Kõm̦m̦an Wõt Wõnm̦aanl̦o̦k Ãinwõt Juon Rukwal̦o̦k Naan
1. Waanjoñak ta ko jãn epepen eo kein kajuon rej kaalikkar bwe jej aikuj kõm̦m̦an wõt wõnm̦aanl̦o̦k ãinwõt juon rukwal̦o̦k naan?
1 Kũrjin ro rem̦ool rej aikuj kõm̦m̦an wõt wõnm̦aanl̦o̦k ãinwõt juon rukwal̦o̦k naan. Eñin unin an Jijej kar katakin im kammineneik rũkal̦oor ro an bwe en l̦apl̦o̦k aer kapeel ilo jerbal in kwal̦o̦k naan. (Luk 9:1-5; 10:1-11) Bareinwõt eñin unin Akula im Prisilla rar bõk Apollõs im “kõmel̦el̦eik im kaalikkarl̦o̦k ial̦ in Anij ñane.” (Jrb. 18:24-26) Paul ear rõjañ Timote bwe en bar kõm̦m̦ane men in meñe ear lukkuun jel̦ã kilen kwal̦o̦k naan. Ear rõjañe bwe en wõnm̦aanl̦o̦k wõt im kakõm̦anm̦anl̦o̦k wãween an katakin bwe ‘armej otemjej ren maroñ lo an wõnm̦aanl̦o̦k.’ (1 Ti. 4:13-15, UBS) Jekdo̦o̦n ewi toon ad kar jerbal ñan Irooj ãinwõt juon rukwal̦o̦k naan kõn nuuj eo em̦m̦an, ak jej aikuj wõnm̦aanl̦o̦k wõt im kal̦apl̦o̦k ad kapeel ilo ad kwal̦o̦k naan.
2. Ewi wãween ad maroñ katak jãn ro jet?
2 Katak jãn Ro Jet: Juon wãween emaroñ jipañ kõj ñan kal̦apl̦o̦k kapeel ko ad ej ilo ad katak jãn ro jet. (JK. 27:17, UBS) Kõn men in, ñe rukwal̦o̦k eo m̦õttam̦ ej kwal̦o̦k naan ñan rũm̦weo, em̦m̦an ñe kwõj lukkuun roñjake. Kwõmaroñ bar kajjitõk jipañ jãn rukwal̦o̦k ro el̦ap aer wãjepdik im jel̦ã kilen kwal̦o̦k naan. Im kwõn lukkuun roñjake ñe rej kwal̦o̦k kõn wãween ko remaroñ bar jipañ eok ñan lo tõprak ilo kwal̦o̦k naan. (JK. 1:5) Kwõjaje ke ta eo kwõn ba im kõm̦m̦ane ñe kwõj jepl̦aak ippãn armej ro, jino katak Baibõl̦ ippãer, ak kõjerbal kõl ko jet ilo kwal̦o̦k naan? Ñe ãindein, eokwe em̦m̦an kwõn kepaak em̦m̦aan eo ej bõk eddon kumi in kwal̦o̦k naan eo am̦ bwe en jipañ eok. Ñe ejjab, kwõmaroñ kajjitõk jipañ ippãn juon rukwal̦o̦k naan eo el̦ap an jel̦ã kwal̦o̦k naan. Bareinwõt, keememej bwe kajoor eo an Jeova emaroñ jipañ kõj bwe jen jel̦ãl̦o̦k kõjerbal kapeel im maroñ ko ippãd. Kõn men in, jen jar im kajjitõk aolep iien bwe en jipañ kõj.—Luk 11:13.
3. Ta eo jen kõm̦m̦ane ñe juon ej kwal̦o̦k ta ko jemaroñ kakõm̦anm̦anil̦o̦k meñe jaar jab kajjitõk jipañ?
3 Jab m̦õkaj im illu el̦aññe juon ej kwal̦o̦k waj ta ko kwõmaroñ kakõm̦anm̦anil̦o̦k meñe kwaar jab kajjitõk jipañ jãne. (Ekl. 7:9) Ãinwõt Apollõs, jen kõttãik kõj im kwal̦o̦k ad kam̦m̦oolol ñe juon ej kajjioñ in jipañ kõj. Ilo wãween in, jej kwal̦o̦k mãlõtlõt.—JK. 12:15.
4. Ta un eo el̦ap an aorõk unin ad aikuj kõm̦m̦an wõt wõnm̦aanl̦o̦k ãinwõt juon rukwal̦o̦k naan?
4 Wõnm̦aanl̦o̦k ko Rej Nõbar Anij: Jijej ear kwal̦o̦k juon waanjoñak ñan rõjañ rũkal̦oor ro an ñan kõm̦m̦an wõnm̦aanl̦o̦k ãinwõt rukwal̦o̦k ro. Ear kõkkar kõn e make ñan juon wõjke vain ak kũreep im ra ko raan rej kõkkar kõn rũkkapit ro rũkal̦ooran. Ear ba bwe Jemãn ej karreoik ak m̦wijiti kajjojo ra ko rej kalle “bwe ren erreo im en lõñl̦o̦k aer kalle.” (Jon 15:2, UBS) Juon eo ewõr an jikin kallibin wõjke kũreep enaaj kõn̦aan bwe en l̦apl̦o̦k wõt an kalle wõjke ko kõtkan. Ãindein bar kõn̦aan eo an Jeova. Ekõn̦aan bwe en l̦apl̦o̦k wõt ad jel̦ã kilen kwal̦o̦k naan bwe en l̦ap tõprak ko jej loi itok jãn ad kwal̦o̦k kõn “leen tied.” (Hi. 13:15) Ta eo jenaaj kajejjete ñe jenaaj kõm̦m̦an wõt wõnm̦aanl̦o̦k ãinwõt juon rukwal̦o̦k naan? Ej alikkar uwaak eo ilo naan kein an Jijej ke ear ba: “Ilo men in Jema ej aiboojoj, bwe kom̦ij jebar elõñ leen; im ãindein kom̦ naaj rũkal̦oora.”—Jon 15:8.