Добредојдовте на Обласните конгреси ”Љубители на слободата!“
СЛОБОДА! Колку угоден звук има тој збор! Никој не се радува на ропството или заробеништвото. Минатата година беше остварен поголем напредок кон саканата политичка слобода отколку која и да е друга година што ја памтиме.
Меѓутоа, колку и да е пожелна политичката слобода, постои слобода која е далеку поважна и попожелна. Тоа е слободата за која зборувал Исус Христос, Божјиот Син, кога им рекол на своите ученици: ”Ако останете во мојата реч, навистина сте мои ученици, и ќе ја спознаете вистината, и вистината ќе ве ослободи“ (Јован 8:31, 32, NW). Тоа е слобода од лажното религиозно верување, слобода од стравот од човекот, слобода од ропството на грешните склоности, и многу повеќе.
Таа слобода ќе биде тема на Обласните конгреси ”Љубители на слободата“ кои Јеховините сведоци ќе ги одржат ширум светот почнувајќи од летото 1991. Од 1919, која била обележана со владиното укинување на ограничувањата за оние кои меѓу нив преземаат водство, Божјиот народ се радува на растечката слобода во поглед на своето чисто обожавање.
Прашањето на слободата на најприкладен начин со години било истакнувано на теократските конгреси со темите како што се ”Теократски собири на слободниот народ“ и ”Обласни состаноци на ’Божјите синови на слободата‘“. Слободата исто така опширно се разгледувала во публикациите како што се Вистината која ќе ве ослободи (The Truth Shall Make You Free) и Вечен живот — Во слободата на Божјите синови (Life Everlasting—In Freedom of the Sons of God).
Слободата која Јехова им ја дал на своите слуги не е само за нивно лично добро и задоволство. Во Галатјаните 5:13 читаме: ”Вие, браќа повикани сте кон слобода; но слободата ваша да не ви служи како повод за угодување на телото, туку со љубов служете си еден на друг“. Целта на Обласниот конгрес ”Љубители на слободата“ е да ни помогне да ја цениме нашата слобода, да ни овозможи да се држиме за својата драгоцена слобода и да ни покаже како можеме најдобро да ја употребиме.
Конгресот ќе започне во петок наутро во 10.20 часот со музичка програма што ќе нѐ воведе во прикладно расположение за духовната храна која следи. Темата на првиот ден е ”Познавањето на вистината која нѐ ослободува“, а се темели на Јован 8:32. Претпладнето ќе содржи поздравни напомени од претседавачот и клучниот говор: ”Целта и користењето на слободата што ни ја дал Бог“. Овој говор ќе ја истакне разликата помеѓу Јеховината апсолутна слобода и релативната слобода што ни ја дава Бог. Исто така ќе бидеме охрабрени нашата слобода да ја користиме на најдобар можен начин. Попладневната програма ќе обработува различни подрачја од нашата слобода и служба и ќе заклучи со драмата ”Слободни за унапредување на чистото обожавање“.
Темата на вториот ден е ”Цврсто да стоиме во слободата што ни ја дал Бог“, а се темели на Галатјаните 5:1. Во утринската програма ќе биде изнесен приказ како поединечните членови на семејството можат да се радуваат на слободата дадена од Бог во кругот на семејството. Оние кои ќе бидат спремни за крштение посебно ќе ги ценат напомените за тоа како слободата е постигната преку предание и крштение. Во попладневната програма ќе биде вклучена занимлива расправа за тоа дали бракот е клуч за среќата или не. Исто така ќе биде изнесена и серија предавања за различните подрачја на слободата, а потоа говор под наслов ”Најголемиот човек кој некогаш живеел“.
Недела ја има темата ”Да ја користиме својата слобода во склад со Божјиот дух“, темелена на 2. Коринтјаните 3:17. Програмата ќе содржи навистина интересна серија предавања на темел на Исусовата споредба од Матеј 13:47-50, покажувајќи како Јеховините сведоци служат како рибари на луѓе. Попладневното јавно предавање носи наслов ”Да го поздравиме Божјиот нов свет на слободата!“, кое ќе го истакне единствениот начин на кој луѓето можат да ја стекнат многу саканата слобода, вистинската слобода од Бог. Програмата ќе заврши со поттикнување од Писмото за сите нас да продолжиме да напредуваме во исправното користење на нашата слобода дадена од Бог во нашето однесување и сведочење.
На сите љубители на слободата им велиме со зборовите на псалмистот Давид: ”Пробајте и видете дека Јехова е добар“ (Псалми 34:8, NW). Немој да дозволиш ништо да те спречи да дојдеш на овој конгрес. Постави си за цел да бидеш присутен од отворањето во петок наутро па сѐ до завршниот говор в недела попладне. Ако дојдеш со здрав духовен апетит, потполно свесен за своите духовни потреби, навистина ќе бидеш среќен! (Матеј 5:3). Да не го превидиме темелното начело: ”Кој богато сее, богато и ќе жнее“. Тоа исто така се однесува на тоа колку сериозно се подготвуваме да присуствуваме, колку марливо ќе ја слушаме програмата додека се изнесува, и со колкаво одушевување ги прифаќаме кои и да било предности или доброволни служби кои ни се отворени во врска со нашиот Обласен конгрес ”Љубители на слободата“ (2. Коринтјаните 9:6, NW).