Водата и Вашето здравје

„НЕ МОЖЕТЕ да се ослоните на жедта за да Ви каже колку вода му е потребно на Вашето тело“, истакнува списанието Health. Сепак, изобилното пиење вода е неопходно за нашето физичко и емоционално добро, па дури и за нашиот изглед. Нашите тела постојано губат вода преку потењето, солзите, урината, како и преку дишењето. Оваа изгубена течност мора да се надомести. Колку е потребно? Многу авторитети препорачуваат да се пијат најмалку осум чаши вода — два литра — секој ден.

Зошто? Водата е неопходна за транспорт на хранливите состојки во нашите тела и за отстранување на отпадните материи. Потребна е за регулирање на температурата и за подмачкување на зглобовите. „Дури и најмалиот недостиг може да Ве остави со чувство дека сте уморни . . . или болни“, забележува Health. „Дехидратацијата е една причина за замор која вообичаено се превидува.“ Списанието препорачува: „Нека не Ве мами течната природа на кафето и чајот, безалкохолните пијалаци со кофеин и алкохолот; тие, всушност, придонесуваат за дехидратација“. Кофеинот и алкохолот дејствуваат како диуретици и предизвикуваат телото да ја губи водата.

Освен тоа, „на Вашата кожа ѝ е потребна вода за да остане мека и еластична“. Како помош во тоа, на кожата можат да се нанесат и хидратантни средства. Но, тие не ја зголемуваат влагата. Наместо тоа, тие оставаат еден заштитен слој кој помага да се задржи влагата која веќе ја има во кожата. Задржувањето на оваа влага станува поважно со годините, бидејќи со стареењето кожата губи дел од својата способност да ја задржува водата.

За жал, во голем дел од светот потребен е значителен напор за да се набави доволно чиста, незагадена вода. Но, вреди да се вложи труд. По секоја цена, пијте вода во изобилство и искористете го овој едноставен начин да изгледате и да се чувствувате најдобро!