Кога традицијата ѝ противречи на вистината

ОПАСНОСТ! ВОДАТА НЕ Е ЗА ПИЕЊЕ. Можеби сме навикнати да гледаме такви предупредувања. Во многу подрачја луѓето внимаваат што пијат бидејќи знаат дека некои резерви со вода се затруени со т.н. „отровен пијалак“ од токсична загаденост. Едно испитување вели дека, како резултат на оваа загаденост, водата може да стане „преносител на организми кои предизвикуваат болести и . . . на хемиски загадувачи“, наместо да го „поддржува и да го заштитува животот“ (Water Pollution — Загадување на водата).

Загадување на водите на вистината

Традициите кои ѝ противречат на вистината се како загадени резерви со вода. Можеби од простодушност се придржуваме за некои традиции — информации, мислења, верувања или обичаи кои се пренесувале од една генерација на друга — кои, всушност, биле затруени со „отровен пијалак“ од лажни, невистинити идеи и филозофии. Исто како затруената вода, и тие можат да предизвикаат неизмерна штета — и тоа духовна штета.

Дури и ако сметаме дека нашите традиционални религиозни верувања се темелат на Библијата, сите ние треба да си одвоиме време за да ги испитаме внимателно. Сети се дека кога Мартин Лутер се придржувал за традиционалното верување од неговото време и го осудил Коперник, тој верувал дека Библијата го поддржува. Па сепак, Лутер пропуштил да го следи добриот пример на древните Беријци кои ‚биле благородни и го испитувале Писмото дали е тоа така‘ (Дела 17:10, 11).

Размисли за штетата што извесни традиционални верувања им ја нанеле на некои Евреи од Исусовото време. Тие горливо верувале дека нивните традиции се вистинити. Кога приговарале дека Исусовите ученици не се придржуваат за традициите, Исус ги побил со прашањето: „Па зошто и вие ја престапувате Божјата заповед заради вашето предание?“ (Матеј 15:1-3). Што не било во ред? Исус го открил проблемот кога ги цитирал зборовите на пророкот Исаија: „Но напразно Ме почитува, оти проповеда човечки повелби“ (Матеј 15:9; Исаија 29:13).

Да, вистините кои потекнуваат од Бог тие ги замениле со човечки идеи или, што е уште полошо, идеи кои потекнуваат од демоните. На пример, во Insight on the Scriptures (Увид во писмото), во том I, на страница 506, се објаснува: „Фарисеите од тоа време поучувале дека штом некој ќе изјави дека она што го поседува е ‚корбан‘, т.е. дар кој му е посветен на Бог, тогаш тој не може да го употреби тој посед за да ги задоволи потребите на своите родители, без оглед на тоа колку сиромашни се тие, иако самиот тој може да го користи таквиот имот сѐ до својата смрт, доколку одлучи да го стори тоа“. Човечката мудрост што ги затрула водите на вистината се одразила штетно врз духовноста на Евреите. Повеќето од нив го отфрлиле дури и долгоочекуваниот Месија.

Христијанството придонесува за загадувањето

Слична духовна штета била предизвикана и после Исусовата смрт. Многумина од оние кои тврделе дека се негови следбеници, се повикувале на усните традиции како на авторитет за некои нови учења. Според Cyclopedia of Biblical, Theological, and Ecclesiastical Literature (Циклопедијата на библиска, теолошка и црковна литература) од Меклинток и Стронг, некои т.н. христијани верувале дека таквите традиции биле „поука која била примена од устата на апостолите уште од првите христијански Цркви, пренесени од апостолското време и сочувани во својата чистота сѐ до нивното време“ (нагласено од нас).

Во реалноста, многу од овие традиции биле нечисти, погрешни идеи. Како што објаснува Циклопедијата, овие нови филозофии „не се разликувале само од другите традиции туку и од самите расположливи ракописи на апостолите“. Но, ова не дошло сосема неочекувано. Апостол Павле ги предупредил христијаните: „Браќа, пазете некој да не ве заведе со философија и со празна измама според човечкото предание, според стихиите на светот, а не по Христа“ (Колосјаните 2:8).

И денес многу традиционални верувања ‚се разликуваат од самите ракописи на апостолите‘. Христијанството ги затруло водите на вистината со многубројни идеи инспирирани од демоните, како што се тројството, пеколниот оган, бесмртноста на човечката душа, национализмот и идолопоклонствотоa (1. Тимотеј 4:1-3). Историјата сведочи за духовната болест што ги зафатила луѓето кои паднале како жртви на демонските учења кои, пак, станале традиционални науки на христијанството. (Спореди Исаија 1:4-7.)

Всушност, такво заразување на вистината се одвива уште од самиот почеток на човекот. Сатана го продолжува она што го започнал во Едем, имено да ги труе умовите на луѓето со лаги и со измами (Јован 8:44; 2. Коринтјаните 11:3). После потопот во деновите на Ное, додека човечкото семејство се проширувало по целата Земја, луѓето од сите култури станале жртви на намерно труење на ризниците на човечкото спознание, со филозофии и со идеи инспирирани од демоните.

Последици од духовното загадување

Каква штета може да предизвика таквото духовно загадување? Тоа можеме да го споредиме со ефектите што ги има загадената вода врз физичкото здравје. Еден стручњак вели: „Околу 200 милиони луѓе се жртви на шистозомијаза (билхарцијаза) [барска треска, која предизвикува анемија, мачнина, општа слабост, па дури и смрт], која се појавува на кожата како последица на затруена вода. Поради нечиста вода за миење, 500 милиони луѓе боледуваат од трахом, една од главните причини за слепило. . . . Околу две милијарди човечки суштества немаат чиста вода за пиење“ (Our Country, the Planet — Нашата татковина, Земјата). Милиони луѓе биле духовно ослабени, ослепени, па дури и убиени како последица на следењето на традиции кои се помешани со лажни, демонски науки (1. Коринтјаните 10:20, 21; 2. Коринтјаните 4:3, 4).

На пример, многумина се збунети или заслепени во поглед на врската помеѓу Исус Христос и неговиот Татко, Јехова Бог. На некои кои тврделе дека се христијани, им станало обичај да го испуштаат Божјето свето име, Јехова, од Христијанските грчки списи. Во списанието Journal of Biblical Literature (Журнал на библиска литература), Џорџ Хауард вели: „Според нашето мислење, ова отстранување на тетраграм[атонот], во мислите на раните пагански христијани создало збунетост во поглед на врската помеѓу ‚Господ Бог‘ и ‚Господ Христос‘“.

Помисли и на збрката, суеверието и стравот коишто се предизвикани од небиблиската традиција дека човечката душа е бесмртна. (Спореди Проповедник 9:5; Језекиил 18:4.) Колку луѓе му робуваат на обожавањето на предци или, пак, живеат во постојан страв дека мртвите ќе се вратат за да им наштетат? Ова верување ги поттикнува луѓето дури и да се убиваат себеси и другите.

Многу Јапонци веруваат дека кога ќе умрат, нивните духови ќе се сретнат во задгробниот живот. Затоа, некои родители кои се самоубиваат, мислат дека ќе биде најдобро да ги убијат и своите деца. An English Dictionary of Japanese Ways of Thinking (Англиски речник на јапонските размислувања) објаснува: „Во Јапонија, самоубиството не се осудува секогаш, туку честопати на него се гледа како на прифатлив начин на извинување за нечиј голем грев . . . Дури и за семејните самоубиства постои веројатност да се објават со сочувствителни зборови“.

Испитај ги традициите

Што треба да сториме со оглед на опасностите што се јавуваат ако слепо се следат традиционалните верувања и обичаи? Кон крајот на првиот век, апостол Јован им го дал следниов совет на своите сохристијани: „Возљубени, не верувајте му на секој дух [на секоја инспирирана изјава, НС], туку испитувајте ги духовите [инспирираните изјави, НС] [токму онака како што би ја испитале чистотата на водата]: дали се од Бога, бидејќи многу лажни пророци се јавија во светот“ (1. Јованово 4:1; види и 1. Солунјаните 5:20). Како можеш да знаеш дали некоја традиција е штетна? Потребен ти е некаков авторитет, некакво мерило за чистота за да го испиташ она во што веруваш.

Библијата е таков авторитет. Исус Христос изјавил: „Освети ги со Својата вистина, Твоето слово е вистина“ (Јован 17:17). Исто така, тој рекол: „Иде време и дошло веќе, кога вистинските поклоници ќе Му се поклонуваат на Отецот со дух и вистина“ (Јован 4:23). Ако ја користиш Божјата инспирирана Реч, ќе дојдеш до чистите води на вистината, а не до загадените води на човечката и на демонската филозофија (Јован 8:31, 32; 2. Тимотеј 3:16).

Запомни, дури и сосема мало присуство на некој загадувач може да предизвика тешки последици. Понекогаш е потребно да поминат години за да се видат последиците. „Нечистата вода“, вели Шридат Рамфал, поранешен претседател на Светското здружение за заштита, „стана најопасен убиец во светот. Најмалку 25.000 луѓе секојдневно умираат поради тоа што ја користат.“ Духовно затруените традиции се уште поопасни.

Имаш ли храброст да се ослободиш од традиционалните верувања кои можеби си ги следел со години, доколку се покаже дека тие ѝ противречат на вистината? Послушај ги предупредувањата. Заштити се себеси и своето семејство така што ќе се увериш дека твоите традиции се во согласност со Божјата чиста Реч на вистина (Псалм 18:8-11; Изреки 14:15; Дела 17:11).

[Фуснота]

[Слика на страница 7]

Божјата Реч на вистина е како река со чиста, незагадена вода