Kajjitõk ko jãn Ro Rej Riit

Ke Setan ear ba ñan Iv bwe eban mej ñe enaaj m̦õñã jãn leen wõjke eo kõn jel̦ã em̦m̦an im nana, ear ke jino kwal̦o̦k ñane kõn mel̦el̦e eo ekkã an ro ilo raan kein l̦õmn̦ake, bwe juon jetõb ak an ilowaad ej mour m̦aanl̦o̦k wõt ãlikin ad mej?

Emaroñ kar jab. Tepil̦ eo ear jab ba ñan Iv bwe ñe enaaj m̦õñã jen leen wõjke eo Anij ear kamoiki, enaaj ãinwõt ñe emej ak juon men ilowaan me jejjab maroñ loe (eñin ej men eo jet rej ba ilo raan kein bwe ej juon jetõb ak an ilowaad me ej mour m̦aanl̦o̦k wõt ãlikin ad mej) enaaj mour m̦aanl̦o̦k wõt ilo bar juon jikin. Ilo an kõjerbal juon jedpãnit bwe en kõnono ñan Iv, Setan ear kwal̦o̦k ñan Iv bwe ñe enaaj m̦õñã jãn leen wõjke eo, ‘ejjãmin mej otem mej’ ñan jidik. Ear ba bwe enaaj wõnm̦aanl̦o̦k wõt im mour, enaaj m̦õn̦õn̦õ kõn juon mour eo em̦m̦anl̦o̦k ioon lal̦, juon mour me eanemkwõj jãn Anij.​—Jen. 2:17; 3:3-5.

El̦aññe katak in eriab kõn an juon jetõb ak an ilowaad mour m̦aanl̦o̦k wõt ãlikin ad mej, ear jab jino jãn jikin Kallib in Iden, innem ñããt eo ear ejaak mel̦el̦e in? Jejjab lukkuun jel̦ã. Ak jejel̦ã bwe aolep katak ko reriab rar jako ilo Ibwijleplep eo ilo raan ko an Noa. Ejjel̦o̦k juon iaan mel̦el̦e ko reriab me an kabuñ ko ear wõnm̦aanl̦o̦k wõt ãlikin Ibwijleplep eo kõnke Noa wõt im baam̦le eo an​—ro em̦ool aer kabuñ—​rar el̦l̦ã im mour.

Kõn men in, katak eo bwe an juon jetõb ak an ilowaad mour m̦aanl̦o̦k wõt ãlikin ad mej emaroñ kar wal̦o̦k ãlikin Ibwijleplep eo. Ke Anij ear pukwõj kajin ko ilo Bebel im kajeplõklõk armej ro “ioon aolepen mejãn lal̦,” ejjel̦o̦k pere rar bõk ippãer mel̦el̦e in bwe ewõr juon jetõb ak an ilowaad me ej mour m̦aanl̦o̦k wõt ãlikin ad mej. (Jen. 11:8, 9) Jekdo̦o̦n ñããt eo mel̦el̦e in eriab ear ijjino, ak jemaroñ lõke bwe “jemãn aolep ri-riab,” Setan Tepil̦ eo, ej pãd ilikin im ej m̦õn̦õn̦õ in loe an ajeeded.​—Jon 8:44.