KATAK 01
Ewi Wãween Baibõl̦ eo Emaroñ Jipañ Eok?
Enañin kõj aolep ewõr ad kajjitõk kõn mour, ad eñtaan, mej, im kõn ilju im jekl̦aj. Jej bareinwõt inepata kõn men ko rej wal̦o̦k ilo mour kajjojo raan, ãinwõt kilen ad kabwe aikuj ko ad im wãween eo ñan lo m̦õn̦õn̦õ ilo mourin baam̦le. Elõñ armej rej lo bwe Baibõl̦ eo ejjab baj uwaaki wõt kajjitõk ko rel̦l̦ap kõn mour, ak ej bar letok naanin kakapilõk ko rejejjet ñan mour ko ad kajjojo raan. Kwõl̦ak lale Baibõl̦ eo emaroñ ke jipañ kõjwõj aolep?
1. Ta jet iaan kajjitõk ko Baibõl̦ ej uwaaki?
Baibõl̦ ej uwaaki kajjitõk kein raorõk: Ewi wãween an kar mour jino wal̦o̦k? Ta unin ad mour? Etke armej ro rem̦m̦an rej eñtaan? Ta eo ej wal̦o̦k ñe juon armej ej mej? El̦aññe eñin kon̦aan eo an aolep armej bwe en wõr aenõm̦m̦an, innem etke elukkuun l̦ap tarin̦ae? Ta eo enaaj wal̦o̦k ñan lal̦ in ilju im jekl̦aj? Baibõl̦ eo ej rõjañ kõj ñan pukot uwaak ko ñan kajjitõk rot kein. Elõñ milien armej ro em̦õj aer lo uwaak ko jãn Baibõl̦, im uwaak kein rej kõm̦m̦an bwe en lukkuun jubũrueer.
2. Ewi wãween Baibõl̦ eo emaroñ jipañ kõj ñan lo m̦õn̦õn̦õ ilo mour ko ad kajjojo raan?
Baibõl̦ eo ej letok naanin kakapilõk ko rem̦m̦an. Ñan waanjoñak, ej katakin baam̦le ko kõn wãween remaroñ lo m̦õn̦õn̦õ eo em̦ool. Bareinwõt, ej letok naanin kakapilõk ko kõn wãween jemaroñ lo m̦õn̦õn̦õ ilo jerbal ko ad im ta ko jemaroñ kõm̦m̦ani ñe elukkuun l̦ap ad inepata. Kwõnaaj katak kõn ta eo Baibõl̦ eo ej ba kõn men kein im ebar lõñ men ko jet ilo ad naaj etale katak kein ippãn doon. Ilo am̦ katak, kwõmaroñ jino kile im errã bwe “aolep Jeje ko [ak aolep men ko ilo Baibõl̦] . . . ewõr tokjãer.”—2 Timote 3:16.
Bok in ejjab bõk jikin Baibõl̦ eo. Bõtab ej rõjañ eok ñan etale Baibõl̦ eo. Kõn men in, jej kõn̦aan rõjañ eok ñan riiti eoon ko em̦õj kõllaajraki ilo katak kein im keidi ñan men ko kwõj katak kaki.
KAM̦WILAL̦L̦O̦K AM̦ MEL̦EL̦E
Katak kõn wãween an Baibõl̦ kar jipañ armej ro, wãween eo kwõmaroñ lo m̦õn̦õn̦õ ilo am̦ riiti, im etke em̦m̦an ñan bõk jipañ ñan am̦ maroñ mel̦el̦e kõn Baibõl̦ eo.
3. Baibõl̦ eo emaroñ tõl kõj
Baibõl̦ eo ej ãinwõt juon meram ekajoor. Jemaroñ kõjerbale ñan tõl kõj ñan kõm̦m̦ani pepe ko rem̦m̦an, im ñan jipañ kõj jel̦ã kõn ta ko renaaj wal̦o̦k ilju im jekl̦aj.
Riit Sam 119:105, im bwebwenato kake kajjitõk kein:
Ewi wãween an kar ri-jeje sam in watõk Baibõl̦ eo?
Ewi wãween am̦ watõk Baibõl̦ eo?
4. Baibõl̦ eo emaroñ uwaaki kajjitõk ko ad
Juon kõrã ear lo an Baibõl̦ eo uwaaki kajjitõk ko an me eto an kar inepata kaki ium̦win elõñ iiõ. Kõjo̦e PIJAIN ALWÕJ eo, innem bwebwenato kake kajjitõk kein:
Ilo pija eo, kain kajjitõk rot ko kõrã in ear l̦õmn̦ak kaki?
Ewi wãween an kar katak Baibõl̦ jipañe?
Baibõl̦ eo ej rõjañ kõj ñan kwal̦o̦k kajjitõk ko. Riit Matu 7:7, innem bwebwenato kake kajjitõk in:
Ta kajjitõk ko kwõj l̦õmn̦ak kaki me kwõl̦ak lale Baibõl̦ eo emaroñ uwaaki?
5. Kwõmaroñ m̦õn̦õn̦õ ilo am̦ riiti Baibõl̦ eo
Elõñ armej rej m̦õn̦õn̦õ ilo aer riiti Baibõl̦ eo im el̦ap aer bõk tokjãn jãne. Kõjo̦e PIJAIN ALWÕJ eo, innem bwebwenato kake kajjitõk kein:
Ilo pija eo, ewi wãween an kar jo̦dikdik ro l̦õmn̦ak kõn riit?
Meñe ejjab lukkuun em̦m̦an ippãer riit, ak etke eoktak ñe rej riit Baibõl̦?
Baibõl̦ ej ba bwe emaroñ letok naanin tõl ko me rej kaenõm̦m̦an kõj im bareinwõt letok juon kõjatdikdik ñan kõj. Riit Rom 15:4, innem bwebwenato kake kajjitõk in:
Kwõj ke itoklimo kõn an Baibõl̦ kallim̦ur kõn juon kõjatdikdik em̦m̦an im ilo an letok naanin kaenõm̦m̦an ko?
6. Ro jet remaroñ jipañ kõj ñan mel̦el̦e kõn Baibõl̦ eo
Elõñ rej lo bwe el̦ap an jipañ er ñe rej bwebwenato kake men ko rej riiti ilo Baibõl̦ eo ippãn ro jet ijello̦kun aer baj riiti wõt ippãer make. Riit Jerbal 8:26-31, innem bwebwenato kake kajjitõk in:
Ta eo emaroñ jipañ kõj ñan mel̦el̦e kõn Baibõl̦ eo?—Lale eoon 30 im 31.
Em̦m̦aan in Itiopia eo ear aikuj jipañ ñan an mel̦el̦e kõn Naanin Anij. Elõñ rej lo bwe el̦ap an jipañ er ñe rej bwebwenato kõn Baibõl̦ eo ippãn ro jet
JET ARMEJ REJ BA: “Elukkuun waste time katak Baibõl̦.”
Enaaj kar ewi wãween am̦ uwaak? Im etke?
TARLEP IN KATAK EO ILO TUKADU
Baibõl̦ eo ej letok naanin kakapilõk ko rejejjet ñan mour ko ad kajjojo raan, ej uwaaki kajjitõk ko el̦ap aer aorõk, im ej kaenõm̦m̦an kõj im letok juon kõjatdikdik em̦m̦an.
Ãlij
Kain naanin kakapilõk rot ko jemaroñ loi ilo Baibõl̦?
Ta jet iaan kajjitõk ko Baibõl̦ ej uwaaki?
Ta ko kokõn̦aan katak jãn Baibõl̦ eo?
KAL̦APL̦O̦K AM̦ MEL̦EL̦E
Lale ewi wãween an naanin kakapilõk ko ilo Baibõl̦ jejjet ñan kõj ilo raan kein.
“Katak ko ilo Baibõl̦—Iien Otemjej Ewõr Tokjãer” (Naan in Keeañ No. 1 2018)
Lale wãween an kar Baibõl̦ eo jipañ juon em̦m̦aan me jãn ke ear dik ear bõk eñjake im l̦õmn̦ak ko rekabbweerer im nana.
Etale naanin kakapilõk ko ilo Baibõl̦ me rejejjet ñan mourin baam̦le.
Lale wãween an Baibõl̦ kajim̦we mel̦el̦e eo ebõd me ekkã an armej ro bõke kõn wõn eo ej lukkuun irooj in lal̦ in.