„Приближете му се на Бог, и тој ќе ви се приближи вам“

Пред и потоа — таа нашла сила да се промени

САНДРА, една жена од Мексико, се опишала себеси како црна овца во семејството. Тоа што била отфрлена и не ѝ била покажана наклоност ги упропастило нејзините тинејџерски години. Таа вели: „Низ адолесценцијата минував со постојано чувство на празнина и многу сомнежи во врска со моето постоење и живот“.

Како средношколка, Сандра почнала да пие од виното што татко ѝ го имал дома. Со текот на времето, почнала сама да си купува пијалак и станала алкохоличар. „Немав мотив да живеам“, признава таа. Во очај, Сандра се свртела кон дрогата. „Единственото нешто што ми помагаше да ги заборавам моите проблеми“, вели таа, „беше она што го носев во мојата чанта: шише алкохол, таблети или малку марихуана.“

Откако завршила медицинско училиште, Сандра сѐ подлабоко тонела во алкохолизам. Се обидела да му стави крај на својот живот. Но, преживеала.

Сандра залудно барала духовна помош и емоционална поддршка во многу различни религии. Бидејќи изгубила надеж и потонала во очај, постојано извикувала кон Бог: „Каде си? Зошто не ми помогнеш?“ Нејзиното чувство за самопочит било сведено на нула кога една жена, Јеховин сведок, поразговарала со неа. Тоа довело до лична библиска студија. Сандра била длабоко трогната кога дознала дека „Господ е близу до оние што се со скрушени срца“ (Псалм 34:18).

Жената што ја поучувала за Библијата ѝ помогнала на Сандра да разбере дека Јехова Бог знае дека сме ранливи поради гревот и несовршеноста што сме ги наследиле од Адам. Сандра увидела дека Бог разбира дека не можеме совршено да се придржуваме на праведните мерила (Псалм 51:5; Римјаните 3:23; 5:12, 18). Била среќна што научила дека Јехова не се сосредоточува на нашите слабости и дека не очекува од нас повеќе отколку што можеме да направиме. Псалмистот прашал: „Ако си спомнуваш, Господи, за гревот, Господи, кој ќе опстане?“ (Псалм 130:3).

Една важна библиска вистина што ѝ го згреала срцето на Сандра била откупната жртва на Исус Христос. Преку неа, Јехова милосрдно им ветува на послушните луѓе праведна состојба и покрај нивната несовршеност (1. Јованово 2:2; 4:9, 10). Да, можеме да добиеме „простување на нашите престапи“ и помош да совладаме какво и да било чувство на безвредност (Ефешаните 1:7).

Сандра научила скапоцени лекции од примерот на апостол Павле. Тој многу ја ценел љубезноста на Бог кој милостиво му ги простил минатите грешки и го поддржувал во неговата борба да ги совлада слабостите што постојано му надоаѓале (Римјаните 7:15—25; 1. Коринќаните 15:9, 10). Павле го исправил својот живот, ‚го биел своето тело и го водел како роб‘ за да остане на патот одобрен од Бог (1. Коринќаните 9:27). Не дозволил грешните склоности да го водат како роб.

Слабостите ја измачувале Сандра, но таа продолжила да се бори против нив. Искрено му се молела на Јехова да ѝ помогне да ги совлада и ја барала неговата милост (Псалм 55:22; Јаков 4:8). Чувствувајќи дека Бог е лично заинтересиран за неа, Сандра можела да го промени својот живот. „Ја имам радоста полновремено да им помагам на другите да ја научат библиската вистина“, вели таа. Сандра имала предност да им помогне на својата постара и на својата помлада сестра да го запознаат Јехова, што ѝ донело радост. Додека ‚прави добро‘, таа исто така доброволно ги нуди своите медицински вештини на конгресите на Јеховините сведоци (Галатите 6:10).

Но, што е со зависноста на Сандра? Таа уверено вели: „Умот ми е бистар. Не пијам повеќе, не пушам, ниту земам дрога. Не ми требаат. Го најдов она што го барав“.

[Истакната мисла на страница 9]

„Го најдов она што го барав“

[Рамка на страница 9]

Библиски начела на дело

Еве некои библиски начела што им помогнале на многумина да се ослободат од валкани навики:

„Да се исчистиме од секоја валканост на телото и духот, усовршувајќи ја светоста во Божји страв“ (2. Коринќаните 7:1). Бог ги благословува оние што се исчистиле од валканост, така што избегнуваат нечисти практики.

„Стравот од Господа е омраза кон злото“ (Пословици 8:13). Побожниот страв од Бог му помага на едно лице да се ослободи од лошите навики, вклучувајќи ја и злоупотребата на дрога. Освен што тоа му е угодно на Бог, лицето што се променило е заштитено од ужасни болести.

‚Бидете подложни на владите и властите како на владетели‘ (Тит 3:1). На многу места поседувањето или користењето извесни дроги е кршење на законот. Вистинските христијани не поседуваат ниту користат незаконски дроги.