij rar eñtan kake. Mae ien eo, juõn kein kaeñtan elap ej ad luji ro rejitenburu ibbed ilo mij. Ñan jelã ta eo ej walok ñan ir read manlok wõt ñan katak eo imad.

ETALE JELÃLOKJEN EO AM

Ewi wãwen ad jelã bwe unin an armij ro eñtan ejjab jen Jehovah?

Ta aitwerõk ko Satan ear jomantak ilo Eden im ear alikar ilo ran ko an Job?

An Anij kõtlok bwe en wõr eñtan ear kamol ta?