Да се излезе на крај со криминалот во хаотичен свет

ДАЛИ се плашиш да излезеш ноќе? Дали ти требаат две или три брави на вратите и прозорците? Дали некогаш ти била украдена колата или велосипедот? Дали ти било истргано радиото од колата? Дали се чувствуваш загрозен во одредени краеви?

Ако одговориш со ”да“ на кое и да било од овие прашања, тогаш се соочуваш со криминал во еден хаотичен свет. Што можеш да сториш во тој поглед? Дали може Библијата да ти помогне во тоа?

Менталитетот на криминалците

Во светот на криминалот постојат три основни елемента: криминалците, полицијата и жртвите. Што е неопходно за да можеш ти, како потенцијална жртва, да се соочиш со криминалот? Дали можеш да влијаеш на кој и да е од овие три елемента? На пример, дали можеш да ги измениш криминалците?

Да многу криминалци го направиле криминалот свој животен позив. Го избрале како полесен начин на живот. Се чини дека нивната филозофија е ’зошто да работиш кога можеш да живееш од она што другите го заработиле?‘ Уличните напаѓачи знаат дека просечната жртва ќе ги предаде своите пари без опирање. Ним криминалот им се исплаќа, бидејќи изгледите да бидат фатени и одведени в затвор се многу мали.

Освен тоа, судските процедури се замрсени и долготрајни. Во многу земји има премалку судници, судии и затвори. Бројот на криминалните случаи го преплавил системот. Тркалата на правдата толку бавно се вртат што ситуацијата е токму онаква како што е опишана во Библијата пред повеќе од три илјади години: ”Бидејќи осудата за лошо дело не е брзо извршена, затоа срцето на синовите човечки станало во нив потполно решено да прават зло“. Како што покажува ова библиско начело, постои малку надеж во решението да се намали бројот на криминалците или во нивното поправање (Проповедник 8:11, NW).

Што е со вториот елемент, полицијата? Дали постои некаква надеж дека полицијата ќе ја надвладее ситуацијата? Тие ќе одговорат: Со закони кои честопати се одмерени во корист на правата на криминалецот, со бескруполозни адвокати кои манипулираат со законот за да ослободат виновен човек, со општество кое се одупира да ги преземе одговорностите на огромните трошоци за нови и поголеми затвори, и со недоволно персонал во полициските сили, може да се направи мал напредок наспроти лавината од злосторства.

Останува уште третиот елемент, потенцијалните жртви: ние, јавноста. Дали можеме да сториме било што кое ќе ни помогне полесно да излеземе на крај со оваа скоро анархична ситуација?

Практична мудрост и здрав разум

Библиската книга Изреки наведува: ”Сочувај ја практичната мудрост и мисловната способност, и ќе се покажат како живот за твојата душа и како милност за твојот врат. Во тој случај ќе одиш во сигурност по својот пат, и дури твојата нога нема да се препне од ништо“. Овој совет може да се примени во ситуации во кои веројатно некој може да стане жртва на злосторство. Кои се некои од начините на кои практичната мудрост може да ни помогне на ова подрачје? (Изреките 3:21-23, NW).

Криминалците најчесто се како грабливи диви ѕверови. Го бараат најлесниот плен. Не сакаат да ризикуваат борба и можно апсење ако можат повторно да украдат од лесна жртва. Затоа ги бараат постарите, болните, збунетите и оние кои можеби не се свесни за опасната ситуација. Силеџиите избираат време и место кое најмногу им одговара за напад. Во тие моменти потенцијалните жртви можат да применат практична мудрост.

Како што Библијата ги опишува, љубителите на злото често ги вршат своите дела под закрилата на темнината (Римјаните 13:12; Ефесјаните 5:11, 12). Вистина е дека денес многу злосторства врз луѓето и имотот се извршени ноќе (Спореди Јов 24:14; 1. Солунјаните 5:2.). Според тоа, каде што е можно, мудрото лице ќе избегнува да биде надвор во опасни предели ноќно време. Во градот Њујорк, кој е преплавен со криминал, дневниот полициски записник открива дека многу луѓе се нападнати после зајдисонце, особено после десет часот навечер, често додека се враќаат во своите станови. Напаѓачите се по напуштените улици и бараат жртви. Затоа, ако треба да избереш дали да чекаш автобус или такси или да одиш пеш низ опасно подрачје, биди стрплив и чекај. Инаку, искуството може да биде болно.

Еден христијанин бил тешко испретепан и ограбен кога, наместо да чека автобус околу десет часот навечер, минувал кратко растојание во полутемнина. На улицата имало и други луѓе, но тројца пљачкачи поставиле стапица за невнимателните. Едниот им дал знак на другите кога погодната жртва одела по улицата. Без збор, ја нападнале жртвата и ја ограбиле. Сѐ се завршило толку брзо, што дури ни блискиот минувач немал време да се вмеша. Жртвата подоцна признала: ”Следниот пат ќе чекам автобус.“

Препредениот Доџер, еден млад џепџија од Дикенсовиот роман Оливер Твист, е релативно добар прототип на денешен уличен деликвент. За разлика од препредениот Доџер, денешните крадци и напаѓачи, без разлика на годините, веројатно носат пиштол или нож, и тие ќе го употребат. Збунетите туристи, посетителите и случајните разгледувачи во продавниците во еден прометен град се лесна цел за тие безобѕирни злосторници. Ќе ти украдат сѐ што им е достапно пред да трепнеш со око! Што сѐ може да му го забрза пулсот на еден крадец? Златно ланче или друг скап накит што се носи отворено. Или фотоапарат којшто туристот го носи околу вратот. Тоа е исто како да носиш знак на кој пишува: ”Дојди и земи ме!“ Значи, потребна е разумност. Сокриј било каков накит, и носи го апаратот на помалку упадлив начин, можеби скриен во торбата за купување. Тоа е практична мудрост.

Друг начин да се бориш против криминалот е будноста. Библијата вели: ”На мудриот очите му се во главата негова, а глупавиот оди во темнина“ (Проповедник 2:14). Примената на ова предупредување во проблемот на криминалот ќе доведе до тоа да ги забележуваш луѓето кои сомнително талкаат без одредена одредена намера. Додека одиш по тротоарот, внимавај на крадците кои можат да се појават зад тебе и да ти ја грабнат ташната. Никогаш не оди по работ од тротоарот, особено ако носиш некаква актовка или рачна ташна, бидејќи некои возат велосипеди и ја ограбуваат своината на другите луѓе додека нагло поминуваат покрај нив. Избегнувај ја подземната железница кога е скоро празна. Побезбеден си во мноштвото луѓе и на места каде што има многу светлост. Крадците не сакаат да бидат забележани и препознаени.

Провалата е уште еден вообичаен вид криминал кој често може да се избегне кога луѓето би биле посвесни за тоа. Библијата исправно ја употребува споредбата: ’ќе влегуваат и низ прозорците како крадачи‘ (Книга пророк Јоил 2:9). Практичната мудрост налага да не ги оставаш вратите и прозорците незаклучени. Сѐ уште важи правилото дека е подобро да се спречи отколку да се лечи. Додатните трошоци за заштита на твојот дом се навистина добро осигурување против кражби и телесни повреди.

Што ако си нападнат?

Да, што ако покрај сите мерки на претпазливост те запре некој ограбувач? Обиди се да не креваш паника или да не направиш некое непромислено движење. Запомни дека и крадецот може да биде нервозен и може погрешно да ги разбере твоите движења. Ако е некако возможно, обиди се разумно да разговараш со дотичниот или дотичната (Да, твојот напаѓач може исто така да биде и жена.) Понекогаш ограбувачите биле омекнати кога дознале дека нападнале чесен и искрен христијанин. Без оглед на реакцијата, не обидувај се да даваш отпор ако ти ги бараат само парите или она што го поседуваш. Предај му сѐ што ќе ти побара. Библијата учи дека човечкиот живот вреди повеќе од што и да било кое некој може да го поседува. (Спореди Марко 8:36.)

Потруди се да забележиш некои посебни карактеристики кај ограбувачот, било да е во облекувањето или физичкиот изглед, но тоа да не изгледа како упадливо испитување. Каков акцент има? Сите тие детаљи можат да бидат од корист кога ќе го пријавиш злосторството во милицијата, бидејќи повеќето криминалци се познати по својот личен modus operandi, и така можат полесно да бидат откриени.

Што да се каже за носењето оружје за самоодбрана? Сигурно дека за еден христијанин не би било мудро да носи оружје. Ако напаѓачот помисли дека посегнуваш по оружје, нема двапати да размислува дали да те повреди или да те убие. Освен тоа, како можеш да го следиш библиското начело да ”бидеш во мир со сите луѓе“ ако си наоружан за насилен противнапад? (Римјаните 12:18).

Без оглед на мерките на претпазливост, никој не ти гарантира дека еден ден нема да бидеш жртва. Во градовите во кои владее криминал, доволно е да бидеш на погрешно место во погрешно време. Неодамна во Њујорк, еден адвокат ја напуштил својата канцеларија да се напие кафе. Кога влегувал во дуќанот, некои младинци се довезле и почнале да пукаат во продавницата. Адвокатот бил убиен со куршум во главата. Поради ’времето и непредвидената случка‘, го загубил животот. Каква трагедија! Дали постои некаква надеж за трајно решение на денешната лавина од криминал која го преплавува светот? (Проповедник 9:11, NW).

Кога ќе престане криминалот

Пред скоро две илјади години, Исус претскажал дека ќе дојде генерација која ќе види пострашни настани од која и да е поранешна генерација. Со помош на телевизијата и брзата комуникација, милиони, не, милијарди, преку своите локални информативни канали се сведоци на свирепи дела уште при самото извршување. Светот станал село, а светските вести се веднаш и локални вести. Како резултат на тоа, реалноста секојдневно го погодува домот и, како што прорекол Исус, многу луѓе ’ќе умираат од страв и од исчекување на она што ќе го снајде светот‘ (Лука 21:26).

Исус ги предвидел настаните кои се одвиле од 1914, настани кои ќе бидат увод во ”завршетокот на системот“ (Матеј 24:3-14, NW). Но тој исто така рекол: ”Кога ќе видите дека станува ова, знајте оти се приближи царството Божјо“ (Лука 21:31). Тоа значи дека Божјата праведна влада набргу драматично ќе влијае на светот (Матеј 6:9, 10; Откровение 21:1-4).

Под таа влада, само кротките, мирољубивите и оние кои се послушни на Бог ќе имаат удел во условите на земскиот Рај. Што ќе се случи со криминалците и злосторниците? ”Како трева брзо ќе овенат, и како млада зелена трева ќе исчезнат. Зашто злосторниците ќе бидат отсечени, а оние кои се надеваат во Јехова се тие кои ќе ја поседуваат Земјата.“ Под таа праведна небесна влада нема да има ниту хаос ниту криминал (Псалми 37:2, 9, NW).

Ако сакаш повеќе да дознаеш за оваа библиска надеж во мирољубива и трајна светска влада, поврзи се со Јеховините сведоци во твоето соседство или во нивната месна Царска сала. Ќе им биде мило да ти помогнат да ја разбереш Библијата, и тоа бесплатно.

[Истакната мисла на страница 6]

”Злосторниците ќе бидат отсечени, а оние кои се надеваат во Јехова се тие кои ќе ја поседуваат Земјата“

[Слики на страница 7]

Џепџијата на Чарлс Дикенс, Препредениот Доџер, е почетник во споредба со денешните улични напаѓачи

[Извор на слика]

Graphic Works of GEORGE CRUIKSHANK, by Richard A. Vogler, Dover Publications, Inc.