KATAK 45
Mel̦el̦ein Ad Jab Bõk Kun̦aad ilo Aitwerõk ak M̦akũtkũt ko an Lal̦ In
Jesus ear ba ñan ri-kal̦oor ro an bwe rej aikuj “jab m̦õttan lal̦ in.” (Jon 15:19) Men in ej kitibuj ad jab bõk kun̦aad ilo m̦akũtkũt ko an lal̦ in, mel̦el̦ein bwe jejjab aikuj pãd ilo juon jait ilo kien ko an lal̦ in im ilo tarin̦ae ko. Bõtab, ejjab aolep iien epidodo ñan jab bõk kun̦aad ilo men kein. Remaroñ kajjirere kake kõj kõn ad kõm̦m̦ane men in. Ewi wãween jemaroñ jab bõk kun̦aad im tiljek wõt ñan Jeova Anij?
1. Ewi wãween an Kũrjin ro rem̦ool watõk kien ko an armej?
Kũrjin ro rej kautiej kien. Jej kõm̦m̦ane men eo Jesus ear ba im “lel̦o̦k ñan Sizar men ko an Sizar”—mel̦el̦ein bwe jej pokake kien ko an aelõñ eo. Ñan waanjoñak, jej pokake kakien eo ñan kõl̦l̦ã eowõj. (Mark 12:17) Baibõl̦ eo ej katakin bwe un eo wõt unin an kien ko an armej maroñ tõl ej kõnke Jeova ej kõtl̦o̦k bwe ren tõl. (Rom 13:1) Innem jej kile bwe kien ko an armej, ewõr joñan aer maroñ ñan tõl. Kõn men in, jej reilo̦k ñan Anij eo ad im Aelõñ eo an ilañ ñan n̦amejal̦an apañ ko an armej.
2. Ewi wãween ad maroñ kaalikkar bwe jejjab bõk kun̦aad ilo aitwerõk ak m̦akũtkũt ko an lal̦ in?
Ãinwõt Jesus, jejjab bõk kun̦aad ilo aitwerõk ko an kien. Ãlikin an armej ro loe an Jesus kõm̦m̦ane juon iaan menin bwilõñ ko, rar kõn̦aan kõm̦m̦an bwe en aer kiiñ ak Jesus ear jab kõtl̦o̦k aer kõm̦m̦ane men in. (Jon 6:15) Etke? Kõnke ãinwõt an kar ba tokãlik, “Aelõñ eo aõ ejjab m̦õttan lal̦ in.” (Jon 18:36) Ãinwõt ri-kal̦oor ro an Jesus, jej kaalikkar bwe jejjab bõk kun̦aad ilo aitwerõk ko an lal̦ in ilo jet wãween ko. Ñan waanjoñak, jejjab bõk kun̦aad ilo tarin̦ae. (Riit Maika 4:3.) Meñe jej kwal̦o̦k kautiej ñan men ko rej jutak kõn aelõñ eo ak kien eo, ãinwõt bõl̦eak ko, ak jejjab kabuñ ñan men kein. (1 Jon 5:21) Im jejjab kããlõt ñan rejetake ak jab rejetake juon bade in kien ak juon armej ilo kien. Ilo wãween kein im wãween ko jet, jej kwal̦o̦k bwe jej tiljek wõt ñan kien eo an Anij—Aelõñ eo an.
KAM̦WILAL̦L̦O̦K AM̦ MEL̦EL̦E
Etale jet iaan wãween ko jemaroñ iiooni me remaroñ mãlejjoñe ad jab bõk kun̦aad ilo aitwerõk ko an lal̦ in, im lale ewi wãween kwõmaroñ kõm̦m̦ani pepe ko rej kabuñbũruon Jeova.
3. Kũrjin ro rem̦ool rejjab bõk kun̦aaer ilo aitwerõk ko an lal̦ in
Jesus im ri-kal̦oor ro an rar likũt juon joñak ñan kõj. Riit Rom 13:1, 5-7 im 1 Piter 2:13, 14. Tokãlik, kõjo̦e PIJAIN ALWÕJ eo innem bwebwenato kake kajjitõk kein:
Etke jej aikuj kwal̦o̦k kautiej ñan kien ko an lal̦ in?
Ta jet iaan wãween ko jej kwal̦o̦k bwe jej kõttãik kõj ñan er?
Ilo iien tarin̦ae ko, jet aelõñ ko rej ba bwe rejjab bõk kun̦aaer, ak rej lel̦o̦k jipañ ñan jait ko ruo jim̦or. Ta lukkuun mel̦el̦ein ad jab bõk kun̦aad? Riit Jon 17:16. Tokãlik, kõjo̦e PIJAIN ALWÕJ eo innem bwebwenato kake kajjitõk in:
Ta mel̦el̦ein ad jab bõk kun̦aad ilo aitwerõk ko an lal̦ in?
Ak ta el̦aññe kien eo ej kakien kõj ñan kõm̦m̦ane juon men me ej n̦ae kien eo an Anij? Riit Jerbal 5:28, 29. Tokãlik, kõjo̦e PIJAIN ALWÕJ eo innem bwebwenato kake kajjitõk kein:
El̦aññe kien ko an armej rej idaaptõk ippãn kien ko an Anij, kien ta ko jej aikuj pokake?
Kwõmaroñ ke l̦õmn̦ak kõn jet wãween ko juon Kũrjin emaroñ iiooni me emaroñ kõm̦m̦an an jab pokake kien ko an lal̦ in?
4. Kwal̦o̦k am̦ jab bõk kun̦aam ilo aitwerõk ko an lal̦ in ikijjeen wãween am̦ l̦õmn̦ak im kõm̦m̦an
Riit 1 Jon 5:21. Tokãlik, kõjo̦e PIJAIN ALWÕJ eo innem bwebwenato kake kajjitõk kein:
Ilo pijain alwõj eo, etke Ayenge ear pepe ñan jab kobal̦o̦k ilo bade in kien eo ak bõk kun̦aan ilo men ko rej kautiej aelõñ eo, ãinwõt kabuñ ñan bõl̦eak eo?
Kwõj ke l̦õmn̦ak bwe em̦m̦an jokãlõt eo ear kõm̦m̦ane?
Ta wãween ko jet remaroñ mãlejjoñe ad jab bõk kun̦aad ilo m̦akũtkũt ko an lal̦ in? Kõjo̦e PIJAIN ALWÕJ eo, innem bwebwenato kake kajjitõk kein:
Ewi wãween jemaroñ dãpij wõt ad jab bõk kun̦aad ñe ej itok ñan an tiim in iukkure ko jãn aelõñ ko jet jiãiik doon?
Ewi wãween ad maroñ dãpij ad jab bõk kun̦aad ilo kien meñe pepe ko an ri-tõl ro ilo kien rej jelõt kõj?
Ewi wãween an nuuj ko ak ro jej aetõl er maroñ jelõt ad jab bõk kun̦aad ilo m̦akũtkũt ko an lal̦ in?
Ilo wãween et ko juon Kũrjin ej aikuj kate e ñan jab bõk kun̦aan ilo m̦akũtkũt ko ilo wãween an l̦õmn̦ak im kõm̦m̦an?
JUON EMAROÑ KAJJITÕK: “Etke kwõjjab bõk kun̦aam̦ im likũt peim̦ ilo ubõm̦ im salute i bõl̦eak eo, ak al kõn al in aelõñ eo (national anthem)?”
Enaaj kar ta uwaak eo am̦?
TARLEP IN KATAK EO ILO TUKADU
Kũrjin ro rej lukkuun kate er ñan jab bõk kun̦aaer ilo aitwerõk im m̦akũtkũt ko an lal̦ in ilo wãween aer l̦õmn̦ak, kõnnaan, im kõm̦m̦an.
Ãlij
Ta l̦õmn̦ak eo ejim̦we jej aikuj bõke kõn kien ko an armej?
Etke jej dãpij wõt ad jab bõk kun̦aad ilo m̦akũtkũt ko an kien?
Ta wãween ko jemaroñ iiooni me emaroñ mãlejjoñe ad jab bõk kun̦aad ilo aitwerõk ko an lal̦ in?
KAL̦APL̦O̦K AM̦ MEL̦EL̦E
Ta men ko jemaroñ aikuj kaarmejjeteiki bwe jen jab bõk kun̦aad ilo m̦akũtkũt ko an lal̦ in?
Ta ko baam̦le ko remaroñ kõm̦m̦ani ñan kõppojakl̦o̦k im̦aan ñan men ko remaroñ mãlejjoñe aer jab bõk kun̦aaer ilo m̦akũtkũt ko an lal̦ in?
Etke an juon armej jojomare aelõñ eo an ejjab men eo em̦m̦antata emaroñ kõm̦m̦ane ilo mour eo an?
Lale wãween am̦ maroñ jab m̦õttan lal̦ in ñe ej itok ñan pepe ko kwõj kõm̦m̦ani ikijjeen jerbal.
“Jabrewõt Iar E Naj Lelok Nan Kin E Mõke” (Imõniaroñroñ, Juun 1, 2006)