Гледиште на Библијата

Дали зодијакот треба да влијае врз Вашиот живот?

„ИМА МНОГУ МЛАДИ И ВОЗРАСНИ ЛУЃЕ КОИ ГИ БАРААТ ЗНАЦИТЕ НА СВОЈАТА СУДБИНА ВО ЅВЕЗДИТЕ“ (ПАПАТА ЈОВАН ПАВЛЕ II).

СПОРЕД една анкета, секој четврти Американец ја користи астрологијата при донесувањето одлуки. Консултирањето на астролошки знаци воопшто не е ограничено само на тој дел од светот. Речиси во целиот свет, луѓето се советуваат со зодијакот во врска со финансиски прашања, планови за патување, промени во кариерата, датуми за венчавка и воени стратегии. Се тврди дека нечиј зодијачки знак може да го открие идниот сопружник, па дури и да покаже кои партнери нема да си одговараат. Од Исток до Запад, астрологијата го пленила вниманието на милиони. Но, од каде потекнува зодијакот?

Историска заднина

Различни облици на зодијакот можат да се пронајдат и во најраните познати цивилизации. Дури и Библијата ги спомнува „соѕвездијата на зодијакот“ (2. Цареви 23:5, NW). Очигледно, во древните времиња на зодијакот се обраќале Хиндусите, како и Кинезите, Египќаните, Грците и другите народи. Меѓутоа, најраните осврнувања на знаците на зодијакот се пронајдени во древниот Вавилон.

Вавилонците ја измислиле астрологијата во обид да ја дознаат иднината. Како што ги забележувале небесните движења, така правеле прецизни карти и табели. Врз основа на нив ги предвидувале човечките случки и настаните на земјата. Во многу случаи не се донесувале политички или воени одлуки сѐ додека не биле повикани астролозите за да дадат совет. Затоа, една свештеничка класа која тврдела дека поседува посебна мудрост и натприродни сили почнала да има големо влијание. Всушност, сите знаменити храмови во Вавилон имале опсерваторија за набљудување на небото.

И во денешно време знаците на зодијакот сѐ уште играат важна улога во животот на многу луѓе. Дури и оние кои велат дека не веруваат во хороскоп, повремено можеби се советуваат со него едноставно заради забава или од љубопитност. Точно е дека астролозите дале некои предвидувања кои се обистиниле. Меѓутоа, дали тоа значи дека е корисно да им се обраќаме на ѕвездите? Всушност, како гледале древните Божји слуги на интересот за астрологијата?

Скриени опасности

За разлика од Вавилонците, верните Евреи не практикувале астрологија — и тоа од добри причини. Бог им дал јасно предупредување: „Кај тебе нека не се најде некој . . . кој би се бавел со гатање, чародејство, вражање и волшебништво; никој кој би баел, кој би повикувал духови и души на предците [или професионален претскажувач на настани, NW] или кој би се обраќал на покојниците. Зашто му се гади на Господа, секој што прави нешто такво“a (Второзаконие 18:10—12).

Божјите слуги зазеле цврст став против астрологијата. На пример, верниот крал Јосија ‚ги отстранил . . . оние кои што им каделе на Ваала, на сонцето, на месечината, на ѕвездите и на сета небеска војска [на соѕвездијата на зодијакот, NW]“. За постапката на Јосија се вели дека била она „што е добро во Господовите очи“ и Бог го благословил заради тоа (2. Цареви 22:2; 23:5). Но, некој би можел да праша: ‚Зарем не се обистинуваат барем некои предвидувања на астролозите?‘

Интересно, во христијанските грчки списи читаме за некоја девојка која ‚на своите господари им донесувала голема добивка занимавајќи се со вештината на претскажување‘. Очигледно, некои работи што ги претскажала оваа девојка се обистиниле, со оглед на тоа што нејзините господари имале добивка од нејзината моќ. Но, кој стоел зад способноста на оваа девојка да ги претскажува идните настани? Библијата наведува дека таа била под влијание на еден „дух, гатачки демон“ (Дела 16:16).

Библијата покажува дека „целиот свет лежи во власта на злобниот“, Сатана Ѓаволот (1. Јованово 5:19). Маневрирајќи со настаните за да предизвика да се обистинат извесни претскажувања, Сатана и демоните го плениле вниманието на милиони луѓе.

Едноставната вистина е дека астрологијата е една од „Ѓаволовите сплетки“, што тој ја користи за да ги држи под контрола и да влијае врз луѓето за да му послужат за неговата цел. Затоа, не изненадува тоа што Библијата ги опоменува христијаните да ‚стојат цврсто‘ против Сатановите итри замисли — во кои спаѓа и астрологијата (Ефешаните 6:11). Но, дали ова значи дека немаме никакво водство за иднината?

Библијата — сигурен водич

Милиони луѓе утврдиле дека Библијата е сигурен водич во донесувањето одлуки. Како што рекол псалмистот Давид, „опомената Јеховина е веродостојна, правејќи го неискусниот мудар“ (Псалм 19:7, NW; 119:105). Ова не значи дека Библијата прецизно образложува што треба да направи некој во секоја ситуација. Но, Божјата реч содржи начела кои можат да ни помогнат да ја извежбаме нашата моќ за согледување. Таа, пак, ќе нѐ оспособи да разликуваме исправно и неисправно и ќе ни помогне да донесуваме мудри одлуки (Евреите 5:14).

Значи, со добра причина вистинските христијани не се советуваат со хороскопи, па дури ни за забава или од љубопитност. Наместо тоа, тие мудро ги следат опомените од Божјата реч против секакво демонско влијание, вклучувајќи ги и подмолните облици. Ако дозволите врз вашиот живот да влијае Библијата а не зодијакот, ќе можете вечно да ги уживате Божјите благослови (Псалм 37:29, 38).

[Фуснота]

[Слика на страница 26]

Источниот зодијак

[Слика на страница 26]

Западниот зодијак