Како да допреме до срцето на луѓе кои не се религиозни

1. До каква промена дојде во последниве години?

СО ВЕКОВИ наназад, повеќето луѓе во светот припаѓале на некоја религија. Но, во последниве години настана една голема промена — сѐ повеќе луѓе велат дека не се религиозни.b Всушност, во некои земји поголемиот дел од населението се изјаснува дека не припаѓа на ниту една религијаc (Мат. 24:12).

2. Од кои причини расте бројот на луѓе кои не се религиозни?

² Зошто расте бројот на лица кои за себе велат дека не се религиозни? Некои размислуваат само за личните задоволства или, пак, се преокупирани со своите проблеми (Лука 8:14). Други станале атеисти. Трети веруваат во Бог, но сметаат дека религијата е застарена и бескорисна, и дека се коси со науката и логиката. Тие можеби се под влијание на пријателите, наставниците или јавните личности кои велат дека животот настанал по пат на еволуција, а од друга страна ретко слушаат логични причини зошто да веруваат во Бог. Освен тоа, има и луѓе кои се згрозени од свештениците кои се алчни за пари и моќ. А во некои места, самите власти донеле закони со кои се ограничуваат религиозните активности.

3. Која е целта на оваа статија?

³ Исус ни заповедал да правиме „ученици од луѓето од сите народи“ (Мат. 28:19). Како можеме да им помогнеме на луѓето кои не се религиозни да го засакаат Бог и да станат ученици на Христос? Треба да бидеме свесни дека луѓето реагираат различно на нашата порака, а како некој ќе реагира, многу зависи од тоа каде пораснал. На пример, луѓето од Европа не реагираат на ист начин како луѓето од Азија. Зошто? Па, многу луѓе во Европа знаат нешто за Библијата и не им е непозната идејата дека постои Бог кој создал сѐ. Но во Азија, повеќето луѓе знаат сосем малку или, пак, не знаат ништо за Библијата и не веруваат во Творец. Целта на оваа статија е да ни помогне да допреме до срцето на сите оние на кои им проповедаме, без разлика од каде се или во што веруваат.

ЗАДРЖИ ПОЗИТИВЕН СТАВ

4. Зошто треба да бидеме позитивни?

⁴ Биди позитивен. Секоја година, вистината ја прифаќаат и луѓе кои не биле религиозни. Многумина од нив веќе живееле според високи морални мерила и им било одвратно лицемерството во религиите. Други, пак, имале ниски морални вредности и лоши навики кои требало да ги остават. Можеме да бидеме уверени дека со помош на Јехова ќе ги пронајдеме оние кои исправно гледаат на вечниот живот (Дела 13:48; 1. Тим. 2:3, 4).

5. Што обично ги поттикнува луѓето добро да реагираат на нашата порака?

⁵ Биди љубезен и тактичен. Луѓето обично реагираат добро на нашата порака не поради она што им го кажуваме, туку поради начинот на кој им ја пренесуваме пораката. Им остава впечаток тоа што сме љубезни, обѕирни и што покажуваме искрен интерес кон нив. Ние не им го наметнуваме нашето гледиште, туку се трудиме да сфатиме од кои причини имаат одреден став кон религијата и кон Бог. На пример, некои не сакаат да зборуваат на религиозни теми со непознати. Други сметаат дека не е учтиво да прашуваш некого што мисли за Бог. А на трети им е непријатно ако некој ги види дека читаат од Библијата, особено со Јеховините сведоци. Во секој случај, ние се трудиме да бидеме обѕирни кон чувствата на луѓето (2. Тим. 2:24).

6. Како апостол Павле покажал дека е приспособлив, и како можеме да го следиме неговиот пример?

⁶ Но, што да правиме ако некој не се чувствува пријатно кога спомнуваме зборови како што се „Библија“, „Бог“ или „религија“? Можеме да го следиме примерот на апостол Павле и да смениме нешто во нашиот пристап. Кога зборувал со Евреи, Павле ги користел Писмата. Но, кога зборувал со грчките филозофи среде Ареопагот, не спомнал дека цитира од светите списи (Дела 17:2, 3, 22-31). Како можеме да го следиме неговиот пример? Ако сретнеш некој кој не ја прифаќа Библијата како Божја Реч, можеби ќе биде подобро да не ја спомнуваш додека зборуваш со него. А доколку мислиш дека некому ќе му биде непријатно другите да го видат како чита од Библијата, пробај да му ги покажеш стиховите на не толку упадлив начин како, на пример, на електронски уред.

7. Според 1. Коринќаните 9:20-23, како може да го следиме примерот на апостол Павле?

⁷ Покажувај разбирање и слушај. Многу е важно да се обидеме да сфатиме зошто луѓето размислуваат на одреден начин (Изр. 20:5). Да се вратиме на апостол Павле. Тој пораснал меѓу Евреи. Без сомнение, морал да се приспособи кога им проповедал на луѓето од другите народи, бидејќи тие знаеле малку или не знаеле ништо за Јехова и за светите списи. За подобро да ги разбереме луѓето што живеат на нашето подрачје, можеби ќе треба малку да истражуваме или, пак, да зборуваме со поискусните објавители од нашето собрание. (Прочитај 1. Коринќаните 9:20-23.)

8. Како би можеле да започнеме разговор за Библијата?

⁸ Нашата цел е да ги најдеме достојните (Мат. 10:11). За да успееме во тоа, треба да ги прашаме луѓето за нивното мислење, а потоа внимателно да ги слушаме. Еден брат од Англија започнува разговори со луѓето така што ги прашува што мислат за одредени теми, на пример, како да имаме среќен брак, како да ги воспитуваме децата или како да се справиме со неправдите. Откако ќе ги сослуша, им вели: „Што мислите за овој совет, кој бил напишан пред околу 2.000 години?“ Потоа, без да го спомнува зборот „Библија“, им чита соодветни стихови од својот мобилен кои однапред ги избрал.

ДА ДОПРЕМЕ ДО СРЦЕТО НА ЛУЃЕТО

9. Како би можеле да допреме до срцето на луѓе кои обично не сакаат да зборуваат за Бог?

⁹ Можеме да допреме до срцето на луѓето кои обично не сакаат да зборуваат за Бог ако почнеме разговор за нешто друго што повеќе би ги интересирало. На пример, многумина се восхитуваат на природата. Би можеле да кажеме: „Можеби знаете дека научниците успеале да измислат многу работи затоа што копирале нешто што веќе постои во природата. На пример, инженерите кои дизајнираат микрофони ги изучуваат ушите на инсектите, а инженерите кои дизајнираат камери ги изучуваат очите на инсектите. Според Вас, што е природата — сила, личност или нешто друго?“ Откако внимателно ќе го слушнеме одговорот, би можеле да додадеме: „Кога инженерите дизајнираат вакви работи, чии идеи копираат? За мене беше многу интересно кога прочитав што напишал еден поет од минатото: ’Зар не може да чуе оној што го направил увото? Зар не може да види оној што го обликувал окото... оној што ги учи луѓето да стекнат знаење?‘ Некои научници дошле до истиот заклучок — дека мора да постои Творец“ (Пс. 94:9, 10). Потоа можеме да го покажеме видеоклипот Дали животот е Божје дело? — вовед, или да ја понудиме брошурата Дали животот е Божје дело?

10. На кој друг начин би можеле да започнеме разговор со луѓе кои обично не сакаат да зборуваат за Бог?

¹⁰ Повеќето луѓе копнеат по една подобра иднина. Меѓутоа, многумина се плашат дека Земјата ќе биде уништена или дека ќе нема услови за живот на неа. Еден брат кој служи како покраински надгледник во Норвешка вели дека луѓето кои не сакаат да зборуваат за Бог обично сакаат да зборуваат за настаните во светот. Откако ќе ги поздрави, тој им вели: „Што мислите, кој може да ни донесе подобра иднина — политичарите, научниците или некој друг?“ Потоа внимателно ќе ги сослуша, и тогаш им чита или им цитира библиски стих кој потврдува дека нѐ очекува светла иднина. Некои се пријатно изненадени од ветувањата на Библијата дека Земјата ќе постои засекогаш и дека добрите луѓе ќе живеат на неа во сета вечност (Пс. 37:29; Проп. 1:4).

11. а) Зошто треба да користиме различни начини за да започнуваме разговори со луѓето? б) Според Римјаните 1:14-16, како може да го следиме примерот на апостол Павле?

¹¹ Убаво е да користиме различни начини за да започнуваме разговори со луѓето што ги среќаваме. Зошто? Затоа што луѓето се разликуваат едни од други. Она што за еден човек би било интересно, кај друг може да има спротивен ефект. На некои не им пречи да зборуваат за Бог или за Библијата, но други ќе бидат поспремни да нѐ слушаат ако најпрво разговараме за нешто друго. Како и да е, важно е да ја користиме секоја прилика да зборуваме со најразлични луѓе. (Прочитај Римјаните 1:14-16.) Се разбира, не смееме да заборавиме дека Јехова е тој што дава вистината да расте во срцето на оние што ја сакаат правдата (1. Кор. 3:6, 7).

КАКО ДА ИМ СВЕДОЧИМЕ НА ЛУЃЕ ОД АЗИЈА

12. Како можеме да им ја пренесеме вистината на луѓе од азиските земји кои никогаш не размислувале за тоа дали е можно да има Творец?

¹² Низ целиот свет, многу објавители среќаваат луѓе од Азија, вклучувајќи и луѓе што потекнуваат од земји во кои властите наметнале религиозни ограничувања. Во повеќе азиски земји, многумина никогаш не размислувале за тоа дали е можно да има Творец. Некои од нив се љубопитни и веднаш прифаќаат библиски курс, но други не се толку отворени за нови идеи. Што би можеле да направиме за да им помогнеме да ја дознаат вистината? Некои поискусни објавители имаат убави резултати така што започнуваат пријателски разговор и покажуваат интерес за луѓето, а потоа, кога е соодветно, спомнуваат како им користело во животот тоа што примениле некое библиско начело.

13. Што може да привлече некои луѓе кон Библијата? (Види ја сликата на насловната страница.)

¹³ Многу луѓе се привлечени кон Библијата кога ќе видат какви практични совети за секојдневниот живот има во неа (Проп. 7:12). Една сестра од Њујорк која им проповеда на луѓе што зборуваат кинески вели: „Се трудам да покажам интерес кон нив и да ги слушам. Ако дознаам дека се доселиле од неодамна, прашувам: ’Се навикнувате ли на животот овде? Најдовте ли работа? Како се однесуваат луѓето со Вас?‘“ Понекогаш тоа ѝ помага на оваа сестра да спомне и некое библиско учење. Кога е соодветно, таа додава: „Што мислите, што е потребно за да бидеме во добри односи со другите? Може ли да Ви покажам една изрека од Библијата? Таа гласи: ’Кога ќе почне караница, како да се отворила водна брана. Затоа, пред да избие караницата, оддалечи се‘. Мислите ли дека овој совет е корисен?“ (Изр. 17:14). Таквите разговори можат да ни помогнат да процениме кои луѓе сакаат да дознаат нешто повеќе.

14. Како постапува еден брат со луѓето во Источна Азија што велат дека не веруваат во Бог?

¹⁴ А како да постапиме кога некој ќе ни каже дека не верува во Бог? Еден брат кој со години им проповеда на луѓе во Источна Азија кои не се религиозни вели: „Обично, кога некој ќе рече: ’Не верувам во Бог‘, тој, всушност, сака да каже дека не ги обожава боговите што ги обожаваат повеќето луѓе во неговото место. Затоа, обично се согласувам дека скоро сите богови се измислени од луѓето и дека не постојат. Честопати го читам стихот од Еремија 16:20: ’Може ли земниот човек да си направи богови, кога тоа не се богови?‘ Потоа прашувам: ’Како може да знаеме дали некој бог е вистински или е измислен?‘ Внимателно слушам, и тогаш читам Исаија 41:23: ’Кажете ни што ќе биде потоа, па ќе знаеме дека сте богови‘. На крајот истакнувам некој пример за тоа како Јехова точно ја прорекол иднината“.

15. Што може да научиме од примерот на братот од Источна Азија?

¹⁵ Во врска со своите повторни посети, еден друг брат од Источна Азија вели: „Им наведувам на луѓето примери за тоа дека во вселената владеат природни закони, дека Библијата содржи мудри совети и дека библиските пророштва се исполнуваат. Потоа им помагам да сфатат како сето тоа покажува дека постои мудар Творец кој е вистинска личност. Кога некој ќе прифати дека е можно да постои Бог, му покажувам што вели Библијата за Јехова“.

16. Според Евреите 11:6, зошто луѓето треба да стекнат вера во Бог и во Библијата, и како можеме да им помогнеме во тоа?

¹⁶ Кога проучуваме со луѓе кои не се религиозни, мора постојано да вложуваме труд за да им помогнеме постепено да се уверат дека постои Бог. (Прочитај Евреите 11:6.) Освен тоа, мора да им помагаме да стекнат доверба дека она што стои во Библијата е вистина. За да успееме во тоа, можеби ќе треба повеќе пати да зборуваме за иста работа. Можеби ќе треба секојпат кога проучуваме со нив да им наведуваме докази дека Библијата е Божја Реч. На пример, можеби ќе треба кратко да поразговараме за исполнетите библиски пророштва, за научната и историската точност на Библијата или за нејзините практични совети.

17. Како може да влијае врз луѓето тоа што гледаат дека искрено ги сакаме?

¹⁷ Им помагаме на луѓето да станат ученици на Христос така што покажуваме дека ги сакаме, сеедно дали се религиозни или не (1. Кор. 13:1). Додека ги поучуваме, нашата цел е да им помогнеме да сфатат дека Бог нѐ сака, и дека треба и ние да го сакаме него. Секоја година се крштаваат илјадници лица кои порано немале некаков интерес за религија. Тие го направиле тој чекор затоа што го запознале и го засакале Бог. Затоа, биди позитивен и покажувај искрен интерес кон сите луѓе. Внимателно слушај ги, пробај да ги разбереш, и со твојот личен пример помогни им да станат ученици на Христос.