Jeraam̦m̦an ko ñan Ro Rej Pokake Anij

Ri-kanaan Moses ear ba bwe jemaroñ bõk kõjeraam̦m̦an jãn Anij ñe jej pokake kien ko an. (Duteronomi 10:13; 11:27, UBS) Ejjab unin ad pokake Anij kõnke jej mijak ñe enaaj kaje kõj. Kadkad ko rem̦m̦an kadkadin Anij rej kõm̦akũt kõj ñan pokake e kõnke jej yokwe im jejjab kõn̦aan kõm̦m̦ani men ko me remaroñ kabũrom̦õje. “Eñin mel̦el̦ein yokwe Anij, bwe jen pokake kien ko an.”​—1 Jon 5:3.

Bõtab, ewi wãween ad bõk tokjãn jãn ad pokake Anij? Jen lale ruo wãween ko.

1. POKAKE ANIJ ENAAJ KÕM̦M̦AN BWE JEN MÃLÕTLÕT

“Ña Jeova am̦ Anij, Eo ewõr tokjãn An katakin eok, Eo ej tõl eok ilo ial̦ eo em̦m̦an kwõn etal ie.”​—AISEIA 48:17.

Jeova Anij, eo ej ad ri-Kõm̦anm̦an, ejel̦ã kõn kõj im ej letok naanin tõl ko jej aikuji. El̦aññe jekõn̦aan bwe katak ko an ren jipañ kõj ñan kõm̦m̦ani pepe ko ilo mãlõtlõt, jej aikuj katak jãn Jeje ko Rekkwõjarjar kõn ta ko Anij ekõn̦aan bwe jen kõm̦m̦ani innem jerbali men ko jej katak kaki.

2. POKAKE ENAAJ KÕM̦M̦AN BWE JEN M̦ÕN̦ÕN̦Õ

“Ejeraam̦m̦an armej ro rej roñjake naanin Anij im pokake!”​—LUK 11:28.

Rainin, milien armej ro me rej pokake Naanin Anij rej lañlõñ kõn m̦õn̦õn̦õ eo em̦ool. Ñan waanjoñak, l̦õmn̦ak kõn juon em̦m̦aan ilo Spain me ekajoor m̦õkaj an illu im elukkuun nana an kõm̦m̦an ñan armej ro​—ekoba lio pãleen. Juon raan, ear riiti naan ko an ri-jeje Moses kõn Josep, eo nejin Jekob, kõn kadkad eo kadkadin kõn ineem̦m̦an. Kar wiakake Josep bwe en juon ri-kõm̦akoko innem kar kalbuuji ilo ejjel̦o̦k ekajet jim̦we; ijoke, ear kwal̦o̦k wõt ineem̦m̦an, aenõm̦m̦an, im jeorl̦o̦k bõd. (Jenesis, jebta 37-45) Em̦m̦aan eo ilo Spain ear ba: “Aõ l̦õmn̦ak kõn joñak eo an Josep, ear kõm̦akũt eõ bwe in ejaake kadkad ko ãinwõt ineem̦m̦an, jouj, im jel̦ã dãpij aõ illu. Tokjãn men in, ij kiiõ lañlõñ kõn juon mour elem̦õn̦õn̦õ.”

Jeje ko Rekkwõjarjar ej letok elõñl̦o̦k naanin tõl ko kõn wãween ad aikuj kõm̦m̦an ñan ro jet. Kwõmaroñ kal̦apl̦o̦k am̦ mel̦el̦e kõn men in ilo katak eo tok juon.