Како може верата да им помогне на болните

ИЗВЕШТАИТЕ за чудотворните лекувања во Библијата повторно нѐ уверуваат дека Бог се грижи за нашата благосостојба и ја покажуваат неговата моќ да оздравува. Бидејќи овие чудотворни лекувања го слават Бог и донесуваат толку многу радост, разумно е да се прашаме: Дали дарот на оздравување со свет дух сѐ уште делува?

Одговорот на тоа прашање е не, а некои можат да се изненадат од причината. Тие чудотворни лекувања во првиот век ја исполниле својата цел. Илустрираниот библиски речник (The Illustrated Bible Dictionary) исправно забележува: „Целта на чудесните оздравувања била теолошка, а не медицинска“. Кои биле некои од теолошките цели за кои послужиле тие чуда?

Како прво, Исусовите чудотворни оздравувања имале за цел да го идентификуваат него како Месија. По неговата смрт, тие помогнале да се докаже дека Божјиот благослов бил над новото христијанско собрание (Матеј 11:2-6; Евреите 2:3, 4). Понатаму, тие покажале дека ќе биде исполнето Божјето ветување да го оздрави човештвото во новиот свет. Тие ја зајакнуваат нашата вера дека навистина ќе дојде времето кога „ниеден од жителите нема да каже: ‚болен сум‘; . . . на народот што живее таму ќе му бидат простени гревовите“ (Исаија 33:24). Откако во првиот век биле постигнати тие цели, чудата повеќе не биле потребни.

Забележително е дека и самите Исусови ученици од првиот век страдале од слабости кои не биле излечени со чуда. Тоа е уште еден доказ дека активноста на Исус со оздравувањето, како и онаа на апостолите, имале за цел да поучат за важни работи, а не да пружаат медицински услуги. Кога му препорачал терапија на Тимотеј поради неговите чести заболувања, Павле ја препорачал медицинската употреба на вино, а не оздравување со вера. Павле, кој самиот извршувал чудесни оздравувања, не бил ослободен од ‚трнот во телото‘ кој постојано го ‚боцкал‘ (2. Коринтјаните 12:7; 1. Тимотеј 5:23).

Кога апостолите умреле, дарот на оздравување престанал. Павле самиот покажал дека ќе се случи тоа. Споредувајќи го христијанското собрание со едно дете, Павле рекол: „Кога бев дете, зборував како дете, како дете мислев, како дете размислував; а кога станав маж, го оставив детинското“. Поентата на неговата илустрација била таа дека чудотворните дарови на духот биле дел од детството на христијанското собрание. Тие биле „детинското [детските обележја, NW]“. Затоа изјавил: „Тие [чудотворните дарови] ќе престанат“ (1. Коринтјаните 13:8-11).

Може ли верата да ни помогне кога ќе се разболиме?

Меѓутоа, дури и ако немаме доверба во оздравувањата со вера, сигурно е прикладно да го молиме Бог за помош кога ќе се разболиме. А секако дека не е неисправно ако и други се молат за наша корист. Но молитвите мораат да бидат реалистични и во склад со Божјата волја (1. Јованово 5:14, 15). Библијата никаде не ни заповеда да молиме за оздравување со вера.a Наместо тоа, ние молиме за Јеховина љубезна поддршка во текот на искушенијата што ги предизвикува болеста.

Библијата покажува за што можат да молат болните верници кога вели: „Самиот Јехова ќе го поткрепи на болесничката постела; целата постела сигурно ќе ја промениш за време на неговата болест“ (Псалми 41:3, NW). Медитативното размислување за Божјата Реч ќе им помогне на оние кои страдаат од емоционална болест. Псалмистот напишал: „Твојата милост, [Јехова], ме помагаше. Кога се намножуваа тешкотиите и во срцето мое, Твоите утехи ја развеселуваа душата моја“ (Псалми 94[93]:18, 19; види и 63[62]:6-8).

Освен тоа, потребно е да покажуваме здрав разум во поглед на здравјето, а Библијата нѐ советува и за тоа. Многу е подобро да живееш според библиските начела, отколку да се впушташ во злоупотреба на дрога, пушење, претерано пиење или прејадување, а потоа, кога ќе настапи болест, очајно да бараш оздравување со вера. Молењата за чудо, кога некој е погоден од болест, не можат да го заменат мудрото однесување кое е со цел да се избегне болеста, како на пр. да се јаде здрава храна доколку ја има, или да се бара погодна медицинска помош ако е можно.

Божјата Реч нѐ охрабрува да негуваме здрав душевен став кој може да му користи на нашето физичко здравје. Книгата Соломонови изреки советува: „Кроткото срце е живот за телото, а зависта е гнилеж за коските“ (Соломонови изреки 14:30; 17:22). Ако се молиме за свет дух да развиваме спокојност и радост во нас, тоа може да има само корисни учинци врз нашето физичко здравје (Филипјаните 4:6, 7).

Што е со оздравувањата со вера?

Се разбира, дури и ако лицето води здрав живот колку што му дозволуваат околностите, сепак може да го погоди болест. Што тогаш? Дали постои некаква опасност ако се отиде кај лице кое лечи со вера, со надеж дека ќе оздравиме? Да, и тоа каква. Современите исцелители со вера ретко го прават тоа бесплатно. А трошењето пари на исцелители со вера, кога тие пари би можеле да се дадат за медицинска помош, би можело скапо да нѐ чини. Освен тоа, зошто да им се даваат пари на лица кои ја искористуваат лековерноста на луѓето?

Некои можеби аргументираат: ‚Сигурно дека лечењето со вера мора да има некаква вредност штом оздравуваат дури и само мал процент од оние кои одат кај „исцелителите“‘. Но, дискутабилно е дали исцелителите со вера навистина трајно оздравуваат некого. Encyclopædia Britannica признава: „Направени се релативно мал број проверени истражувања во врска со многуте непознати фактори кај лечењето со вера“.

Дури и кога се чини дека се излечени само мал број лица, тоа не е доказ дека делувал светиот дух. Во Проповедта на гората, Исус рекол: „Мнозина ќе ми речат во оној ден: ‚Господи, Господи, не во Твое ли име пророкувавме? И зар во Твое име бесови не изгонувавме? И не во твое ли име многу чуда правевме?‘ И тогаш Јас ќе им кажам: ‚Никогаш не сум ве познавал; бегајте од Мене, вие што правите незаконски дела!‘“ (Матеј 7:22, 23). Исус исто така рекол дека некои, иако осудени од Бог, ќе го свртат вниманието кон себеси преку знаци: „Оти ќе се појават лажни Христоси и лажни пророци, и ќе покажат големи знаци и чуда, за да ги прелажат, ако е можно, избраните“ (Матеј 24:24). Секако, денешните исцелители со вера, со нивните драматични настапи, постојаното барање пари и наводните чудотворни оздравувања, можат да се вбројат во примената на овие зборови.

Таквите не ги следат Исусовите стапки. Тогаш, кого следат? Апостол Павле ни укажува на тоа кога вели: „Самиот сатана се преобразува во ангел на светлината; та затоа не е голема работа, ако и слугите негови му се преобразуваат како слуги на правдата; но нивниот крај ќе им биде според делата нивни“ (2. Коринтјаните 11:14, 15). Ако исцелителите со вера не ги извршуваат наводните оздравувања, тогаш тие се измамници и го следат патот на Сатана кој „ја заведува целата населена земја“ (Откровение 12:9, NW). Но, што ако во мал број случаи тие сепак извршуваат оздравувања? Зарем не смееме да заклучиме дека нивните „моќни дела“ се извршени со моќта на Сатана и неговите демони? Да, токму така!

Времето на вистинско оздравување

Чудотворните Исусови лекувања биле извршени со помошта на Божјиот свет дух. Тие ја прикажале неговата намера дека во свое време ќе ги реши човековите здравствени проблеми. Јехова ветува „исцелување на народите“ (Откровение 22:2). И не само што ќе ја излечи болеста, туку тој ќе ја отстрани и смртта. Јован објаснува дека Исус дошол за „секој што верува во Него, да не погине но да има живот вечен“ (Јован 3:16). Какво прекрасно оздравување ќе биде тоа! Исус повторно ќе изврши лекувања како оние што се запишани во Библијата, но во многу поголема мера. Тој ќе ги воскресне дури и мртвите! (Јован 5:28, 29). Кога ќе се случи тоа?

Во Божјиот нов свет, кој според сите докази, е на дофат. Тој нов свет, кој ќе биде воспоставен откако злото на овој систем на работи засекогаш ќе биде отстрането, ќе биде вистински благослов за праведното човештво. Тоа ќе биде свет без страдања. „[Бог] ќе ја избрише секоја солза од очите нивни, и смрт нема да има веќе; ни плач, ни пискот, ниту болка нема да има веќе, бидејќи поранешното помина“ (Откровение 21:4). Каква спротивност од она што денес го гледаме околу нас!

Затоа, кога си болен, моли го Бог за поддршка. И без разлика дали си болен или здрав, научи како навистина ќебиде можен вечен живот без болести. Изгради вера во ова сигурно Божје ветување со проучување на многуте места во Библијата кои зборуваат за тоа. Научи како Божјата намера во овој поглед се ближи кон своето исполнување во склад со неговиот временски распоред. Не се сомневај, бидејќи Божјата Реч ни гарантира: „Смртта ќе биде проголтана за секогаш, ќе ги избрише [Јехова] Бог солзите од сите лица“ (Исаија 25:8).

[Фуснота]

[Слика на страница 7]

Исусовите чудесни оздравувања ја исполниле својата цел

[Слика на страница 8]

Исус ќе ги повтори и ќе изврши многу чуда на оздравување