Гледиште на Библијата

Дали е погрешно да се користи контрацепција?

ШТО мислиш ти? Дали е погрешно луѓето што се во брак да користат контрацепција? Врз твојот одговор веројатно ќе влијаат твоите верски убедувања. Католичката црква учи дека секоја постапка која има за цел да го спречи зачнувањето, „во основа, е лоша“. Католичкото учење ја застапува идејата дека при секој полов однос меѓу брачните другари мора да се остави можност за зачнување. Според тоа, за Католичката црква, контрацепцијата е „морално неприфатлива“.

На многу луѓе им е тешко да го прифатат ова гледиште. Во една статија во весникот Pittsburgh Post-Gazette, на оваа тема беше кажано дека „над три четвртини од католиците во САД сметаат дека Црквата треба да дозволи да се користи вештачка контрола на раѓањето... А нема ден милиони луѓе да не ја прекршат забраната за контрацепција“. Една од нив е и Линда, мајка на три деца, која отворено признава дека користи контрацепција, но вели: „Според мојата совест, не правам никаков грев“.

Што вели Божјата реч во врска со оваа тема?

Животот е скапоцен

За Бог, животот на едно дете е скапоцен, дури и во најраните фази од развојот. Воден од светиот дух, израелскиот цар Давид напишал: „Ме засолнуваше во утробата на мајка ми. Твоите очи ме видоа додека бев зародок, во твојата книга сите негови делови беа запишани“ (Псалм 139:13, 16). Новиот живот почнува при зачнувањето и, според Мојсеевиот закон, секој што повредил неродено дете, требало да биде казнет. Всушност, во 2. Мојсеева 21:22, 23 конкретно е кажано дека, доколку се случи во тепачка меѓу двајца мажи некоја бремена жена или нејзиното неродено дете да бидат повредени и да умрат, случајот треба да се изнесе пред поставените судии. Тие требало да ги проценат околностите и дали се работело за намерна повреда, а казната можела да биде „живот за живот“.

Овие начела се важни за темата затоа што некои методи на контрацепција се сметаат за еден вид абортус. Таквите методи го кршат Божјето начело за животот. Но, повеќето методи на контрацепција немаат никаква врска со абортус. Може ли да се користат овие методи?

Никаде во Библијата на христијаните не им е заповедано да раѓаат потомство. На првата човечка двојка и на семејството на Ное Бог им рекол: „Плодете се, множете се и наполнете ја земјата“. Но, оваа заповед не им била повторена на христијаните (1. Мојсеева 1:28; 9:1). Според тоа, брачните двојки самите одлучуваат дали и кога ќе имаат деца и колку деца ќе имаат. Исто така, контролата на раѓањето не е осудена во Библијата. Значи, од библиска гледна точка, еден брачен пар сам треба да одлучи дали ќе користи контрацепција. Но, зошто Католичката црква ја осудува контрацепцијата?

Човечка наспроти Божјата мудрост

Во New Catholic Encyclopedia се објаснува дека дури во вториот век од н.е. оние што се изјаснувале како христијани го прифатиле правилото на стоиците, според кое единствената дозволена причина за полови односи во бракот е раѓањето потомство. Значи, аргументите за ова гледиште биле филозофски, а не библиски. Тие не се темелеле на Божјата мудрост, туку на човечка. Оваа филозофија се одржала низ вековите и била разработена од разни католички теолози.a Меѓутоа, од ова учење произлегла идејата дека половите односи чија цел е само задоволството се грев, што значи дека и половите односи при кои се исклучува можноста за зачнување се неморални. Но, Библијата не вели така.

Во библиската книга Изреки, поетски е опишана радоста што доаѓа од половите односи меѓу двајца што се во брак: „Пиј вода од својот бунар и вода што извира од твојот кладенец. Нека е благословен твојот извор и радувај се со жената на својата младост, која ти е мила како срна и занесна како планинска коза. Нејзините гради нека те опиваат во секое време. Со нејзината љубов биди секогаш во занес“ (Изреки 5:15, 18, 19).

Половите односи меѓу мажот и жената се дар од Бог. Но единствената цел на овие односи не е раѓањето деца. Преку половите односи, брачните двојки можат да си изразат љубов и нежност. Затоа, ако една брачна двојка одлучи да нема деца и користи контрацепција за таа цел, тоа е нивен избор и никој не треба да ги осудува за тоа (Римјаните 14:4, 10-13).

[Фуснота]

СИ СЕ ПРАШАЛ ЛИ НЕКОГАШ?

◼ Има ли нешто погрешно во половите односи меѓу двајца што се во брак? (Изреки 5:15, 18, 19).

◼ Што треба да земат предвид христијаните кога користат контрацептивни средства? (2. Мојсеева 21:22, 23).

◼ Како треба другите да гледаат на брачните двојки што користат контрацепција? (Римјаните 14:4, 10-13).

[Истакната мисла на страница 11]

На првата човечка двојка и на семејството на Ное Бог им рекол: „Плодете се, множете се и наполнете ја земјата“. Но, оваа заповед не им била повторена на христијаните