Kõm̦adm̦õdi Apañ ko kõn Peejnej im Wãween ko Jet

Ãinwõt an wal̦o̦k ilo 1 Korint 6:1-8 (UBS), rijjelõk Paul ej kõnono kõn an ri tõmak ro kinaakl̦o̦k doon ñan jikin ekajet ko. Paul ejjab m̦õn̦õn̦õ kõnke jet iaan Kũrjin ro ilo Korint rar bõkl̦o̦k abn̦õn̦õ ko aer ñan “ri ekajet ro repeikan.” (Eoon 1) Paul ej kwal̦o̦k un ko rem̦m̦an unin an Kũrjin ro jab aikuj bõkl̦o̦k abn̦õn̦õ ko aer n̦ae doon ñan jikin ekajet ko an lal̦. Ear ba bwe ñe ej wal̦o̦k apañ ko, rej aikuj kõm̦adm̦õdi ilo aer l̦oore laajrak im karõk ko ilo eklejia eo. Jen kiiõ etale jet un ko unin an kar Paul lel̦o̦k naan in kakapilõk in ñan armej rein. Im jenaaj bar etale jet apañ ko me remaroñ jab ekkejell̦o̦k ñan naan in kakapilõk kein an Paul.

Jet iien emaroñ wal̦o̦k abn̦õn̦õ ko ikõtaan ruo ri tõmak ñe rej peejnej ippãn doon, ñe ej wal̦o̦k jerbal ko rejjab jim̦we, ak apañ ko kõn wãto im bwidej. Ñe ej wal̦o̦k wãween kein im wãween ko ãierl̦o̦kwõt, jen m̦okta kõm̦adm̦õde apañ kein ilo ad l̦oori l̦õmn̦ak ko an Jeova, im jab l̦õmn̦ak ko ad make. (Jabõn Kõnnaan 14:12, UBS) Jijej ear ba bwe em̦m̦anl̦o̦k ñe jej kõm̦adm̦õde juon apañ m̦okta jãn an l̦apl̦o̦k wõt. (Matu 5:23-26) Ekabũrom̦õjm̦õj bwe jet Kũrjin rekõn̦aan wõt akwããl im rej bõkl̦o̦k abn̦õn̦õ kein aer n̦ae ri tõmak ro m̦õttaer ñan jikin ekajet ko. Paul ear ba: “Ealikkar ami lukkuun bõd bwe kom̦ij akwããle doon ilo kien.” Etke? Un eo el̦aptata ej kõnke ñe ri tõmak rein rej jum̦aeik doon ilo jikin ekajet, men in ej lukkuun kõm̦m̦an bwe en nana etan eklejia eo ak kabuñ eo ad. Bareinwõt, men in ej kattoon etan Anij eo me jej kabuñ ñane. Eñin unin jej aikuj lukkuun kõl̦mãnl̦o̦kjen̦ kõn kajjitõk in an Paul ke ear ba: “[Ta] ejjab em̦m̦anl̦o̦k bwe ren bõd n̦ae kom̦ ke?”​—Eoon 7.

Paul ear bar ba bwe em̦õj an Anij kõm̦m̦an karõk ko ilo eklejia eo ñan jipañ kõj kõm̦adm̦õdi elõñ kain apañ ko. Em̦m̦aan ro me rej lale eklejia eo rejel̦ã kõn katak ko rem̦ool jãn Baibõl̦. Paul ear ba bwe em̦m̦aan rein remaroñ “kajim̦we kõtaan ro jemjein jimjãtin” ñe ej itok ñan apañ ko an “mour in.” (Eoon 3-5) Ak ta el̦aññe juon iaan ri tõmak ro m̦õttad ewõr ruõn ippãd kõn an riab im ko̦o̦t ilo an jerbal? Eokwe, ñe ej wal̦o̦k bõd ko rel̦l̦ap ãinwõt in, Jijej ear kwal̦o̦k jilu men ko me jej aikuj kõm̦m̦ani. M̦oktata, ej aikuj kõtaad wõt im armej eo ñan kõm̦adm̦õde apañ eo. Kein karuo, el̦aññe ejjab tõprak wãween eo kein kajuon, eokwe jen ãñin juon ak ruo ad ri kam̦ool im jen bar ilo̦k ippãn armej eo im kõm̦adm̦õd apañ eo. Kein kajilu, el̦aññe ejjab tõprak wãween eo kein karuo, eokwe jen kõnnaanek l̦o̦k em̦m̦aan ro rej lale eklejia eo kõn apañ in.​—Matu 18:15-17, UBS.

Ta jerbal eo an em̦m̦aan ro rej lale eklejia? Eokwe, rejjab lel̦o̦k naan in kakapilõk ko ãinwõt l̦oãr ro ak ri peejnej ro. Rejjab tipdiki l̦o̦k aolep men ko ri tõmak ro rej aikuj kõm̦m̦ani ñe ej wal̦o̦k apañ ko kõn peejnej ak wãto im men ko jet. Bõtab, jerbal eo aer ej ñan jipañ ri tõmak rein bwe ren jerbali naan in kakapilõk ko jãn Baibõl̦ im bwe en wõr aenõm̦m̦an. Ñe em̦m̦aan rein rejjab lukkuun jel̦ã ta ko rej aikuj kõm̦m̦ani, eokwe rej kajjitõk jipañ ippãn em̦m̦aan eo me ej lol̦o̦k eklejia ko ak ippãn ra eo an Ri Kõnnaan ro an Jeova. Bõtab, ewõr jet kain abn̦õn̦õ ak keej ko me rejjab ekkejell̦o̦k ippãn naan in kakapilõk ko an Paul. Ta jet iaan men kein?

Jet iien, ri tõmak ro rej aikuj ilo̦k ñan jikin ekajet bwe en maroñ wõr aenõm̦m̦an im en tõprak jerbal ko aer. Ta apañ kein? Eokwe, jet iaaer ej ñe ruo ri pãlele rej kõm̦m̦an aer peba in jepel, im wõr apañ kõn wõn eo ajri eo ej aikuj jokwe ippãn. Bareinwõt, ñe juon kõrã ekõn̦aan bwe jemen ajri eo nejin en jipañ erro kõn jããn, wal̦o̦k apañ ko kõn jããn in jipañ ko (insurance), im ñe jekõn̦aan bwe armej ro ren l̦oore peba in mãlim ak kallim̦ur ko an juon eo me emej. Bar jet iien, ñe juon ej kõm̦m̦ane juon an keej (sue) n̦ae juon ri tõmak, eokwe ri tõmak in emaroñ bar kõm̦m̦ane juon an keej (countersue) n̦ae armej in ñan kõjparok e make.a

El̦aññe jej kõm̦m̦an ad keej rot kein, jej aikuj kõm̦m̦ane ilo jouj im jab akwããle doon. Ñe jej ãindein, eokwe jej l̦oore naan in kakapilõk ko an Paul.b Kũrjin ro rej aikuj keememej bwe men eo el̦aptata an aorõk ej ñan kõm̦m̦an bwe en utiej im kwõjarjar ãt eo etan Jeova. Bareinwõt, ej ad aolep eddo ñan kõm̦m̦an bwe en wõr aenõm̦m̦an im bõrokuk ilo eklejia eo. El̦ap an alikkar wõn ro rej rũkal̦oor ro an Kũraij kõn an wõr yokwe ippãer, im ‘rejjab l̦õmn̦ak kõn er make.’​—1 Korint 13:4, 5, UBS; Jon 13:34, 35.