Нема престанување во објавувањето на добрата вест
1 Раните христијани ја сфатиле својата служба многу сериозно. Лука известил: „Секој ден во храмот и по куќите не престануваа да поучуваат и да го проповедаат Евангелието за Исуса Христа“ (Дела 5:42). Ништо, дури ни прогонство, не можело да ги спречи! (Дела 8:4). Тие секој ден им зборувале на другите за вистината.
2 Како е со нас? Запрашај се: ‚Дали ја чувствувам итноста на времето? Дали сум склон да продолжам да ја објавувам добрата вест без престан?‘
3 Современи примери за проповедање без престан: Една сестра, жртва на детска парализа, била прикована за апарат за вештачко дишење. Таа не била во можност да оди во Салата на Царството или да присуствува на конгрес. Но, таа била интензивно зафатена со објавувањето на добрата вест. Во текот на нејзиниот 37-годишен „затвор“, била во можност да им помогне на 17 луѓе да ја запознаат вистината! Како го правела тоа? Иако неспособна да оди од врата до врата, таа нашла начин како да сведочи неформално, секој ден, на оние кои дошле во допир со неа.
4 Нашите браќа во Босна морале да се соочат со војна и оскудица. Меѓутоа, тие редовно продолжуваат да им проповедаат на другите. Во Сараево, објавителите зборувале со другите за добрата вест просечно по 20 часа, а во просек секој води по две студии. И покрај нивните тешки околности, тие проповедаат и поучуваат без престан.
5 И младите исто така покажуваат ревност за службата. Едно семејство Сведоци од Руанда било ставено во соба каде што некои војници се спремале да ги убијат. Семејството побарало дозвола прво да се помолат. Им било дозволено и малата ќерка Дебора се молела гласно: „Јехова, оваа недела тато и јас дадовме пет списанија. Како ќе се вратиме кај овие луѓе за да ги поучиме за вистината и да им помогнеме да добијат живот?“ Поради нејзината цврста вера и нејзината љубов кон службата, целото семејство било поштедено.
6 Денес има потреба да се бараат прилики да им се сведочи на другите и да се пронајдат оние кои се „исправно настроени за вечен живот“ (Дела 13:48, НС). Во склад со локалните услови, собраниските старешини прават подготовки за сведочење во група во погодно време, било наутро, попладне или навечер. Статии во Наша служба за Царството и делови на Состаноците за служба, покраинските состаноци и обласните конгреси нудат навремени предлози и охрабрувања за удел во разни аспекти на сведочење за Царството. Освен ова, покраинските и обласните надгледници ги обучуваат објавителите за сведочење на улица, покажуваат како да се обработуваат деловни подрачја и укажуваат на други начини како да се даде сведоштво секаде каде што можат да се најдат луѓе. Сето ова нагласува дека нема престанување во објавувањето на добрата вест!
7 Исусовите апостоли храбро изјавиле: „Ние не можеме да не зборуваме за она, што сме виделе и чуле“. Како истрајале тие покрај сите препреки? Го молеле Јехова да им помогне, коешто тој и го сторил, и ‚тие сите се исполниле со дух свети и слободно го проповедале словото Божјо‘ (Дела 4:20, 29, 31). Можеби нема секој да биде благословен со извонредни искуства во службата, но ако навистина сакаме да ја објавуваме добрата вест без престан и ако вложуваме труд да правиме така дури секојдневно, Јехова ќе ни помогне.