Младите прашуваат . . .
Зошто Бог допушта да се случуваат лоши работи?
ЛИДИЈА била само тинејџерка кога избувнала војна во нејзината татковина — земјата претходно позната како Југославија. „Многу денови и ноќи поминав во темно засолниште“, се присеќава таа. „Честопати бев доведувана во искушение да истрчам надвор, па дури и ако тоа значеше да бидам убиена! Пред војната имаше сѐ што ти душа сака, но сега среќен си само ако останеш жив.“
Стресовите и напнатостите на војната набргу го зеле својот данок од Лидија во духовен поглед. Таа вели: „Со недели не можевме да одиме во делото на проповедање или на состаноците. Навистина мислев дека Јехова нѐ запоставува. Се прашував: ‚Зошто сега не ни помага?‘“
Војни, криминал, насилство, болести, катастрофи, несреќи — такви лоши работи можат да им се случат дури и на младите. И кога трагедијата погодува некого лично, вообичаено е да се прашуваш: ‚Зошто Бог допушта да се случуваат овие лоши работи?‘
Божјите луѓе од минатото поставувале вакви прашања. На пример, кога пророкот Авакум ја видел презривата состојба на работите која постоела меѓу Божјиот народ, тој тагувал: „До кога, Господи, ќе повикувам, а Ти не ме слушаш; викам кон Тебе поради насилството, а Ти не ме избавуваш? Зошто ми дозволуваш да гледам злодејанија, и да гледам неволи?“ (Авакум 1:2, 3). Некои млади христијани денес доживуваат слична емоционална болка.
Размисли за тоа како се чувствувала една млада христијанка после неочекуваната смрт на нејзиниот татко. Таа вели: „Полудев, пискав низ прозорецот и му се дерев на Јехова Бог . . . Го обвинував за сѐ. Како може да се случи ова? Тато беше супер татко и сопруг полн со љубов, а сега се случува ова — зарем на Јехова не му е гајле?“ Во таква ситуација, сосема е нормално да чувствуваш малку збунетост, болка, па дури и гнев. Запомни, и верниот пророк Авакум бил вознемирен поради тоа што било дозволено да постои злоба. Сепак, постои опасност ако некој продолжи да развива чувства на огорченост. Би можел да „негодува против Господа“ (Изреки 19:3).
Тогаш, како можеш да избегнеш да им се препуштиш на чувствата на гнев и огорченост? Прво, мораш да сфатиш од каде доаѓа злото.
Лошите работи не доаѓаат од Бог
Библијата јасно дава до знаење дека Бог никогаш немал намера да страдаме на овој начин. Тој ја поставил првата двојка во рајски дом кој бил ослободен од болка и страдање (1. Мојсеева 1:28). Без сомнение, добро си запознат како работите тргнале наопаку: Едно невидливо духовно суштество, кое станало познато како Ѓавол и Сатана, ги навело Адам и Ева на непослушност спрема Бог. (1. Мојсеева, поглавје 3; Откровение 12:9). Правејќи го тоа, Адам го осудил целото свое потомство на грев и на неговите опустошувачки последици (Римјаните 5:12).
Јасно, не бил Бог тој кој нанел зло врз човештвото, туку самиот човек (5. Мојсеева 32:5; Проповедник 7:29). Всушност, сите лоши работи кои луѓето ги поднесуваат денес — болестите, смртта, војните, неправдите — произлегле од Адамовата своеволна постапка на непослушност. Освен тоа, сите ние сме подложни на она што Библијата го нарекува „времето и непредвидениот настан“ (Проповедник 9:11, НС). И злобните и праведните доживуваат непредвидливи несреќи и трагедии.
Божјето допуштање на злото
Иако е утешно да се знае дека Бог не е изворот на злото, сепак можеби се прашуваш: ‚Зошто допушта злото да трае?‘ Тоа уште еднаш нѐ враќа назад на спорните прашања покренати во Едем. Бог му рекол на Адам дека ќе умре ако не го послуша (1. Мојсеева 2:17). Но, Ѓаволот ѝ кажал на Ева дека нема да умре ако јаде од забранетото дрво! (1. Мојсеева 3:1—5). Всушност, Сатана го нарекол Бог лажливец. Понатаму, Сатана индиректно кажал дека на човекот ќе му биде подобро ако самиот донесува сопствени одлуки и ако Бог не му кажува што да прави!
Бог не можел да ги игнорира овие обвиненија. Дали некогаш си видел како некој школски другар го оспорува авторитетот на наставникот? Ако наставникот му дозволи да се извлече од тоа, и другите ученици ќе почнат да „изведуваат“. На сличен начин, ако не се соочел Јехова директно со Сатановиот предизвик, можело да избувне сеопшт хаос. Јехова го сторил тоа така што му допуштил на човекот да го следи Сатановиот начин на постапување. Дали човекот ужива во независноста слична на Божјата која му ја ветил Сатана? Не. Владеењето на Сатана донело неред и мизерија, докажувајќи дека тој е пакосен лажливец!
Дали Бог ќе дозволи злото вечно да трае? Не. За да ги реши спорните прашања кои ги покренал Сатана, Бог наскоро ќе ѝ стави крај на сета злоба (Псалм 36:10). Но, во меѓувреме, како треба да се бориме?
Спорно прашање во кое и ти си вклучен
Како прво, сфати дека ова спорно прашање помеѓу Бог и Сатана те вклучува и тебе! Како тоа? Размисли за библиската книга која го носи името на праведниот човек Јов. Кога Бог укажал на Јов како на пример за верен обожавател, Сатана одговорил: „Дали Јов би те обожавал кога не би имал ништо од тоа?“ (Јов 1:9, Today’s English Version). Всушност, Сатана тврдел дека, кога би му било дозволено да изврши притисок, би можел секој човек да го одврати од служењето на Бог! (Јов 2:4, 5).
Според тоа, Сатана ги наклеветил сите богобојазливи луѓе. Те наклеветил и тебе. Меѓутоа, Изреки 27:11 вели: „Биди мудар, синко, и радувај го срцето мое, — и јас ќе имам што да му кажам на оној, што ме клевети“. Да, кога на Бог му служиш и покрај мачните тешкотии, всушност помагаш да се докаже дека Сатана е лажливец!
Како што е познато, кога си соочен со лоши работи, не е лесно да размислуваш за спорните прашања кои се вклучени. Дајен, која имала само десет години кога мајка ѝ починала, вели: „Се плашев дека ќе отапам или ќе се огорчам поради неволјите во мојот живот“. Меѓутоа, сознанието зошто Бог го допушта злото ѝ помогнало да стекне здраво гледиште за своите проблеми. Таа сега вели: „Иако во мојот живот постојат работи со кои тешко се справувам, Јеховината рака секогаш е со мене“.
Дајен нѐ потсетува на еден многу важен факт: Јехова не очекува сами да се бориме со тие притисоци. Псалм 54:22 нѐ уверува: „Пренеси ја на Господа маката своја, и Он ќе те поткрепи. Не дозволувај праведниот човек да пострада“. Младата Котојо ја открила вистинитоста на овие зборови. Таа се соочила со трагедија кога нејзините родители погинале во земјотресот кој го погоди Кобе (Јапонија) во 1995 година. Зборувајќи за себеси и за своите помали браќа и сестри, таа вели: „Можеме да издржиме затоа што мајка ми нѐ научи да се ослонуваме на Јехова“.
Што е со Лидија, младата девојка која ја споменавме на почетокот? Со текот на времето, таа сфатила дека Јехова воопшто не ја напуштил. Таа сега вели: „Јехова секогаш беше со нас. Тој нѐ водеше и ги управуваше нашите чекори“.
Јехова — грижлив Бог полн со љубов
И ти можеш да ја искусиш „силата на неговата рака“ кога ќе ти се случат лоши работи. Зошто? Затоа што Јехова се грижи за тебе! И иако дозволува да им се случуваат лоши работи на добрите луѓе, тој дава утеха полна со љубов (2. Коринтјаните 1:3, 4). Еден начин на кој го прави тоа е преку христијанското собрание. Таму можеш да најдеш „пријатели поприврзани од брат“, кои можат да те зајакнат кога ќе настапи криза (Изреки 18:25б). Котојо се присеќава: „Уште од првиот ден после земјотресот, отидовме на местото каде што браќата беа собрани и добивме охрабрување и неопходни работи. Тоа ми даде чувство на сигурност. Сѐ додека го имаме Јехова и браќата, чувствувам дека можеме да поднесеме сѐ“.
Поради тоа што Јехова те знае како индивидуа може да се погрижи и за твоите потреби кога ќе се случат лоши работи. Даниел се сеќава на тоа како тој се соочил со загубата на својот татко, велејќи: „Јехова ти станува татко и неговата организација обезбедува духовни мажи како примери за имитирање. Јехова секогаш ги дава одговорите на прашањата што ги имам, кои обично би ги дискутирал со татко ми“. Дајен на сличен начин ја доживеала Јеховината грижа полна со љубов откако починала мајка ѝ. Таа вели: „Преку постари, духовно зрели поединци кои ми даваа охрабрување, водство и совет, тој ме водеше и ми помогна да се борам со секакво обесхрабрување“.
Се разбира, никогаш не е пријатно да се доживуваат лоши работи. Но, теши се со спознанието зошто Бог ги допушта таквите работи. Постојано потсетувај се дека Бог многу скоро ќе го поправи проблемот. Па, сите траги на лошите работи кои сме ги доживеале на крајот ќе бидат избришани! (Исаија 65:17; 1. Јованово 3:8). Ако ги искористиш сите подготовки кои Бог ги прави за да ни помогне да се бориме, можеш да го дадеш својот дел во докажувањето дека Сатана е лажливец. Со текот на времето, ‚Бог ќе ја избрише секоја солза од очите твои‘ (Откровение 21:3, 4).
[Слики на страница 20]
Јехова наскоро ќе стави крај на сите лоши работи