Објавување на добрата вест по оризовите полиња на Тајван

Ние сме од оние кои имаат вера

Објавување на добрата вест по оризовите полиња на Тајван

ТАЈВАН обично има изобилни врнежи од дожд, што овозможува да се пожнеат две богати жетви на ориз годишно. Но, понекогаш, дождовите ги нема навреме, и расадот изгинува. Кога се случува тоа, дали земјоделецот се откажува? Не. Тој знае дека е потребна истрајност. Одгледува нов расад и одново ги засадува полињата. Потоа, ако условите се подобрат, земјоделецот жнее богата жетва. Духовното садење и жнеење понекогаш се многу слични на ова.

Истрајување во духовната жетва

Низ годините, Јеховините сведоци на Тајван напорно работеа за да го садат и жнеат семето на библиската вистина на некои подрачја кои не изгледаа баш продуктивни. Еден пример е покраината Мијо-ли. На тоа подрачје имаше мал одѕив на повремените напори да се сведочи. Затоа, во 1973 еден брачен пар специјални пионери беа доделени да работат таму како полновремени објавители на Царството. Во почетокот некои покажаа интерес за добрата вест. Меѓутоа, наскоро тој интерес овена. Потоа, специјалните пионери беа доделени на друго подрачје.

Во 1991 таму беа доделени други две специјални пионерки. Но, повторно развојот на настаните покажа дека климата не е баш поволна за духовен раст. После неколку години, специјалните пионерки беа предоделени на терени за кои постоеше надеж дека ќе бидат попродуктивни. Така, извесен период земјата лежеше необработена.

Новите напори жнеат успех

Во септември 1998 беше одлучено да се вложи напор да се побараат попродуктивните подрачја на огромната недоделена територија на Тајван. Како ќе се постигне тоа? На тој начин што беа доделени 40 привремени специјални пионери да работат во погусто населените недоделени подрачја.

Меѓу подрачјата што беа избрани за кампањата беа два гранични града во покраината Мијо-ли. Четири немажени сестри требаше да работат таму три месеци за да го испитаат подрачјето. Набрзо по своето пристигнување, тие напишаа одушевувачки извештаи за бројот на заинтересираните луѓе кои ги пронашле. До времето кога истекоа нивните три месеци пионерење на тоа подрачје, тие водеа многу домашни библиски студии. Исто така, воспоставија група за студија на книга со помош на старешина од едно блиско собрание.

Три од овие сестри дадоа до знаење дека би сакале и понатаму да се грижат за кревките „садници“ кои толку добро растеа. Поради тоа, две од нив беа наименувани како постојани специјални пионерки, а третата продолжи да работи таму како општ пионер. Еден старешина од блиското собрание се пресели на тоа подрачје за да им помогне. На првото јавно предавање одржано на тоа подрачје беа присутни 60 лица. Сега, блиското собрание ѝ помага на оваа штотуку основана група редовно да ги одржува состаноците во недела, покрај неколкуте групи за студија на книга. Можеби набрзо на ова подрачје ќе се формира собрание.

Истрајноста донесува благослови и во други делови на Тајван

И на други подрачја имаше слични реакции. Во покраината И-лан во североисточниот дел на островот, беше основана нова група за Собраниска студија на книга на подрачје каде што работеа привремените специјални пионери.

Додека една вечер правела посети од куќа до куќа, некоја привремена специјална пионерка сретнала млад човек и му покажала леток на кој бил наведен распоредот на собраниските состаноци. Тој веднаш ја прашал: „Смеам ли да дојдам на состанокот утревечер? Ако смеам, што да облечам?“ Оваа пионерка веќе води осум библиски студии со заинтересирани лица секоја седмица. Неколку од библиските студенти прават планови наскоро и самите да станат објавители на добрата вест, имајќи цел да се крстат.

Една друга жена од истиот овој град многу години одела по цркви, но не можела да пронајде ниедна која ќе ја поучи за Библијата. Кога чула за подготовката за библиска студија, ја искористила приликата. Била охрабрена однапред да се подготвува за лекцијата. Кога привремената специјална пионерка пристигнала да ја води студијата, жената веќе ја имала завршено својата „домашна задача“ така што си купила тетратка во која ги запишала печатените прашања од нејзиниот материјал за проучување. Потоа ги напишала и одговорите на секое прашање. Исто така, во својата тетратка ги запишала сите наведени стихови од лекцијата. Кога сестрата пристигнала да ја води првата студија, жената веќе ги имала подготвено првите три лекции!

Слични резултати беа забележани и во градот Данши во централен Тајван. За трите месеци, колку што работеа таму, привремените специјални пионери поделија повеќе од 2.000 брошури. Третиот месец водеа 16 домашни библиски студии. Градот беше прилично уништен во земјотресот кој го погоди централен Тајван на 21 септември 1999, но некои заинтересирани лица продолжија духовно да напредуваат, иако мораа да патуваат по еден час за да присуствуваат на состаноците во најблиската Сала на Царството. Да, за да се пожнее богата жетва потребна е истрајност, сеедно дали се работи за материјален или за духовен принос.

[Карта на страница 8]

(Види во публикацијата)

КИНА

Тајвански теснец

ТАЈВАН

[Извор на слика]