Бескрајната разновидност на Земјата — како дошла овде?

ОД ПРЕКУ 1,5 милиони видови животни на кои научниците досега им дале име, околу еден милион се инсекти. Потребни би биле 6.000 енциклопедиски страници за да се наведат сите познати инсекти! Од каде водат потекло овие суштества? Зошто толкава бескрајна разновидност? Дали тоа е резултат на некаква слепа случајност, на тоа што природата милиони пати наишла на „среќа“? Или дали е тоа намерно?

Прво, ајде накратко да забележиме некои од другите разновидности на живите суштества кои се на нашава планета.

Зачудувачки птици

Што е со преку 9.000-те различни видови чудесно конструирани птици? Некои колибри се ситни како големите пчели, но летаат со поголема спретност и грациозност отколку најразвиениот хеликоптер. Други птици секоја година мигрираат илјадници километри, како што е арктичката вртимушка која на секое кружно патување лета и до 35.000 километри. Таа нема компјутер ниту навигациони инструменти, а сепак непогрешно стигнува на својата дестинација. Дали таа вродена способност постои случајно или намерно?

Фасцинантна разновидност на растенијата

Освен тоа, постои огромна разновидност и убавина во растителниот свет — преку 350.000 видови растенија. Приближно, 250.000 од нив произведуваат цвеќиња! Најголемите живи нешта на Земјава — џиновските секвоја дрвја — се растенија.

Колку многу различни цвеќиња растат во Вашата градина или во Вашето подрачје? Убавината, симетријата и честопати миризливоста на тие цвеќиња — од најситното пустинско цвеќе, маргаритка или лутиче, до орхидеите со нивната сложена разновидност — го тераат човек да се восхитува. Уште еднаш, се прашуваме: Како дошле во постоење? Случајно или намерно?

Океаните вријат од живот

А што е со животните облици кои се наоѓаат во реките, езерата и океаните во светот? Научниците велат дека постојат околу 8.400 познати видови слатководни риби и околу 13.300 риби кои живеат во океанот. Најмалата од нив е кркушката која се наоѓа во Индискиот Океан. Долга е само околу 1 сантиметар. Најголема е китот-ајкула, чија должина може да изнесува и до 18 метри. Во овие бројки на видови не се вклучени без’рбетниците (кои немаат ’рбет) или видовите кои сѐ уште ќе се откриваат!

Неверојатниот мозок

Пред сѐ, човечкиот мозок — кој содржи најмалку десет милијарди неурони, од кои секој можеби има преку 1.000 синапси, односно точки на контакт со други нервни клетки — е неверојатен. Неврологот д-р Ричард Рестак вели: „Вкупниот број врски, внатре во пространата мрежа на невронскиот систем на мозокот, навистина е астрономски“ (The Brain). Тој додава: „Можеби во мозокот има од десет до сто билиони синапси“. Потоа, поставува едно соодветно прашање: „Како воопшто може еден орган, како што е мозокот кој содржи од десет до сто милијарди клетки, да се развие од една единечна клетка, јајце клетката?“ Дали мозокот е резултат на безлична игра и среќа на природата? Или, дали зад сето тоа постои интелигентно планирање?

Да, како настанала навидум бескрајната разнообразност на живот и конструкција? Дали сте биле поучувани дека тоа едноставно е работа на случајност, на обиди и на грешки, на успесите и неуспесите на една слепа еволуциона лотарија? Тогаш продолжете да читате за да ги видите прашањата што некои научници со сета чесност ги поставуваат во врска со теоријата на еволуција, која се нарекува основа на целата биолошка наука.

[Графикон на страница 4]

Ако на едноставната камера ѝ е потребен конструктор, што е со далеку покомпликуваното човечко око?

Подрачје на леќата

(Зголемено)

Очна водичка

Зеница

Рожница

Леќа

Шареница

Трепкино тело

Комплетно око

Очен нерв

Стаклесто тело

Мрежница

Садовница

Белка