Одлучи да му служиш на Јехова уште додека си млад
„Остани во она што си го научил и во кое си се уверил“ (2. ТИМ. 3:14).
1. Како гледа Јехова на службата што му ја вршат неговите млади Сведоци?
ЈЕХОВА толку многу ја цени светата служба која му ја вршат младите што дал да се запише едно пророштво во врска со нив. Псалмистот во песна рекол: „Твојот народ спремно ќе се понуди во денот кога ќе ја поведеш во војна својата војска. Украсени со светост, од утробата на зората, покрај тебе се твоите млади воини, кои се како капките роса“ (Пс. 110:3). Да, младите што се спремни да му служат се навистина скапоцени за Јехова.
2. Какво влијание има светот врз целите што си ги поставуваат младите?
2 Вие млади во христијанското собрание, дали сте му го ветиле својот живот на Јехова? На мнозина им е тешко да донесат одлука да му служат на вистинскиот Бог. Познати лица од светот на бизнисот, професори, а понекогаш и членови на семејството и пријатели ги наведуваат младите да си постават материјалистички цели. А кога младите си поставуваат духовни цели, некои луѓе во светот ги исмеваат. Сепак, факт е дека најдобрата одлука што некој може да ја донесе е да го посвети својот живот на службата за вистинскиот Бог (Пс. 27:4). Во врска со ова, да разгледаме три прашања: Зошто да му служиш на Бог? Како можеш успешно да му служиш на Бог сеедно што ќе речат или ќе направат другите? Кои прекрасни можности би можеле да ти се пружат во светата служба?
Јехова заслужува да му служиме
3. Како треба да влијае врз нас Јеховиното творештво?
3 Зошто да му служиш на вистинскиот и жив Бог? Во Откровение 4:11 ни е дадена главната причина: „Достоен си, Јехова, Боже наш, да ја примиш славата и честа и моќта, бидејќи ти создаде сѐ, и поради твојата волја сѐ постои и е создадено“. Јехова е величествениот Творец на сѐ што постои. Колку е прекрасна Земјата! Дрвјата, цвеќињата, животните, океаните, планините, водопадите — сето тоа е дело на Јеховините раце. „Полна е земјата со [Божји] творби“, стои во Псалм 104:24. Колку благодарни треба да бидеме што Јехова со љубов ни подарил тело и ум, благодарение на кои можеме да уживаме во животот на Земјата и во добрите работи што ги има на неа! Зарем длабоката благодарност за неговите прекрасни творби не треба да нѐ поттикне од срце да му служиме?
4, 5. Кои Божји постапки го зближиле Исус Навин со Јехова?
4 Израелскиот водач Исус Навин навел уште една причина зошто да му служиме на Јехова. Кон крајот на својот живот, тој му го рекол следново на Божјиот народ: „Вие добро знаете со сето ваше срце и со сета ваша душа дека не остана неисполнето ниту едно ветување од сите добри ветувања што ви ги даде Јехова, вашиот Бог. Сѐ ви се исполни“. Зошто Исус Навин можел да каже вакво нешто? (Ис. Нав. 23:14).
5 Додека растел како дете во Египет, тој сигурно чул за Јеховиното ветување дека еден ден ќе им даде земја на Израелците која ќе биде само нивна (1. Мој. 12:7; 50:24, 25; 2. Мој. 3:8). Потоа имал можност со свои очи да види како Јехова постепено почнал да го исполнува тоа пророштво нанесувајќи му ги десетте неволји на Египет и присилувајќи го тврдоглавиот фараон да ги пушти на слобода Израеловите синови. Исус Навин бил меѓу оние што поминале низ Црвеното Море и биле избавени, а видел и како тоа море ги голтнало фараонот и неговата војска. Во текот на долгото патување низ „големата и застрашувачка [Синајска] пустина“, Исус Навин гледал како Јехова им дава на Израелците сѐ што им било потребно. Ниту еден од нив не умрел од жед или од глад (5. Мој. 8:3-5, 14-16; Ис. Нав. 24:5-7). Кога дошло време Израелците да ги покорат силните ханаански народи и да ја заземат Ветената земја, Исус Навин гледал како Богот на кој му служел заедно со другите Израелци им помага во тој поход (Ис. Нав. 10:14, 42).
6. Што ќе ти помогне да развиеш желба да му служиш на Бог?
6 Исус Навин добро знаел дека Јехова си стои на зборот. Затоа изјавил: „Јас и мојот дом ќе му служиме на Јехова!“ (Ис. Нав. 24:15). А како е со тебе? Кога размислуваш за ветувањата што вистинскиот Бог веќе ги исполнил и за оние што ќе ги исполни во иднина, дали сакаш да му служиш исто како што сакал Исус Навин?
7. Зошто крштавањето во вода е многу важен чекор?
7 Ако размислуваш за Јеховините творби и за неговите прекрасни и апсолутно веродостојни ветувања, треба да бидеш поттикнат не само да му го ветиш својот живот на Јехова туку и да го симболизираш тоа со крштавање во вода. Крштавањето е многу важен чекор кој го преземаат оние што сакаат да му служат на Бог. Ова јасно го гледаме од нашиот Пример, Исус. Токму пред да го започне своето дело како Месија, тој отишол кај Јован Крстител за да се крсти. Зошто го направил ова? „Не слегов од небото да ја вршам својата волја“, рекол подоцна, „туку волјата на оној што ме испрати“ (Јован 6:38). Исус се крстил за да му покаже на својот Татко дека е спремен да ја врши Неговата волја (Мат. 3:13-17).
8. Зошто Тимотеј одлучил да му служи на Бог, и што можеби треба да сториш и ти?
8 Размисли и за Тимотеј, млад христијанин кому Јехова со текот на времето му дал многу работа и голем број посебни задачи. Зошто Тимотеј одлучил да му служи на вистинскиот Бог? Библијата ни кажува дека тој ‚се уверил во она што го научил‘ (2. Тим. 3:14). Ако си ја проучувал Божјата реч и си се уверил дека она што го учи таа е вистина, ти си во слична ситуација како Тимотеј. Сега треба да донесеш одлука. Зошто не зборуваш со родителите за тоа што би сакал да правиш? Заедно со собраниските старешини, родителите можат да ти помогнат да сфатиш кои библиски барања треба да ги исполниш за да се крстиш. (Прочитај Дела 8:12.)
9. Како може да влијае твоето крштавање врз луѓето околу тебе?
9 Крштавањето е одличен почеток на службата за вистинскиот Бог. Кога ќе го направиш овој чекор, ти, всушност, почнуваш да трчаш во една симболична маратонска трка. Наградите за оние што учествуваат во трката се вечниот живот и радоста што уште сега ја чувствуваме затоа што ја вршиме Божјата волја (Евр. 12:2, 3). Освен тоа, ќе ги израдуваш и членовите на твоето семејство кои веќе трчаат во таа трка, како и пријателите во христијанското собрание. Но, најважно од сѐ, ќе го израдуваш Јеховиното срце. (Прочитај Изреки 23:15.) Сепак, веројатно ќе има и такви што нема да разберат зошто си решил да му служиш на Јехова и ќе мислат дека тоа не е добра одлука. Некои од нив можеби дури и ќе ти се противат. Но, ти можеш да ги надминеш ваквите пречки.
Што ако некои ти се чудат на одлуката или ти се противат?
10, 11. а) Кои прашања можеби ќе ти ги постават луѓето во врска со твојата одлука да му служиш на Бог? б) Што учиш од начинот на кој Исус одговарал на прашањата во врска со вистинската религија?
10 Твојата одлука да му служиш на Јехова може да ги зачуди твоите соученици, соседи и роднини. Можеби ќе те прашуваат зошто си се одлучил на таков чекор и ќе сакаат да знаат во што веруваш. Како треба да реагираш? Се разбира, треба самиот да се преиспиташ како размислуваш и што чувствуваш за да можеш да им објасниш од кои причини си донел таква одлука. Кога ќе те прашаат во што веруваш, можеш да им одговориш слично како што одговарал Исус, кој ни дал најдобар пример и во овој поглед.
11 Во една прилика, кога еврејските верски водачи го распрашувале за воскресението, Исус им го свртел вниманието на еден стих на кој тие воопшто не помислиле (2. Мој. 3:6; Мат. 22:23, 31-33). Кога еден книжник го прашал која е најголемата заповед, Исус му цитирал соодветни библиски стихови. Тој човек му бил благодарен на Исус за одговорот што го добил (3. Мој. 19:18; 5. Мој. 6:5; Мар. 12:28-34). Поради начинот на кој Исус ги користел Писмата и начинот на кој им зборувал, ‚во народот дошло до поделба‘, и така неговите противници не можеле да му направат ништо лошо (Јован 7:32-46). Кога одговараш на прашања во врска со твојата вера, користи ја Библијата и зборувај „благо и со длабока почит“ (1. Пет. 3:15). Ако не го знаеш одговорот на некое прашање, признај го тоа и кажи дека би можел да го истражиш. Подоцна можеш да побараш информации во Индексот на теми, кој излегува секоја година во Стражарска кула од 15 декември, а ако знаеш некој странски јазик, можеш да ги користиш Индексот или Библиотеката со публикации на Јеховините сведоци на CD-ROM. Со добра подготовка, ќе ‚знаеш секому да му одговориш како што треба‘ (Кол. 4:6).
12. Зошто не треба да дозволиш прогонството да те обесхрабри?
12 Можеби луѓето нема да останат само на тоа да те прашаат во што веруваш и зошто си избрал да му служиш на Бог. Не смееме да заборавиме, Божјиот непријател, Сатана Ѓаволот, владее со светот. (Прочитај 1. Јованово 5:19.) Не е реално да очекуваш сите да те фалат и да го одобруваат твојот став. Всушност, веројатно ќе има и такви што ќе ти се противат. Некои луѓе можеби ќе ‚зборуваат срамно за тебе‘, и тоа не само еднаш (1. Пет. 4:4). Сепак, сети се — ти не си сам. И Исус Христос бил прогонуван. Апостол Петар го доживеал истото и напишал: „Сакани, не чудете се на огнот што пламти меѓу вас за да ве искуша, како да ви се случува нешто необично! Напротив, радувајте се што страдате како што страдаше Христос“ (1. Пет. 4:12, 13).
13. Зошто христијаните можат да се радуваат кога се прогонувани?
13 Ако си жртва на прогонство или противење затоа што си христијанин, имаш причина да се радуваш. Зошто? Затоа што, ако светот те одобрува, тогаш тоа е показател дека живееш според мерилата на Сатана, а не според Божјите мерила. Исус предупредил: „Тешко вам кога сите луѓе зборуваат добро за вас, зашто нивните прататковци им го правеа истото и на лажните пророци!“ (Лука 6:26). Прогонството покажува дека Сатана и неговиот свет се гневни на тебе затоа што му служиш на Јехова. (Прочитај Матеј 5:11, 12.) Всушност, треба да се радуваме ако нѐ „исмејуваат поради Христовото име“ (1. Пет. 4:14).
14. Какви добри резултати се постигнуваат кога некој му останува верен на Јехова и покрај прогонството?
14 Кога си му верен на Јехова и покрај сето противење, се постигнуваат најмалку четири добри резултати. Ти сведочиш за Бог и за неговиот Син. Твојата верна истрајност ги храбри твоите христијански браќа и сестри. Можеби некои од оние што те набљудуваат од страна, но не го познаваат Јехова, ќе бидат поттикнати да го бараат. (Прочитај Филипјаните 1:12-14.) И, на крајот, кога на своја кожа чувствуваш како Јехова ти дава сила за да ги поднесеш испитите, твојата љубов кон него уште повеќе расте.
Ти се отвора „голема врата“
15. Каква „голема врата“ му се отворила на апостол Павле?
15 Во врска со својата служба во Ефес, апостол Павле напишал: „Ми се отвори голема врата за работа“ (1. Кор. 16:8, 9). Симболичната „врата“ за која зборувал Павле била можноста во голема мера да ја проповеда добрата вест и да ги поучува луѓето во тој град. Кога влегол низ таа врата, Павле им помогнал на мнозина да го запознаат Јехова и да му служат.
16. Како помазаниот остаток влегол низ една ‚отворена врата‘ во 1919 год.?
16 Во 1919 год., прославениот Исус Христос му ‚отворил‘ една таква ‚врата‘ на остатокот од помазаници (Отк. 3:8). Тие влегле низ таа врата и почнале да ја проповедаат добрата вест, поучувајќи ги другите за библиската вистина со поголем жар од кога и да било порано. Какви биле резултатите од нивната служба? Добрата вест денес се проповеда до крајот на Земјата, а околу седум милиони луѓе имаат надеж дека ќе живеат вечно во Божјиот нов свет.
17. Како можеш да влезеш низ една „голема врата за работа“?
17 Една „голема врата за работа“ сѐ уште е ширум отворена за сите Јеховини слуги. Оние што влегуваат низ неа, наоѓаат радост и задоволство кога ја проповедаат добрата вест во зголемена мера. Вие млади слуги на Јехова, колку ја цените неспоредливата чест да им помагате на другите ‚да веруваат во добрата вест‘? (Мар. 1:14, 15). Дали сте размислувале да служите како општи или помошни пионери? Можно е на мнозина од вас да им се пружи прилика да служат на изградба на Сали на Царството, во Бетел или како специјални пионери или мисионери. Со оглед на тоа што времето на Сатановиот злобен свет му истекува, од ден на ден станува сѐ поитно да се служи во некоја од овие гранки на службата за Царството. Дали ќе влезеш низ таа „голема врата“ додека сѐ уште има време?
„Вкусете и видете колку е добар Јехова!“
18, 19. а) Што ја засилило кај Давид желбата да му служи на Јехова? б) Од каде знаеме дека Давид никогаш не зажалил што му служел на Бог?
18 Под водство на светиот дух, псалмистот ги повикал другите да ‚вкусат и да видат колку е добар Јехова‘ (Пс. 34:8). Кога Давид, цар на древниот Израел, бил младо овчарче, Јехова го спасил кога го нападнале диви животни. Освен тоа, Бог му помогнал да го победи Голијат и го избавил од многу други неволји (1. Сам. 17:32-51; Пс. 18, наслов). Божјата голема добрина го поттикнала Давид да напише: „Ти направи многу дела чудесни, о Јехова, Боже мој, и многу работи за нас си намислил — ти нема рамен“ (Пс. 40:5).
19 Давид многу го засакал Јехова и имал силна желба да го слави со сето срце и со сиот ум. (Прочитај Псалм 40:8-10.) Како што одминувале годините, Давид никогаш не зажалил што цел живот му служел на вистинскиот Бог. Најголемо богатство за него било тоа што го живеел животот како оддаден слуга на Бог — тоа за него било извор на неизмерна среќа. На стари години, Давид рекол: „Ти си мојата надеж, Севишен Господару Јехова, мојата доверба од младоста моја. Не оставај ме ни во староста, кога ќе ми побели косата, о Боже“ (Пс. 71:5, 18). Иако физичката сила што ја имал Давид полека слабеела, неговата доверба во Јехова и неговото пријателство со Бог станувале уште поцврсти.
20. Зошто најдоброто нешто кое можеш да го направиш во животот е да му служиш на Јехова?
20 Животот на Исус Навин, на Давид и на Тимотеј е уште еден доказ дека најдоброто нешто кое можеш да го направиш е да му служиш на Јехова. Краткотрајните материјални користи што можеби ќе ти ги донесе кариерата во овој свет не можат да се споредат со долготрајните користи што ги имаш кога ‚му служиш на Јехова со сето свое срце и со сета своја душа‘ (Ис. Нав. 22:5). Ако досега не си му го заветувал својот живот во молитва на Јехова, прашај се: ‚Што ме спречува да станам Јеховин сведок?‘ Ако веќе си крстен слуга на Јехова, дали би сакал уште повеќе да му се радуваш на животот? Тогаш, служи му на Бог во уште поголема мера и продолжи духовно да напредуваш. Следната статија ќе ти покаже како можеш духовно да растеш следејќи го примерот на апостол Павле.
Како би одговорил?
• Наведи две причини зошто да му служиме на Бог.
• Што му помогнало на Тимотеј да одлучи да му служи на Бог?
• Зошто треба да останеш цврст кога ќе се соочиш со прогонство?
• Кои видови служба ти стојат на располагање?
[Слика на страница 18]
Служењето на Јехова е најдобриот животен пат
[Слика на страница 19]
Можеш ли да одговориш кога некој ќе те распрашува за твојата вера?