Serpent Jinibõrõrõ Eo

SERPENT in ej bouti alal eo ej juõn lukkun serpent ke? Ejjab. Kar kõmõne serpent eo jen jinibõrõrõ. Jeova e ar jiroñ Moses bwe en likit e ion alal eo bwe armij ro re maroñ reilok ñõn e im mour. Ak serpent ko jet ion lol rej lukkun serpent. Emwij air kiji armij ro im kõmõn bwe ren nañinmij. Kwo jela ke ta unin?

Ej kinke dri Israel ro r’ar konono nae Anij im Moses. Rej aol im ba: ‘Etke kw’ar ãñintok kim jen Ijipt bwe kimin mij ilo ene jemaren in? Ejelok kijõm bred, im ejelok dren. Im kim ñate am mõña manna in.’

Ak emõn manna eo ñõn mõña. Emwij an Jeova lelok e ñõn ir ikijen juõn men in kabwilõñlõñ. Im kin juõn men in kabwilõñlõñ e ar lelok ñõn ir dren bareinwõt. Ak armij ro rejjab kamolol wãwen Anij e ar kejbarok ir. Kin men in Jeova ej jilkinlok serpent kein re poisõn ñõn kajeik dri Israel ro. Serpent ko rej kiji ir, im elõñ iair re mij.

Inem armij ro rej itok ñõn Moses im ba: ‘Kim ar jerawiwi, kinke kim ar konono nae Jeova im kwe. Kiõ kwon jar ñõn Jeova bwe en bõklok serpent ko jen ibõm.’

Inem Moses ej jar kin armij ro. Im Jeova ej jiroñ Moses bwe en kõmõne serpent in jen jinibõrõrõ. Ej ba bwe Moses en likite ion juõn alal, im bwe jabrewõt eo serpent ko rej kiji en reilok im kalimjek e. Moses ej bokake Anij. Im armij ro me serpent ko r’ar kiji ir rej kalimjek serpent jinibõrõrõ eo im bar mour.

Eor juõn men in ar katak jen men in. Ilo juõn wãwen, kij aolep jej einwõt dri Israel ro me serpent ko r’ar kiji ir. Jej otemjej mij. Kwon reito-reitak iballakõm, im kwo naj lo bwe armij ro rej ridtolok, nañinmij, im mij. Eñin kinke man im kõra eo moktata, Adam im Iv, r’ar ilok jen Jeova, im jej ro nejiir. Ak emwij an Jeova na wãwen bwe jen bõk mour in drio.

Jeova e ar jilkintok Nejin, Jisõs Kraist, ñõn lõl. R’ar totoik Jisõs ion juõn alal, kinke elõñ armij ro r’ar lemnõk bwe e nana. Ak Jeova e ar letok Jisõs bwe en lomoren kij. Elañe jej reilok ñõn e, im lor e, je maroñ bõk mour in drio. Ak enaj laplok ar katak kin men in tokelik.